އިޒްރޭލަށް އަރަބި ގައުމުތަކުގެ ބިންތައް ލިބުމަކީ އެންމެ ރަނގަޅު ކަމެއް ކަމަށް ވިދާޅުވެ އެމެރިކާގެ އެމްބެސެޑަރު ވާހަކަ ދެއްކުމުން އަރަބި އަދި އިސްލާމީ ގައުމުތަކުން ވަރަށް ބޮޑަށް ރުޅިގަދަވެއްޖެ

އިޒްރޭލުން ހިފާފައިވާ ހުޅަނގު އައްސޭރި ހިމެނޭހެން، އަރަބި ގައުމުތަކުގެ ބިންތަކުގެ މައްޗަށް އިޒްރޭލުން ބާރު ފޯރުވުމަކީ ބަލައިގަނެވޭނެ ކަމެއް ކަމަށް ދޭހަވާ ގޮތަށް، އެމެރިކާއިން އިޒްރޭލަށް ކަނޑައަޅާފައި ހުންނަވާ ސަފީރު މައިކް ހަކަބީ ދެއްކެވި ވާހަކަތައް އަރަބި އަދި އިސްލާމީ ގައުމުތަކާއި ޖަމާއަތްތަކުން އާދީއްތަ ދުވަހު ވަރުގަދައަށް ކުށްވެރިކޮށް، އެ ވާހަކަތައް ބަލައިނުގަންނާނެ ކަމަށް ބުނެފިއެވެ.

ސަފީރު ހަކަބީ ދާދިފަހުން ދެއްކެވި ވާހަކަތަކާ ގުޅިގެން، ސައުދީ އަރަބިއްޔާ، އުރުދުން، ޔޫއޭއީ، ގަތަރު، އިންޑޮނޭޝިއާ، ޕާކިސްތާން، މިސްރު، ތުރުކީ، ސީރިއާ، ފަލަސްތީން، ކުވެއިތު، ލުބުނާން، އޮމާން އަދި ބަހްރޭންގެ ޚާރިޖީ ވަޒީރުންގެ އިތުރުން، ގަލްފް ކޯޕަރޭޝަން ކައުންސިލް (ޖީސީސީ) އާއި، ލީގް އޮފް އަރަބް ސްޓޭޓްސް (އަރަބް ލީގު) އަދި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގުޅިގެން ވަނީ އެ ވާހަކަތައް ބަލައިނުގަންނަކަން ހާމަކޮށް ބަޔާނެއް ނެރެފައެވެ.

ސައުދީ ޚާރިޖީ ވުޒާރާއިން ހިއްސާކުރި މި ބަޔާނުގައި ބުނެފައިވަނީ، ބައިނަލްއަގުވާމީ ގާނޫނުތަކުގެ އުސޫލުތަކާއި އދ. ގެ ޗާޓަރާ ކަނޑައެޅިގެން ޚިލާފު، އަދި ސަރަހައްދުގެ ސަލާމަތާއި ހަމަޖެހުމަށް އޮތް ނުރައްކާތެރި އިންޒާރެއްގެ ގޮތުގައި ބެލެވޭ މިފަދަ ފިތުނަވެރި ވާހަކަތައް އެ ގައުމުތަކުން އެއްވެސް ހާލެއްގައި ބަލައިނުގަންނާނެ ކަމަށެވެ.

ބެޕްޓިސްޓް ފައްޅީގެ ކުރީގެ މިނިސްޓަރެއްގެ އިތުރުން އިޒްރޭލަށް ވަރަށް ބޮޑަށް ތާއީދުކުރައްވާ ހަކަބީ މި ވާހަކަތައް ދެއްކެވީ، ސިޔާސީ އެނަލިސްޓް ޓަކާ ކާލްސަންގެ ޕޮޑްކާސްޓެއްގައި ވާހަކަދައްކަވަމުންނެވެ.

ހުކުރު ދުވަހު އާންމުކުރި މި ޕޮޑްކާސްޓްގައި، މިސްރުގެ ނީލަ ކޯރާއި ސީރިއާ އަދި އިރާގުގެ ފުރާތު ކޯރާ ދެމެދު އޮތް ބިންތަކަކީ އިޒްރޭލަށް ހައްގު ބިންތަކެއް ކަމަށް ބައެއް ފަރާތްތަކުން މާނަކުރާ އިންޖީލުގެ އާޔަތަކާ ގުޅޭގޮތުން ކާލްސަން ވަނީ ހަކަބީއާ ސުވާލުކޮށްފައެވެ.

އެ ސުވާލުގެ ޖަވާބުގައި ހަކަބީ ވިދާޅުވީ، "އެ ހުރިހާ ބިމެއް އެމީހުން (އިޒްރޭލުން) އަތުލިޔަސް މައްސަލައެއް ނެތް" ކަމަށެވެ.

ނަމަވެސް، އެކަމާ ގުޅޭގޮތުން އިތުރަށް ސުވާލުކުރުމުން އޭނާ ވިދާޅުވީ، އިޒްރޭލުން އެ ހުރިހާ ބިމެއް ހޯދަން "އެދެމުން ނުދާ" ކަމަށެވެ. އޭނާ އަށް އެވާހަކަ ދެއްކެވުނީ ތަންކޮޅެއް ބޮޑުކޮށްލައިގެން ކަމަށް ވިދާޅުވި އެވެ.

އިސްލާމީ ގައުމުތަކުގެ ޚާރިޖީ ވުޒާރާތަކުން ނެރުނު ބަޔާނުގައި ބަޔާންކޮށްފައިވަނީ، ހަކަބީގެ މި ވާހަކަތަކަކީ އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ ތަސައްވުރާއި، ޣައްޒާގެ ހަނގުރާމަ ހުއްޓާލުމަށް އެކުލަވާލާފައިވާ ފުރިހަމަ ޕްލޭނާ ސީދާ ފުށުއަރާ ވާހަކަތަކެއް ކަމަށެވެ. އެ ޕްލޭނަކީ މަސްރަހު ފިނިކޮށް، ފަލަސްތީނުގެ މިނިވަން ދައުލަތެއް ގާއިމުކުރުން ކަށަވަރުކޮށްދޭ ސިޔާސީ ހައްލެއް ހޯދުމުގެ މައްޗަށް ބިނާވެފައިވާ ޕްލޭނެއްކަން އެ ބަޔާނުގައި ފާހަގަކޮށްފައިވެއެވެ. އަދި އެ ޕްލޭނުގެ އަސާސަކީ އެކަކު އަނެކަކަށް އިހުތިރާމްކުރުމާއި ސުލްހަވެރިކަމާއެކު އުޅުން ކަމަށްވާއިރު، އެހެން ބައެއްގެ ބިންތަކުގެ މައްޗަށް ބާރު ފޯރުވުމަކީ ސައްހަ ކަމެއްގެ ގޮތުގައި ދެއްކުމަށް ކުރާ މަސައްކަތްތަކުގެ ސަބަބުން، ސުލްހައިގެ މަސައްކަތްތަކަށް ހުރަސްއެޅި، މަސްރަހު ނުތަނަވަސްވެ، ފިތުނަވެރިކަން އިތުރުވާނެ ކަމަށްވެސް އެ ބަޔާނުގައިވެއެވެ.

ޚާރިޖީ ވުޒާރާތަކުން ބާރުއަޅައި ބުނެފައިވަނީ، "ހިފާފައިވާ ފަލަސްތީނުގެ ބިންތަކުގެ މައްޗަށް ނުވަތަ އަރަބިންގެ އެހެން އެއްވެސް ބިމެއްގެ މައްޗަށް އިޒްރޭލުގެ އެއްވެސް ސިޔާދަތީ ބާރެއް ނެތް" ކަމަށެވެ.

މީގެ އިތުރުން، ހުޅަނގު އައްސޭރީގެ ބިންތައް އިޒްރޭލުގެ ބައެއްގެ ގޮތުގައި ހެދުމަށް ނުވަތަ އެ ބިން ޣައްޒާއާ ވަކިކުރުމަށް ކުރާ ކޮންމެ މަސައްކަތަކާ ދެކޮޅުކަން ތަކުރާރުކޮށް، ފަލަސްތީނުގެ ބިންތަކުގައި ޔަހޫދީ އާބާދީތައް ފުޅާކުރުމާއި، އަރަބި ގައުމުތަކުގެ ސިޔާދަތަށް ނުރައްކާވާ ފަދަ އެއްވެސް އަމަލެއް ބަލައިނުގަންނާނެ ކަމަށްވެސް އެ ގައުމުތަކުން ވަނީ ބުނެފައެވެ.

އިޒްރޭލުން ގެންގުޅޭ ބިން ފޭރުމުގެ ސިޔާސަތުތަކާއި ގާނޫނާ ޚިލާފު ފިޔަވަޅުތަކުގެ ސަބަބުން، ސަރަހައްދުގައި ހަމަނުޖެހުމާއި ކޮންފްލިކްޓް އިތުރަށް ގޯސްވެ، ސުލްހައިގެ ފުރުސަތުތައް ގެއްލިގެންދާނެ ކަމުގެ އިންޒާރު ދެމުން، މިފަދަ ފިތުނަވެރި ވާހަކަތައް ދެއްކުން ހުއްޓާލުމަށް އެ ގައުމުތަކުން ވަނީ ގޮވާލާފައެވެ.