ޓްރަމްޕްގެ "ރަތް ރޮނގު" ތަކަށް އީރާން އިން އަދިވެސް އެއްބަހެއް ނުވޭ: ވޭންސް

އީރާން އާއި އެމެރިކާއާ ދެމެދު ނިއުކްލިއާ މަޝްވަރާތައް ކުރިއަށް ގެންދަމުން އަންނައިރު، ސިޔާސީ ގޮތުން މައްސަލަ ޙައްލު ކުރުމަށް އެމެރިކާގެ ރައީސް ޑޮނަލްޑް ޓްރަމްޕް ކަނޑަައަޅުއްވާފައިވަ "ރަތް ރޮނގު" ތަކަށް އީރާން އިން އަދިވެސް އެއްބަސް ނުވާ ކަމަށް، އެމެރިކާގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ. 

ވޭންސް މިހެން ވިދާޅުވެފައި ވަނީ އަންގާރަ ދުވަހު އެވެ. އީރާން އާއި އެމެރިކާއާ ދެމެދު ކުރަމުން އަންނަ މަޝްވަރާ ތަކުގެ ދެ ވަނަ ބައްދަލުވުން ވަނީ، އަންގާރަ ދުވަހު ސްވިޒަލެންޑުގެ ޖެނީވާގައި ކުރިއަށް ގެންގޮސްފަ އެވެ. އެ ބައްދަލުވުން ނިމުނު ފަހުން ވާހަކަ ދައްކަވަމުން ވޭންސް ވިދާޅުވެފައި ވަނީ، އީރާންއާ އެކު ވާހަކަ ދައްކައި، މަޝްވަރާ ކުރުމަށް އަދިވެސް އެމެރިކާ އިން ޝައުޤުވެރިވާ ކަމަށެވެ. 

ފޮކްސް ނިއުސް އަށް ދެއްވި އިންޓަވިޔުއެއްގައި ވޭންސް ވިދާޅުވީ، އީރާން އާއެކު ކުރިއަށް ގެންދިޔަ މަޝްވަރާތައް ކޮންމެ ވެސް ވަރަކަށް ރަނގަޅު ކަމަށެވެ. އަދި ތިން ވަނަ ބުރުގެ ބައްދަލުވުމެއް ބޭއްވުމަށް އީރާން އިން އެއްބަސްވެފައިވާ ކަމަށް ވެސް ވޭންސް ވިދާޅުވި އެވެ. ނަމަވެސް އެހެން ގޮތަކަށް ބަލާއިރު، އެމެރިކާގެ ރައީސް ޓްރަމްޕް ކަނޑަޅުއްވާފައިވާ ރަތް ރޮނގު ތަކަށް އީރާން އިން އަދިވެސް އެއްބަސްވެ، އެކަމަށް މަސައްކަތް ކުރަން ތައްޔާރުވެފައި ނުވާކަން ވަރަށް ބޮޑަށް ސާފުވެގެން ގޮސްފައިވާ ކަމަށް ވޭންސް ވިދާޅުވި އެވެ. 

އީރާންގެ ނިއުކްލޮއާ ޕްރޮގްރާމްއާ ގުޅޭ މައިގަނޑު ކަންބޮޑުވުން ތަކަށް އެ ޤައުމުން އެއްބަސް ނުވާ ނަމަ، ބާރުގެ ބޭނުން ކުރަން ޖެހިދާނެ ކަމުގެ އިންޒާރު މީގެ ކުރިން ޓްރަމްޕް ދެއްވާފައިވެ އެވެ. އެހެން ނަމަވެސް، ވޭންސް ވިދާޅުވެފައި ވަނީ އެމެރިކާ އިން އަދިވެސް އޮތީ ސިޔާސީ ގޮތުން އެ މައްސަލަ ޙައްލު ކުރުމަށް ތައްޔާރަށް ކަމަށް ވިދާޅުވެފަ އެވެ. އަދި އެކަމުގެ މަސައްކަތްތައް ވެސް އެމެެރިކާ އިން ކުރަމުން ގެންދާނެ ކަމަށް އޭނާ ވިދާޅުވި އެވެ. 

އިތުރަށް ވޭންސް ވިދާޅުވީ ސިޔާސީ ގޮތުން މައްސަލަ ޙައްލު ކުރުމަށް ކުރަމުން އަންނަ މަސައްކަތް ނިމުމަކަށް ގެންނާނެ ހިސާބު ވެސް އިނގޭނީ، ރައީސް ޓްރަމްޕް އަށް ކަމަށެވެ. އެހާ ހިސާބަށް ނުދާނެ ކަމަށް އުންމީދު ކުރައްވާ ކަމަށް ވިދާޅުވެ ވޭންސް ވަނީ، އެ ހިސާބަށް ގޮސްފި ނަމަ ރައީސް ޓްރަމްޕް އެ ނިންމުން ވެސް ނިންމަވާނެ ކަމުގެ އިންޒާރެއް ދެއްވައިފަ އެވެ. 

މެދު ކެނޑުމަކަށް ފަހު އީރާން އާއި އެމެރިކާއާ ދެމެދު މަޝްވަރާތައް ފަށާފައިވާއިރު، ދުނިޔޭގެ ސަމާލުކަން ވަނީ މި މައްސަލަ އަށް ލިބިފަ އެވެ. މަޝްވަރާތައް އަލުން ފެށިއިރު، މަޝްވަރާގެ ފުރަތަމަ ބައްދަލުވުން ބާއްވާފައި ވަނީ އޮމާންގަ އެވެ. އޮމާން މެދުވެރިވެގެން މަޝްވަރާތައް ކުރިއަށް ގެންދަމުން އަންނައިރު، ދެ ވަނަ ބުރުގެ ބައްދަލުވުން އޮތީ ޖެނީވާގަ އެވެ. ތިން ވަނަ ބައްދަލުވުމެއް އޮންނާނެ ތަނަކާއި، ތާރީޚު ފަހުން ކަނޑައަޅާނެ ކަމަށް ރިޕޯޓުތައް ބުނެ އެވެ.