އެޕްސްޓީންގެ ފައިލްތައް ޓްރަމްޕް ފޮރުވާ ކަމަށް ބުނެ ބޮޑު ތުހުމަތެއް ކޮށްފި

އެމެރިކާގެ ކުރީގެ ސެކްރެޓަރީ އޮފް ސްޓޭޓް އަދި ރިޔާސީ އިންތިޚާބުގައި ވެސް ވާދަކުރެއްވި ހިލަރީ ކްލިންޓަން، އެ ޤައުމުގެ ރައީސް ޑޮނަލްޑް ޓްރަމްޕް އަށް ބޮޑު ތުހުމަތެއް ކުރައްވައިފި އެވެ. 

ބީބީސީ އަށް ދެއްވި އިންޓަވިޔުއެއްގައި ހިލަރީ ކްލިންޓަން ވިދާޅުވީ، ޖިންސީ ކުށްވެރިޔާ ޖެފްރީ އެޕްސްޓީންއާ ގުޅޭ މުހިންމު ލިޔުން ތަކެއް ޓްރަމްޕް ގެންދަވަނީ އާންމުވިޔަ ނުދީ ހިފަހައްޓަމުން ކަމަށެވެ. އަދި ޓްރަމްޕް ގެންދަވަނީ އެކަން ފޮރުވުމަށް މަސައްކަތް ކުރައްވަމުން ކަމަށް ވެސް ހިލަރީ ކްލިންޓަން ވިދާޅުވެފައިވެ އެވެ. 

ޖަރުމަނުގެ ބާލިންގައި ހުންނަވައި ހިލަރީ ކްލިންޓަން ދެއްވި އިންޓަވިޔުގައި އެ ފައިލްތައް ހާމަ ކުރުން ލަސް ކުރަމުންދާ ކަމަށް ވިދާޅުވެފައިވާއިރު، އޭނާ ވަނީ އެ ހުރިހާ ލިޔެ ކިޔުން ތަކެއް ވަގުތުން އާންމު ކުރުމަށް ވެސް ގޮވާލައްވައިފަ އެވެ. 

އެމެރިކާގެ ޑިޕާޓްމަންޓް އޮފް ޖަސްޓިސް އިން މިދިޔަ ޖަނަވަރީ މަހުގެ ތެރޭގައި ވަނީ އެޕްސްޓީންގެ މައްސަލައާ ގުޅުން ހުރި ތިން މިލިއަނަށް ވުރެ ގިނަ ލިޔެ ކިޔުންތަކާއި، ފޮޓޯ އަދި ވީޑިއޯ ހިމެނޭ ފައިލް ތަކެއް އާންމު ކޮށްފަ އެވެ. އެ ފައިލް ތަކުގައި ހިލަރީ ކްލިންޓަންގެ ފިރިކަލުން އަދި އެމެރިކާގެ ކުރީގެ ރައީސް ބިލް ކްލިންޓަންގެ ނަން ތަކުރާރުކޮށް ފެންނަ އޮތެވެ. ނަމަވެސް، ކްލިންޓަންގެ ދެމަފިރިން ޖިނާއީ އެއްވެސް ކަމެއްގައި ބައިވެރިވި ކަމުގެ އެއްވެސް ހެއްކެއް މިހާތަނަށް ފެންނާކަށް ނެތެވެ. މި މައްސަލައިގައި ހައުސް އޮފް އޯވަސައިޓް ކޮމެޓީ އަށް ހާޒިރުވެ، ބަޔާން ދިނުމަށް ކްލިންޓަންގެ ދެމަފިރިންގެ މައްޗަށް ވަނީ އަމުރު ކޮށްފަ އެވެ. 

ކޮމެޓީ އަށް ހާޒިރުވެ ބަޔާން ދިނުމާ ގުޅޭ ގޮތުން ހިލަރީ ކްލިންޓަން ވިދާޅުވެފައި ވަނީ، ސުވާލު ތަކަށް ޖަވާބުދާރީ ވުމަށް އެ ދެމަފިރިން ހާޒިރު ވާނެ ކަމަށާއި، ނަމަވެސް ބައްދަލުވުންތައް ސިއްރު ކުރުމުގެ ބަދަލުގައި އާންމުކޮށް ހުޅުވާލައިގެން ކުރިއަށް ގެންދިޔުމަކީ އެންމެ ރަނގަޅު ގޮތް ދެކޭ ކަމަށެވެ. އެއާ އެކު އޭނާ ވިދާޅުވީ، އެ ދެމަފިރިން ފޮރުވަން ޖެހޭ އެއްވެސް ކަމެއް ނެތް ކަމަށާއި، ހުރިހާ އެންމެނާ މެދު ވެސް އިންސާފުން ކަންތައްތައް ކުރެވެން ޖެހޭ ކަމަށެވެ. 

އެޕްސްޓީންގެ މައްސަލައާ ގުޅުން ހުރި އިތުރު ފައިލް ތަކެއް ނެތް ކަމަށް ޖަސްޓިސް ޑިޕާޓްމަންޓް އިން ބުނި ނަަމަވެސް، ސަރުކާރުގެ އެތެރޭގެ މެމޯތަކާއި، އީމެއިލްތައް ހާމަ ނުކުރާތީ ޤާނޫނު ހަދާ މަޖިލީހުގެ މެމްބަރުން ވަނީ ކަންބޮޑުން ފާޅުކޮށް، ފާޑު ވެސް ކިޔަމުންނެވެ. 

އިތުރަށް ހިލަރީ ކްލިންޓަން ވިދާޅުވީ، ރިޕަބްލިކަން ޕާޓީ އިން އެ ދެމަފިރިންގެ މައްސަލަ ބަލަމުން ދަނީ ޓްރަމްޕްއާ ދެކޮޅަށް އޮތް ސަމާލުކަން އަނބުރާލުމުގެ މަޤުސަދުގައި ކަމަށެވެ. އެކަން ފާހަގަ ކުރައްވައި އޭނާ ވިދާޅުވީ، އެޕްސްޓީންގެ ފައިލް ތަކުގައި ޓްރަމްޕްގެ ނަން ވެސް އެތައް ފަހަރު ފާހަގަ ކޮށްފައިވާ ކަމަށެވެ. ނަމަވެސް، ޓްރަމްޕް ވަނީ އެއްވެސް ގޯހެއް ހިނގާފައި ނުވާނެ ކަމަށް ވިދާޅުވެ، ހިލަރީ ކްލިންޓަންގެ ވާހަކަތައް ދޮގު ކުރައްވައިފަ އެވެ. ހޯމަ ދުވަހުގެ ރޭ ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އެ ހުރިހާ ކަމަކު އޭނާ ބަރީއަވެފައިވާ ކަމަށެވެ. 

މީގެ ކުރިން ބިލް ކްލިންޓަން ވަނީ، 2000 ވަނަ އަހަރުގެ ކުރީ ކޮޅު އެޕްސްޓީންގެ މަތިންދާ ބޯޓުގައި ދަތުރު ކުރެއްވި ކަމަށް އެއްބަސްވެ ވަޑައިގެންފަ އެވެ. ނަމަވެސް، އެއީ އިންސާނީ އެހީގެ މަސައްކަތް ތަކުގައި ކަމަށާއި، އެޕްސްޓީންގެ އަމިއްލަ ރަށަށް ދުވަހަކު ވެސް ވަޑައި ނުގަންނަވާ ކަމަށް އޭނާ ވިދާޅުވެފައިވެ އެވެ. ހިލަރީ ކްލިންޓަން ވިދާޅުވި ގޮތުގައި، އޭނާ އެޕްސްޓީންއާ ދުވަހަކު ވެސް ބައްދަލު ކުރައްވާފައި ނުވެ އެވެ. އެހެން ނަމަވެސް، އެޕްސްޓީންގެ ގާތް ރަޙުމަތްތެރިއެއްގެ ގޮތުގައި ހުރި ޖިސްލެއިން މެކްސްވެލްއާ މަދު ފަހަރަކު ބައްދަލުވި ކަމަށް ހިލަރީ ކްލިންޓަން ވިދާޅުވި އެވެ. 

މި މައްސަލައިގައި ޖަވާބުދާރީ ވުމަށް ހިލަރީ ކްލިންޓަން ކޮމެޓީ އަށް ހާޒިރުވާާން އަންގާފައި ވަނީ ފެބްރުވަރީ މަހުގެ 26 ވަނަ ދުވަހު އެވެ. އަދި ބިލް ކްލިންޓަން ހާޒިރުވާން އަންގާފައި ވަނީ ފެބްރުވަރީ މަހުގެ 27 ވަނަ ދުވަހު އެވެ. މި ތަހުގީގަކީ ނުފޫޒު ގަދަ ފަރާތްތަކާއި އެޕްސްޓީންއާ އޮތް ގުޅުންތައް ބެލުމަށް ކުރިއަށް ގެންދާ މުހިންމު މަސައްކަތެކެވެ.