ޔަމާލްގެ ލަނޑުން މޮޅުވެ، ބާސެލޯނާ ސެމީ ފައިނަލް އަށް

ސްޕެނިޝް ކޮޕާ ޑެލް ރޭގެ ކުއާޓާ ފައިނަލްގައި އަލްބަސެންޓޭއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން މުބާރާތުގެ ސެމީ ފައިނަލް އިން ޖާގަ ހޯދައިފި އެވެ.

އަންގާރަ ދުވަހުގެ ރޭ އަލްބަސެންޓޭއާ ދެކޮޅަށް ކުޅުނު ކުއާޓާ ފައިނަލްގެ މެޗު ބާސެލޯނާ އިން ކާމިޔާބު ކުރީ 2-1 އިންނެވެ. މެޗުގައި ބާސެލޯނާ އިން ދެ ލަނޑު ޖަހާފައި ވަނިކޮށް، އަލްބަސެންޓޭ އިން ވަނީ އެ ޓީމުގެ ހަމައެކަނި ލަނޑު ޖަހައިފަ އެވެ.

މެޗު ފަށައިގެން ބާސެލޯނާ އިން ރަނގަޅަށް ކުޅެމުން ދިޔައިރު، ފުރަތަމަ ހާފުގައި އެ ޓީމުން ވަނީ ލީޑު ނަގައިފަ އެވެ. އެގޮތުން ފުރަތަމަ ހާފުގެ 39 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ސްޕެއިންގެ ޒުވާން ކުޅުންތެރިޔާ ލަމީން ޔަމާލް އެވެ. އެ ލަނޑު ޖަހަން ޔަމާލް އަށް ފުރުސަތު ތަނަވަސްކޮށްދިނީ ފްރެންކީ ޑި ޔޯން އެވެ.

އޭގެ ފަހުން މެޗުގެ ދެ ވަނަ ހާފު ފަށައިގެން ކުރީ ކޮޅު ބާސެލޯނާ އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. ދެ ވަނަ ހާފު ފަށައިގެން އެގާރަ ވަނަ މިނެޓުގައި ބާސެލޯނާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ރޮނާލްޑް އަރައުހޯ އެވެ. އެއީ މާކަސް ރަޝްފޯޑު ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، އަލްބަސެންޓޭގެ ހަމައެކަނި ލަނޑު ޖެހީ ހަވީ މޮރޭނޯ އެވެ. އޭގެ ފަހުން ބާސެލޯނާގެ ފެރާން ޓޮރޭސް ތިން ވަނަ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ.

މޮޅާ އެކު ބާސެލޯނާ އިން މުބާރާތުގެ ސެމީ ފައިނަލްގެ ޖާާގަ ހޯދިއިރު، އެ ޓީމަކީ މުބާރާތުގެ އެންމެ ފަހުގެ ޗެމްޕިއަނުންނެވެ. މިހާތަނަށް ޖުމުލަ 32 ފަހަރު ބާސެލޯނާ އިން އެ މުބާރާތް ކާމިޔާބު ކޮށްފައިވާއިރު، ބާސެލޯނާ އަކީ އެންމެ ގިނައިން މުބާރާތް ކާމިޔާބު ކޮށްފައިވާ ޓީމެވެ.