ބާސެލޯނާގެ އިންތިޚާބު މާޗު 15 ގައި، ލަޕޯޓާ ވާދަ ކުރައްވާނެ
މި އަހަރު އޮންނަ އިންތިޚާބުގައި މިހާރު ދެ ވަނަ ދައުރު ފުރިހަމަ ކުރައްވަމުން ގެންދަވާ ލަޕޯޓާ ވާދަ ކުރައްވާނެ. ތިން ވަަނަ ދައުރެއް ހޯއްދެވުމަށް ލަޕޯޓާ ވާދަ ކުރައްވާއިރު، އޭނާއާ ވާދަ ކުރާނެ ކަމަށް ބެލެވެނީ 2021 ވަނަ އަހަރުގެ އިންތިޚާބުގައި ވެސް ވާދަ ކުރެއްވި ވިކްޓާ ފޮންޓް.
ބާސެލޯނާގެ ރައީސް ޖޯން ލަޕޯޓާ | ރޮއިޓާސް
ސްޕެއިންގެ އެންމެ މަޝްހޫރު އެއް ފުޓުބޯޅަ ކުލަބު ކަމަށްވާ، ބާސެލޯނާގެ އައު ރައީސް އަކު ހޮވުމަށް ބާއްވާ އިންތިޚާބު މިއަހަރުގެ މާޗު މަހުގެ ތެރޭގައި ބާއްވަން ނިންމައިފި އެވެ.
ބާސެލޯނާ އިން ނިންމާފައި ވަނީ މާޗު މަހުގެ 15 ވަނަ ދުވަހު އެ ކުލަބުގެ އިންތިޚާބު ބޭއްވުމަށެވެ. އެއާ އެކު ބާސެލޯނާ އިން ބުނެފައި ވަނީ، ކުރިއަށް އޮތް ދުވަސް ތަކުގެ ތެރޭގައި އިންތިޚާބާ ގުޅޭ ރަސްމީ އެންގުންތައް އަންގަމުން ގެންދާނެ ކަމަށެވެ. އެގޮތުން އިންތިޚާބު ކުރިއަށް ދާނެ ގޮތުގެ ތާވަލް އާއި، އިންތިޚާބުގެ ވޯޓު ލުމުގެ ކަންކަން އިންތިޒާމުވެފައިވާ ގޮތުގެ ތަފްސީލުތައް ވެސް ހާމަ ކުރާނެ އެވެ.
އާންމު ގޮތެއްގައި ބާސެލޯނާގެ އިންތިޚާބު ބާއްވަނީ އެ ކުލަބުގެ އަމިއްލަ ދަނޑުގައި މެޗެއް ކުޅޭ ދުވަހަކާ ދިމާކޮށެވެ. އެއީ ވޯޓު ލުމުގެ ހައްގު ލިބިގެންވާ ކުލަބުގެ މެމްބަރުން މެޗު ބަލަން ދަނޑަށް އަންނަ ވަގުތު، ވޯޓު ލުމުގެ ފުރުސަތު ފަހި ކޮށްދިނުމުގެ ގޮތުންނެވެ. މިފަހަރުގެ އިންތިޚާބު ވެސް ކުރިއަށް ގެންދާނީ އެ އުސޫލުން ކަމަށް ރިޕޯޓުތައް ބުނެ އެވެ. އިންތިޚާބު އޮންނަ ހަފުތާގައި ކޭމްޕް ނޯގައި ބާސެލޯނާ އިން ނިކުންނާނީ ސެވިއްޔާއާ ދެކޮޅަށެވެ.
ބާސެލޯނާ ރައީސް ކަމުގެ މަގާމުގައި މިހާރު ހުންނެވި ޖޯން ލަޕޯޓާ އެ މަގާމަށް އިންތިޚާބުވެފައި ވަނީ 2021 ވަނަ އަހަރު އެވެ. އެއީ އޭނާގެ ކުރިން ރައީސް ކަމުގެ މަގާމުގައި ހުންނެވި ޖޯސެޕް މާރިއާ ބާޓޮމިއު އަށް އަމާޒުވަމުން ދިޔަ ފާޑު ކިޔުންތަކާއި، ޕްރެޝަރުގެ ސަބަބުން އޭނާ އިސްތިއުފާ ދެއްވުމާ ގުޅިގެންނެވެ. އޭގެ ފަހުން އޮތް އިންތިޚާބު ކާމިޔާބުކޮށް ބާސެލޯނާގެ ރައީސް ކަމަށް ވަޑައިގެންނެވި ލަޕޯޓާ ވަނީ ކުލަބުގެ މާލީ ޙާލަތު ރަނގަޅު ކުރުމަށާއި، އަމިއްލަ ދަނޑު މަރާމާތު ކުރުމަށް ޚާއްސަ އިސްކަމެއް ދެއްވައިފަ އެވެ.
އަމިއްލަ ދަނޑު މަރާމާތު ކުރުމުގެ މަސައްކަތް ކުރިއަށް ގެންދިޔުމަށްޓަކައި ބާސެލޯނާ އިން ވަނީ ގާތް ގަނޑަކަށް ދެ އަހަރާ ބައިގެ މުއްދަތެއް ވަންދެން އޮލިމްޕިކް ސްޓޭޑިއަމްގައި ހޯމް މެޗުތައް ކުޅެފަ އެވެ. އޭގެ ފަހުން ކޭމްޕް ނޯ މަރާމާތު ކުރުމަށް ފަހު، 2025 ވަނަ އަހަރުގެ ނޮވެމްބަރު މަހުގެ ތެރޭގައި ވަނީ އަލުން އެނބުރި އެ ދަނޑަށް މެޗުތައް ބަދަލު ކޮށްފަ އެވެ.
މި އަހަރު އޮންނަ އިންތިޚާބުގައި މިހާރު ދެ ވަނަ ދައުރު ފުރިހަމަ ކުރައްވަމުން ގެންދަވާ ލަޕޯޓާ ވާދަ ކުރައްވާނެ އެވެ. ތިން ވަަނަ ދައުރެއް ހޯއްދެވުމަށް ލަޕޯޓާ ވާދަ ކުރައްވާއިރު، އޭނާއާ ވާދަ ކުރާނެ ކަމަށް ބެލެވެނީ 2021 ވަނަ އަހަރުގެ އިންތިޚާބުގައި ވެސް ވާދަ ކުރެއްވި ވިކްޓާ ފޮންޓް އެވެ. 2021 ވަނަ އަހަރުގެ އިންތިޚާބުގައި ލަޕޯޓާއާ ވާދަކުރައްވައި އޭނާ އަށް ލިބުނީ 30 އިންސައްތަ ވޯޓެވެ.
