އެލްޗޭ ބަލިކޮށް، ބާސެލޯނާ އަށް ހަތަރު ޕޮއިންޓުގެ ލީޑެއް

ސްޕެނިޝް ލީގުގައި އެލްޗޭއާ ދެކޮޅަަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން އެއް ވަނައިގައި ހަތަރު ޕޮއިންޓުގެ ލީޑެއް ނަގައިފި އެވެ.

އެލްޗޭގެ އަމިއްލަ ދަނޑުގައި އެ ޓީމާ ދެކޮޅަށް ކުޅުނު މެޗު ބާސެލޯނާ އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން ލަނޑު ޖަހައި ލީޑު ނަގާފައި ވަނިކޮށް، އެލްޗޭ އިން ނަތީޖާ ހަމަހަމަ ވެސް ކުރި އެވެ. ނަމަވެސް، އިތުރު ދެ ލަނޑު ޖަހައިގެން ބާސެލޯނާ ވަނީ މެޗުން މޮޅުވެފަ އެވެ.

މެޗު ފަށައިގެން ހަ ވަނަ މިނެޓުގައި ބާސެލޯނާ އަށް ލީޑު ނަގައިދިނީ ސްޕެއިންގެ ޒުވާން ކުޅުންތެރިޔާ ލަމީން ޔަމާލް އެވެ. އެއީ ޑެނީ އޮލްމޯ ތަނަވަސްކޮށްދިން ފުރުސަތެއްގައި ޔަމާލް ޖެހި ލަނޑެކެވެ. އޭގެ ފަހުން މެޗުގެ 29 ވަނަ މިނެޓުގައި އަލްވާރޯ ރޮޑްރިގޭޒް ވަނީ ލަނޑު ޖަހައި އެލްޗޭ އަށް ނަތީޖާ ހަމަހަމަ ކޮށްދީފަ އެވެ.

މެޗުގެ ފުރަތަމަ ހާފު ނިމެން ވެފައި ވަނިކޮށް ދެ ވަނަ ފަަހަރަށް ބާސެލޯނާ އަށް ލީޑު ނަގައިދިނީ ފެރާން ޓޮރޭސް އެވެ. އެ ލަނޑު ޖަހަން ޓޮރޭސް އަށް ފުރުސަތު ތަނަވަސްކޮށްދިނީ ފްރެންކީ ޑި ޔޯން އެވެ. މެޗުގެ ދެ ވަނަ ހާފުގައި ބާސެލޯނާގެ ތިން ވަނަ ލަނޑު ޖަހައި ލީޑު އިތުރަށް ފުޅާ ކުރީ މާކަސް ރަޝްފޯޑު އެވެ.

މޮޅާއެކު ބާސެލޯނާ އިން އެއް ވަަނައިގައި އޮތީ މިހާތަނަށް ކުޅެފައިވާ 22 މެޗުން 55 ޕޮއިންޓާ އެކު އެވެ. ބާސެލޯނާ އަށް ވުރެ އެއް މެޗު މަދުން ކުޅެގެން ދެ ވަަނައިގައި ރެއާލް މެޑްރިޑަށް 51 ޕޮއިންޓު ލިބޭއިރު، މެޗުގެ އަދަދު ހަމަކޮށް ރެއާލް އަށް ފަރަގު ކުޑަ ކުރުމުގެ ފުރުސަތު އޮންނާނެ އެވެ.