އިންތިޚާބުގައި ވާދަ ކުރާތީ ބާސެލޯނާގެ ރައީސް ލަޕޯޓާ އިސްތިއުފާ ދެއްވައިފި

މިއަހަރު އޮންނަ ބާސެލޯނާގެ އިންތިޚާބުގައި އިތުރު ދައުރަކަށް ވާދަ ކުރަން ނިންމާފައިވާތީ، އިންތިޚާބަށް ޖާގަ ދިނުމުގެ ގޮތުން ބާސެލޯނާގެ ރައީސް ޖޯން ލަޕޯޓާ އިސްތިއުފާ ދެއްވައިފި އެވެ. 

ބާސެލޯނާގެ ޤަވާއިދުގައި ބުނެފައިވާ ގޮތުން، ރައީސް ކަމުގެ އިތުރު ދައުރެއް ހޯދުމަށް އިންތިޚާބުގައި ވާދަ ކުރާ ނަމަ، މަގާމުން އިސްތިއުފާ ދެއްވަން ޖެހޭނެ އެވެ. ހޯމަ ދުވަހު ލަޕޯޓާ އިސްތިއުފާ ދެއްވުމާ އެކު، ބާސެލޯނާ އިން ވަނީ ރަސްމީކޮށް އިންތިޚާބުގެ މަސައްކަތް ފަށައިފަ އެވެ. ބާސެލޯނާގެ ބޯޑުގެ ބައްދަލުވުމުން ލަޕޯޓޯގެ އިސްތިއުފާ ޤަބޫލު ކޮށްފައިވާއިރު، މިހާރު އޭނާ އަށް އިންތިޚާބުގެ ކެމްޕެއިން ކުރިއަށް ގެންދެވޭނެ އެވެ. 

ރައީސް ކަމުގެ މަގާމުން ލަޕޯޓާ އިސްތިއުފާ ދެއްވުމާ އެކު، ބާސެލޯނާގެ ވަގުތީ ރައީސްގެ ޒިންމާ ނަގާނީ ނައިބު ރައީސް ރަފާ ޔޫސްޓޭ އެވެ. އެގޮތުން ޖޫން މަހުގެ 30 ވަނަ ދުވަހު ދައުރު ހަމަވުމާ ހަަމައަށް، އޭނާ ވަގުތީ ރައީސްގެ ޒިންމާ ނަންގަވާނެ އެވެ. މިހާތަނަށް ޔޫސްޓޭ ހުންނެވީ ބާސެލޯނާގެ ނައިބު ރައީސް ކަމުގެ އިތުރުން، ކުޅިވަރު ޑިޕާޓްމަންޓުގެ އިސްވެރިޔާގެ ގޮތުގަ އެވެ. 

އިންތިޚާބުގައި ވާދަ ކުރާ ކޮންމެ ކެންޑިޑޭޓަކު ވެސް، 2337 މެމްބަރުންގެ ޞައްޙަ ސޮއި ހޯދަން ޖެހެ އެވެ. އާންމު މެޗު ބާސެލޯނާ އިން މެޗު ކުޅޭ ދުވަސް ތަކަކީ ކެންޑިޑޭޓުން ތާއީދު ހޯދުމަށް މަސައްކަތް ކުރާ ދުވަސް ތަކެކެވެ. ކެންޑިޑޭޓުންގެ ނަންތައް ތަރުތީބު ކުރުމަށް ބާސެލޯނާ އިން ކަނޑައަޅާފައިވާ ތާރީޚަކީ މާޗު މަހުގެ ތިން ވަނަ ދުވަހުން، ފަސް ވަނަ ދުވަހަށެވެ. އަދި ރަސްމީކޮށް ކެމްޕެއިން ކުރުމަށް ދީފައި ވަނީ މާޗު މަހުގެ ހަ ވަނަ ދުވަހުން، 13 ވަނަ ދުވަހަށެވެ. އެއަށް ފަހު، އިންތިޚާބު އޮންނާނީ މާޗު މަހުގެ 15 ވަނަ ދުވަހު އެވެ. 

މީގެ ކުރިން 2021 ވަނަ އަހަރު އޮތް އިންތިޚާބުގައި ޕޯސްޓުން ވޯޓު ލުމުގެ ފުރުސަތު ދިން ނަމަވެސް، މިފަހަރުގެ އިންތިޚާބުގައި އެ ފުރުސަތެއް ނުދޭނެ އެވެ. އޭގެ ބަދަލުގައި ބާސެލޯނާ އިން ނިންމާފައި ވަނީ، ހަމައެކަނި ސީދާ ވޯޓުލާ ގޮތަށެވެ. މިއަހަރުގެ އިންތިޚާބުގައި ވޯޓު ލުމަށް ބާސެލޯނާ އިން ވަނީ ފަސް ތަނެއް ކަނޑައަޅައިފަ އެވެ. އެގޮތުން ބާސެލޯނާގެ އަމިއްލަ ދަނޑު  ކޭމްޕް ނޯ އާއި، ލެއިޑާ، ޓާރަގޯނާ، ހިރޯނާ އަދި އެންޑޯރާގައި ވޯޓުލުން ކުރިއަށް ގެންދާނެ އެވެ.

އިންތިޚާބުގައި ވާދަ ކުރުމަށް އިސްތިއުފާ ދެއްވުމަށް ފަހު ވާހަކަ ދައްކަވަމުން ލަޕޯޓާ ވިދާޅުވެފައި ވަނީ، ބާސެލޯނާ ސަލާމަތްކޮށް، މާލީ ގޮތުން ކުލަބުގެ ޙާލަތު ރަނގަޅު ކުރެވިފައިވާ ކަމަށެވެ. ބާސެލޯނާ އަށް ވަރަށް ގިނަ ކާމިޔާބީ ތަކެއް ހޯދިއްޖެ ކަމަށާއި، ކުޅިވަރުގެ ގޮތުން ވެސް މިއީ ކުލަބަށް ވަރަށް ރަނގަޅު ވަގުތެއް ކަމަށް އޭނާ ވިދާޅުވި އެވެ. އަދި ބާސެލޯނާގެ މުޅި ބޯޑަށް ވެސް އޮތް ހިތްހަމަ ޖެހުމަކީ، ކުލަބުގެ ސަޕޯޓަރުން އުފާވެފައި ތިބުން ކަމަށް ލަޕޯޓާ ވިދާޅުވި އެވެ. 

ބާސެލޯނާގެ ރައީސް ކަމުގެ ތިން ވަަނަ ދައުރެއް ހޯއްދެވުމަށް ލަޕޯޓާ ވާދަ ކުރައްވާއިރު، އޭނާއާ ވާދަ ކުރާނެ ކަމަށް ބެލެވެނީ 2021 ވަނަ އަހަރުގެ އިންތިޚާބުގައި ވެސް ވާދަ ކުރެއްވި ވިކްޓާ ފޮންޓް އެވެ. 2021 ވަނަ އަހަރުގެ އިންތިޚާބުގައި ލަޕޯޓާއާ ވާދަކުރައްވައި އޭނާ އަށް ލިބުނީ 30 އިންސައްތަ ވޯޓެވެ.