ވާހަކަ ދައްކާ ކޮންމެ ފަހަރަކު ލަޕޯޓާ ހަދަނީ ދޮގު: ވިކްޓާ ފޮންޓް

ވާހަކަ ދައްކާ ކޮންމެ ފަހަރަކު ބާސެލޯނާގެ ރައީސް ޖޯން ލަޕޯޓާ ދޮގު ހައްދަވާ ކަމަށް ބުނެ، ލަޕޯޓާއާ ވާދަވެރި ކެންޑިޑޭޓް ވިކްޓާ ފޮންޓް ވަރުގަދަ ރައްދެއް ދެއްވައިފި އެވެ.

މިއަހަރުގެ މާޗު މަހުގެ 15 ވަނަ ދުވަހު އޮންނަ ބާސެލޯނާގެ އިންތިޚާބުގައި ވާދަކުރައްވާކަން ލަޕޯޓާ އާއި، ފޮންޓް ވެސް ވަނީ އިއުލާން ކުރައްވައިފަ އެވެ. އެންމެ ފަހުން 2021 ވަނަ އަހަރު އޮތް އިންތިޚާބުގައި ވެސް މި ދެ ބޭފުޅުން ވާދަ ކުރެއްވިއިރު، ފޮންޓް ބަލިކޮށް އިންތިޚާބު ކާމިޔާބު ކުރެއްވީ ލަޕޯޓާ އެވެ. 

އަލުން ބާސެލޯނާގެ ރައީސް ކަމުގެ ދައުރަކަށް ވާދަ ކުރައްވާ ލަޕޯޓާ ވަނީ، އިންތިޚާބަށް ފުރުސަތު ދިނުމުގެ ގޮތުން ބާސެލޯނާގެ ރައީސް ކަމުގެ މަގާމުން އިސްތިއުފާ ވެސް ދެއްވައިފަ އެވެ. އިންތިޚާބާ ގުޅޭ ގޮތުން ލަޕޯޓާ ވިދާޅުވެފައި ވަނީ، ބާސެލޯނާ އަކީ މާލީ ގޮތުން ރަނގަޅު ކުލަބަކަށް ހެދިފައިވާ ކަމަށާއި، ކުޅިވަރުގެ މައިދާނުގައި ވެސް ގިނަ ކާމިޔާބީ ތަކެއް ހޯދިފައިވާ ކަމަށެވެ. 

ތިން ދައުރެއް ހޯދުމަށް ލަޕޯޓާ އިންތިޚާބުގައި ވާދަ ކުރައްވާއިރު، ފޮންޓް ގެންދަވަނީ ލަޕޯޓާގެ ސިޔާސަތު ތަކަށް ވަރަށް ބޮޑަށް ފާޑު ވިދާޅުވަމުންނެވެ. އެގޮތުން ލަޕޯޓާއާ އެކު ބާސެލޯނާ އިން ބޭނުންވާ ކާމިޔާބީތައް ނުހޯދޭނެ ކަމަށާއި، އޭނާ އަކީ ބާސެލޯނާގެ ރައީސް ކަމަށް އެކަށީގެންވާ މީހާ ނޫން ކަމަށް އެކި ފަހަރު މަތިން ފޮންޓް ވިދާޅުވެފައިވެ އެވެ.

ލަޕޯޓާ މީގެ ކުރިން ވެފައިވާ ވައުދުތަކާއި، ބާސެލޯނާ އަށް ކޮށްދޭނެ ކަމަށް ބުނާ ކަންކަމަށް އިޝާރާތްކޮށް ފޮންޓް ވިދާޅުވީ، ވާހަކަ ދައްކާ ކޮންމެ ފަހަރަކު ލަޕޯޓާ ހަދަނީ ދޮގު ކަމަށެވެ. އެގޮތުން "އަނގަ ހުޅުވާ ކޮންމެ ފަހަރަކު" ލަޕޯޓާ ދޮގު ހަދާ ކަމަށާއި، އޭނާ އަކީ ދޮގު ހަދާ މީހެއް ކަމަށް ވިދާޅުވެ ފޮންޓް ވަނީ ލަޕޯޓާ އަށް ވަރަށް ބޮޑަށް ފާޑު ވިދާޅުވެފަ އެވެ.

ބާސެލޯނާގެ ރައީސް ކަމުގެ ދެ ވަނަ ދައުރަކަށް ލަޕޯޓާ އިންތިޚާބުވެފައި ވަނީ، އޭނާގެ ކުރިން މަގާމުގައި ހުންނެވި ޖޯސެޕް މާރިއާ ބާޓޮމިއު އަށް އަމާޒުވަމުން ދިޔަ ފާޑު ކިޔުންތަކާއި، ޕްރެޝަރުގެ ސަބަބުން އޭނާ އިސްތިއުފާ ދެއްވުމާ ގުޅިގެންނެވެ. އެ އިންތިޚާބުގައި ލަޕޯޓާއާ ވާދަ ކުރެއްވީ ވެސް ފޮންޓް އެވެ. ނަމަވެސް، އޭނާ އަށް ލިބިފައި ވަނީ އެންމެ 30 އިންސައްތަ ވޯޓެވެ.