ބާސެލޯނާގެ ކުޅުމާ މެދު ފްލިކް ހިތްހަމަ ޖެހޭ، މަޑު ޖެހުމެއް ނެތް

ސްޕެނިޝް ކޮޕާ ޑެލް ރޭގެ ކުއާޓާ ފައިނަލްގައި އަލްބަސެންޓޭއާ ދެކޮޅަށް ބާސެލޯނާގެ ކުޅުންތެރިން ދެއްކި ކުޅުމާ މެދު ހިތްހަމަ ޖެހޭ ކަމަށް، އެ ޓީމަށް އިރުޝާދު ދެމުން އަންނަ ހަންސީ ފްލިކް ބުނެފި އެވެ. 

އަލްބަސެންޓޭއާ ދެކޮޅަށް ކުޅުނު މެޗުން މޮޅުވެ، ބާސެލޯނާ އިން ވަނީ މުބާރާތުގެ ސެމީ ފައިނަލްގެ ފުރުސަތު ހޯދައިފަ އެވެ. އެ މެޗަަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފްލިކް ބުނީ، އެއީ ޓަފް މެޗެއް ކަމަށާއި، އެހެން ނަމަވެސް ބާސެލޯނާގެ ކުޅުންތެރިން ރަނގަޅު މެސެޖެއް ދީފައިވާ ކަމަށެވެ.

މެޗުގައި ބާސެލޯނާގެ ކުޅުންތެރިން ވަރަށް ރަނގަޅު ކުޅުމެއް ދެއްކިކަން ފާހަގަކޮށް ފްލިކް ބުނީ، މެޗުގެ ފުރަތަމަ ހާފުގައި ބާސެލޯނާ އަށް ވަރަށް ގިނަ ފުރުސަތު ލިބުނު ކަމަށެވެ. ޚާއްސަކޮށް ލަނޑު ޖަހަން ވަރަށް ސާފު ފުރުސަތު ތަކެއް ލިބުނު ކަމަށް ފްލިކް ބުންޏެވެ. އެއާ އެކު، ކޮންމެ ތިން ދުވަހަކު މެޗެއް ކުޅެން ޖެހޭ ކަމަށާއި، ޓީމުން ދައްކަމުން އަންނަ ކުޅުމާ މެދު ފަޚުރުވެރިވާ ކަމަށް އޭނާ ބުންޏެވެ.

ހަމަ އެހެންމެ މެޗުގެ އެންމެ ފަހު ވަގުތާ ޖެހެންދެން ވެސް ބާސެލޯނާގެ ކުޅުންތެރިން ހިތްވަރާ އެކު މަސައްކަތް ކުރި ކަމަށް ފްލިކް ވަނީ ބުނެފަ އެވެ. ހުރިހާ ކުޅުންތެރިންގެ ފަރާތުން ވެސް ފެނުނު ހިތްވަރާއި، ކުޅުންތެރިންގެ މަސައްކަތް ފާހަގަ ކުރަން ބޭނުންވާ ކަމަށާއި، އެ ކަހަލަ މެޗު ތަކުގައި އޮތް ހަމައެކަނި ޗޮއިސް އަކީ މޮޅުވުން ކަމަށް ފްލިކް ބުންޏެވެ. 

ކޮޕާ ޑެލް ރޭގެ ސެމީ ފައިނަލް އިން ބާސެލޯނާ އަށް ޖާގަ ލިބުމަކީ އުފަލެއް ކަަމަށާއި، ނަަމަވެސް މަސައްކަތް ނިމުނީ ނޫން ކަމަށް ފްލިކް ބުންޏެވެ. އޭނާ ބުނީ ދެން ފޯކަސް ކުރަން ޖެހޭނީ ކުރިއަށް ހުރި މެޗު ތަކަށް ކަމަށާއި، ބާސެލޯނާ އަށް ސްޕެނިޝް ލީގާއި، ޔުއެފާ ޗެމްޕިއަންސް ލީގުގައި ވެސް މުހިންމު މެޗު ތަކެއް ހުރި ކަމަށް އޭނާ ބުންޏެވެ.

މޮޅާ އެކު ބާސެލޯނާ އިން މުބާރާތުގެ ސެމީ ފައިނަލްގެ ޖާާގަ ހޯދިއިރު، އެ ޓީމަކީ މުބާރާތުގެ އެންމެ ފަހުގެ ޗެމްޕިއަނުންނެވެ. މިހާތަނަށް ޖުމުލަ 32 ފަހަރު ބާސެލޯނާ އިން އެ މުބާރާތް ކާމިޔާބު ކޮށްފައިވާއިރު، ބާސެލޯނާ އަކީ އެންމެ ގިނައިން މުބާރާތް ކާމިޔާބު ކޮށްފައިވާ ޓީމެވެ.