މަދޫރޯ ހައްޔަރުކޮށް ވެރިކަން ވައްޓާލި ފަހުން، ފުރަތަމަ ފަހަރަށް ޔޫރަޕުގެ ފްލައިޓެއް ވެނެޒުއެލާ އަށް ޖައްސައިފި

އެމެރިކާގެ އަސްކަރިއްޔާ އިން ހިންގި އޮޕަރޭޝަނެއްގައި ވެނެޒުއެލާގެ ރައީސް ނިކޮލަސް މަދޫރޯ ހައްޔަރުކޮށް، އޭނާގެ ވެރިކަން ވައްޓާލި ފަހުން، ފުރަތަމަ ފަހަރަށް ޔޫރަޕުގެ އެއާލައިނެއްގެ ފްލައިޓެއް އެ ޤައުމަށް ޖައްސައިފި އެވެ. 

ފްލައިޓް ޓްރެކިން މޮނިޓާތަކުން ދައްކާ ގޮތުގައި ވެނެޒުއެލާ އަށް ޖައްސާފައި ވަނީ ސްޕެއިންގެ އެއާލައިނެއްގެ ފްލައިޓެކެވެ، އަންގާރަ ދުވަހުގެ ރޭ ވެނެޒުއެލާގެ ގަޑުން ނުވައެއް ޖެހިއިރު، އެ ޤައުމުގެ ވެރި ރަށް ކަރަކަސްގެ ސައިމަން ބޮލިވާ އިންޓަނޭޝަނަލް އެއާޕޯޓަށް ޖައްސާފައި ވަނީ ސްޕެއިންގެ އެއާ ޔޫރޮޕާގެ ބޯއިން 787-9 ޑްރީމްލައިނާ ފްލައިޓެވެ. 

އެމެރިކާގެ ރައީސް ޑޮނަލްޑް ޓްރަމްޕް ވަނީ، 2025 ވަނަ އަހަރުގެ ނޮވެމްބަރު މަހުގެ ތެރޭގައި، ވެނެޒުއެލާއާ ދެކޮޅަށް އަސްކަރީ ހަމަލާ ތަކެއް ދީފާނެ ކަމުގެ އިންޒާރު ދެއްވައިފަ އެވެ. އެއާ ގުޅިގެން ބައިނަލްއަޤުވާމީ ގިނަ އެއާލައިން ތަކުން ވަނީ ވެނެޒުއެލާ އަށް ކުރަމުން އައި ދަތުރުތައް މެދު ކަނޑާލައިފަ އެވެ. އޭގެ ފަހުން މިއަހަރުގެ ޖަނަވަރީ މަހުގެ ތިން ވަނަ ދުވަހު އެމެރިކާ އިން ވަނީ ވެނެޒުއެލާ އަށް ކުއްލި ހަމަލާ ތަކެއް ދީފަ އެވެ.

އެމެރިކާގެ ރައީސް ޓްރަމްޕްގެ އޯޑަރަކަށް ހިންގި އެ އޮޕަރޭޝަންގައި އެމެރިކާގެ ސިފައިން ވަނީ ވެނެޒުއެލާގެ ރިޔާސީ ގަނޑުވަރަށް ވަދެ، މަދޫރޯ އާއި އޭނާގެ އަނބިކަނބަލުން ހައްޔަރު ކޮށްފަ އެވެ. އެއަށް ފަހު އެމެރިކާގެ ބެލުމުގެ ދަށަށް މަދޫރޯ އާއި އޭނާގެ އަނބިކަނބަލުން ގެނެސް، އެ ދެމަފިރިންގެ މައްޗަށް ވަނީ އެމެރިކާގައި ޝަރީއަތްތައް ފަށައިފަ އެވެ. މަދޫރޯ ހައްޔަރު ކުރުމާ އެކު، އޭނާގެ ނައިބު ރައީސްގެ ގޮތުގައި ހުންނެވި ޑެލްސީ ރޮޑްރިގޭޒް ވަނީ ވެނެޒުއެލާގެ ވަގުތީ ރައީސް ކަމުގެ ހުވާ ކުރައްވައިފަ އެވެ. އޭގެ ފަހުން ޓްރަމްޕް އަންނަނީ ޑެލްސީއާ ގުޅިގެން މަސައްކަތް ކުރަމުންނެވެ. 

މިދިޔަ ޖަނަވަރީ މަހުގެ ފަހު ކޮޅު ޓްރަމްޕް ވަނީ، ވެނެޒުއެލާ އަށް އަލުން ދަތުރުތައް ފެށުމަށް ދުނިޔޭގެ ޤައުމު ތަކަަށް ގޮވާލައްވައިފަ އެވެ. އެ ގޮވާލެއްވުމާ ގުޅިގެން، އެމެރިކާގެ އެއާލައިން ތަކުން ވެނެޒުއެލާ އަށް ދަތުރު ކުރުން މަނާކޮށް، 2019 ވަނަ އަހަރުން ފެށިގެން އަޅާފައި އޮތް ހުރަސްތައް އެމެރިކާގެ ސަރުކާރުން މިހާރު ވަނީ އުވާލައިފަ އެވެ. އޭގެ ބޭނުމަކީ އެމެރިކާގެ އެއާލައިން ތަކުން އެ ޤައުމަށް ދަތުރުތައް ފެށުމަށް ހިތްވަރު ދިނުމެވެ.

އެއާ ޔޫރޮޕާގެ ދަތުރުތައް ފެށި ނަމަވެސް، ސްޕެއިންގެ އަނެއް އެއާލައިން ކަމަށްވާ އިބޭރިއާ އިން ބުނެފައި ވަނީ، ވެނެޒުއެލާ އަށް ދަތުރުތައް ފެށުމުގެ ކުރިން ސަލާމަތީ ކަންކަން ކަށަވަރު ކުރުމަށްޓަކައި ދިރާސާތައް ކުރަމުންދާ ކަމަށެވެ. މީގެ އިތުރުން ޕޯޗުގަލްގެ ޓީއޭޕީ އެއާލައިން އިން ވެސް ވަނީ، ވެނެޒުއެލާ އަށް އަލުން ދަތުރުތައް ފަށާނެ ކަމަށް އިއުލާން ކޮށްފަ އެވެ. 

ސަރަހައްދީ އެހެން އެއާލައިން ތަކަށް ބަލާއިރު، ކޮލަމްބިއާގެ އެވިއަންކާ އަދި ޕެނަމާގެ ކޯޕާ އެއާލައިން އިން މިހާރު ވަނީ ވެނެޒުއެލާ އަށް ކުރާ ދަތުރުތައް ރަސްމީކޮށް ފަށައިފަ އެވެ. މިއީ މަދޫރޯގެ ސަރުކާރު ވެއްޓުމަށް ފަހު، ވެނެޒުއެލާގެ ވައިގެ ދަތުރުފަތުުރުގެ ދާއިރާ އަލުން އާރާސްތުވަމުންދާ ކަމުގެ ނިޝާނެއް ކަމަށް މަސްރަހު ދިރާސާ ކުރާ ފަރާތްތަކުން ދެކެ އެވެ.