ކަނާއަތު ފިޔައިގެ އެކްޓިވިސްޓު މަރުވުމުން ފްރާންސްގައި ބޮޑު މުޒާހަރާ އެއް، މެކްރޮން ގޮވާލެއްވީ ހަމަޖެހުން އިސް ކުރުމަށް

ފްރާންސްގެ ކަނާއަތު ފިޔައިގެ އެކްޓިވިސްޓެއް ކަމަށްވާ ކުއެންޓިން ޑެރަންކް މަރާލުމާ ގުޅިގެން، އެ ޤައުމުގައި އެތައް ހާސް ބަޔަކު އެއްވެ މުޒާހަރާ ކޮށްފި އެވެ.

ފްރާންސްގެ ލިއޯންގައި ހޮނިހިރު ދުވަހު ކުރިއަށް ގެންދިޔަ މުޒާހަރާގައި ވަނީ އެތައް ހާސް ބަޔަކު ބައިވެރިވެފަ އެވެ. އުމުރުން 23 އަހަރުގެ ޑެރަންކް މިދިޔަ ހަފުތާގެ ތެރޭގައި މަރުވެފައި ވަނީ، ވާއަތު ފިޔައިގެ ހަރުކަށި ފިކުރުގެ ބަޔަކު އޭނާ އަށް ދިން ހަމަލާ ތަަކެއްގައި ލިބުނު އަނިޔާ ތަކަށް ފަރުވާ ހޯދަމުން ގެންދަނިކޮށެވެ. 

މުޅި ފްރާންސް އަށް ބޮޑު ސިހުމެއް ގެނުވި މި ހާދިސާއާ ގުޅިގެން ބޭއްވި އިހުތިޖާޖުގައި ގާތް ގަނޑަކަށް 3200 މީހުން ބައިވެރިވެފައިވާ ކަމަށް، ކަމާ ގުޅުން ހުރި އިދާރާ ތަކުން ވަނީ ހާމަ ކޮށްފަ އެވެ. 

މި އިހުތިޖާޖުގައި ބައިވެރިވި މީހުންގެ ތެރެއިން ގިނަ ބަޔަކު ތިބީ މޫނު ނިވާ ކުރުމަށް ސާޖިކަލް މާސްކު އަދި އަވި އައިނު އަޅައިގެންނެވެ. އެ މީހުން ދިޔައީ ކުއެންޓިން އަށް އިންސާފު ހޯދައިދިނުމާއި، ވާއަތު ފިޔައިގެ "އެންޓިފާ" ގްރޫޕް ތަކަކީ ޤާތިލުން ކަމަށް ބުނެ އަޑު އުފުލަމުންނެވެ.

މި މަރުގެ މައްސަލައިގައި މިހާތަަނށް ހަތް މީހެއްގެ މައްޗަށް ތަޙުގީގު ހިންގަމުންދާއިރު، އޭގެ ތެރޭގައި ވާއަތު ފިޔައިގެ "ފްރާންސް އަންބައުޑް" (އެލްއެފްއައި) ޕާޓީގެ ޤާނޫނު ހަދާ މަޖިލީހުގެ މެމްބަރެއްގެ އެހީތެރިޔެއްގެ ގޮތުގައި ކުރިން މަސައްކަތް ކުރި މީހަކު ވެސް ހިމެނެ އެވެ. ނަމަވެސް، އެ ޕާޓީ އިން ވަނީ މަރުގެ މި ހާދިސާ ކުށްވެރި ކޮށްފަ އެވެ. 

މިކަމާ ގުޅިގެން ފްރާންސްގެ ރައީސް އިމަނުއެލް މެކްރޮން ހޮނިހިރު ދުވަހު ގޮވާލައްވާފައި ވަނީ، ހުރިހާ ފަރާތް ތަކަކުން ވެސް މަސްލަޙަތު ހިފެހެއްޓުމަށެވެ. އަދި ހަރުކަށި ފިކުރުގެ ހުރިހާ ޖަމާއަތްތަކާ ގުޅޭ ގޮތުން އަންނަ ހަފުތާގެ ތެރޭގައި ވަޒީރުންނާ އެކު ޚާއްސަ ބައްދަލުވުމެއް ބާއްވަވާނެ ކަމަށް ވެސް މެކްރޮން ވަނީ ވިދާޅުވެފަ އެވެ. 

ފްރާންސްގެ ކުރީގެ ބޮޑު ވަޒީރު ޑޮމިނިކް ޑި ވެލެޕިން މި ހާދިސާ ސިފަ ކުރައްވާފައި ވަނީ، މިދިޔަ އަހަރުގެ ތެރޭގައި ދިން ހަމަލާއެއްގައި މަރާލި އެމެރިކާގެ ކޮންޒަވޭޓިވް އެކްޓިވިސްޓް ޗާލީ ކާކަށް ދިން ހަމަލާއާ އެއް ފަދަ ހަމަލާއެއްގެ ގޮތުގަ އެވެ. އަދި މިއީ ފްރާންސް އަށް ކުރިމަތިވެފައިވާ ވަރަށް ހިތާމަވެރި ވަގުތެއް ކަމަށް ވެެސް ވިދާޅުވެފައިވެ އެވެ. 

ލިޔޯންގެ މޭޔަރު ގްރެގަރީ ޑޫސޭ ވަނީ މި ހިނގާމުން ހުއްޓުވުމަށް މަސައްކަތް ކުރައްވައިފަ އެވެ. އޭނާ ވިދާޅުވި ގޮތުގައި، ޔޫރަޕުގެ އެކި ހިސާބު ތަކުން ކަނާއަތު ފިޔައިގެ ހަރުކަށި ގުރޫޕުތައް އެ ހިނގާލުމަށް ޖަމާވުމަކީ ސަލާމަތީ ގޮތުން އޮތް ބޮޑު ނުރައްކަލެއް ކަމަށެވެ. ހިނގާލުން ކުރިއަށް ދިޔަ ވަގުތު މަގުގެ އެއް ފަރާތުގައި ތިބި މީހުން ވަނީ އެންޓިފާ ގުރޫޕް ތަކަށް ތާއީދުކޮށް އަޑު އުފުލައިފަ އެވެ.