ޖިރޯނާ އަތުން ބަލިވެ ބާސެލޯނާ އަށް އެއް ވަނަ މަގާމު ގެއްލި، ރެއާލް އަށް ލީޑު ލިބިއްޖެ

ސްޕެނިޝް ލީގުގައި ޖިރޯނާއާ ދެކޮޅަށް ކުޅުނު މެޗުން ބަލިވެ، އެއް ވަނައިގައި ލީޑު ނަގަން ލިބުނު ފުރުސަތު އެންމެ ފަހުގެ ޗެމްޕިއަން ބާސެލޯނާ އިން ނަގާލައިފި އެވެ. 

ހޯމަ ދުވަހުގެ ރޭ ދަންވަރު ޖިރޯނާގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 2-1 އިން ބާސެލޯނާ ބަލިކޮށްފަ އެވެ. މެޗުގައި ފުރަތަމަ ލަނޑު ޖަަހައި ލީޑު ނެގީ ވެސް ބާސެލޯނާ އިންނެވެ. ނަމަވެސް، ޖިރޯނާ އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ ފަހު ވަގުތުގައި ބާސެލޯނާ އަށް ވަނީ ލީޑު ނަގަން ރަނުގެ ފުރުސަތެއް ލިބިފަ އެވެ. ބާސެލޯނާ އަށް ލިބުނު ޕެނަލްޓީ ސްޕެއިންގެ ޒުވާން ކުޅުންތެރިޔާ ލަމީން ޔަމާލް ފޮނުވާލި ނަމަވެސް، އެ ޕެނަލްޓީ އަމާޒުވީ ގޯލުގެ އަރިމަތީ ދަނޑިއާ އެވެ. 

މެޗުގެ ދެ ވަނަ ހާފު ފަށައިގެން ސާދަ ވަނަ މިނެޓުގައި ބާސެލޯނާ އަށް ލީޑު ނަގައިދިނީ ޕައު ސުބާސީ އެވެ. އެއީ ޖޫލްސް ކޫންޑޭ ތަނަވަސްކޮށްދިން ފުރުސަތެއްގައި ސުބާސީ ޖެހި ލަނޑެކެވެ. އޭގެ ފަހުން މެޗުގެ 61 ވަނަ މިނެޓުގައި ޖިރޯނާ އަށް ނަތީޖާ ހަމަހަމަ ކޮށްދިނީ ތޯމަސް ލެމާ އެވެ. އަދި މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް ޖިރޯނާ މޮޅުވީ ފްރާން ބެލްޓްރަން ޖެހި ލަނޑުންނެވެ.

މެޗުން މޮޅުވެ އެއް ވަނައިގައި ލީޑު ފުޅާ ކުރުމުގެ ފުރުސަތު ބާސެލޯނާ އަށް އޮތް ނަމަވެސް، ބައްޔާ އެކު ވަނީ އެއް ވަނަ މަގާމު ގެއްލިފަ އެވެ. މިހާތަނަށް ކުޅެފައިވާ 24 މެޗުން 58 ޕޮއިންޓާ އެކު ބާސެލޯނާ އޮތީ ދެ ވަނައިގައި އެވެ. ހަމަ އެ އަދަދަށް މެޗު ކުޅެގެން އެއް ވަަނައިގައި ވާދަވެރި ރެއާލް މެޑްރިޑް އަށް ލިބެނީ 60 ޕޮއިންޓެވެ.