އެމެރިކާ އާއި އީރާނާ ދެމެދު މަސްރަހު ހޫނުވަމުން ދަނިކޮށް މެދުއިރުމަތީގައި ތިބި ނޯވޭ ސިފައިން އަނބުރާ ގެންދަނީ

މެދުއިރުމަތީގައި ހަރަކާތްތެރިވާ ނޯވޭގެ ގާތްގަނޑަކަށް 60 ސިފައިންގެ ތެރެއިން ބައެއް ސިފައިން، ސަލާމަތީ ސަބަބުތަކަށްޓަކައި އަނބުރާ ގައުމަށް ނުވަތަ އެ ސަރަހައްދުގެ އެހެން ގައުމުތަކަށް ބަދަލުކުރަން ނިންމާފައިވާ ކަމަށް އެ ގައުމުގެ އަސްކަރިއްޔާގެ ތަރުޖަމާނަކު ހުކުރު ދުވަހު ވިދާޅުވެއްޖެއެވެ.

އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު އީރާނަށް އިންޒާރު ދެއްވަމުން ވިދާޅުވީ، އެ ގައުމުގެ ނިއުކްލިއާ ޕްރޮގްރާމާ ގުޅޭގޮތުން 10 ދުވަހާއި 15 ދުވަހުގެ ތެރޭގައި އެއްބަސްވުމަކަށް އަންނަންޖެހޭނެ ކަމަށާއި، އެހެން ނޫންނަމަ "ވަރަށް ގޯސް ކަންތައްތަކެއް" ހިނގާފާނެ ކަމަށެވެ. ޓްރަމްޕްގެ މި އިންޒާރާ ގުޅިގެން ތެހެރާނުން ވަނީ، އީރާނަށް ހަމަލާއެއް ދީފިނަމަ އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ބަދަލުހިފުމުގެ ހަމަލާތައް ދޭނެ ކަމަށް ބުނެ ރައްދު ދީފައެވެ.

މި ނިންމުމާ ގުޅިގެން ނޯވޭއިން ބަދަލުކުރަނީ ކިތައް ސިފައިން ކަމެއް އަދި އެ ސިފައިން ބަދަލުކުރަނީ ކޮން ތަންތަނަކަށް ކަމެއް ހާމަކުރަން އެ ގައުމުން ވަނީ އިންކާރުކޮށްފައެވެ.

ނޯވޭގެ ޖޮއިންޓް ހެޑްކުއާޓާޒްގެ ލެފްޓިނެންޓް ކާނަލް ވޭގާޑް ފިންބާގް ރޮއިޓާސްއަށް މައުލޫމާތު ދެއްވަމުން ވިދާޅުވީ، މި ސިފައިންނަކީ އެ ސަރަހައްދުގެ ލޯކަލް ފޯސްތައް ތަމްރީނުކުރުމާއި އެ ނޫންވެސް އެކި މިޝަންތަކުގައި މަސައްކަތްކުރާ ސިފައިން ކަމަށެވެ.

މިހާރު މަސްރަހު އޮތް ގޮތުން ސިފައިންގެ މައިގަނޑު މަސްއޫލިއްޔަތުތައް އަދާކުރުމަށް ހުރަސްތަކެއް ހުރި ކަމަށާއި، ސިފައިން އެހެން ތަންތަނަށް ބަދަލުކުރަން ނިންމީ އެ ސަބަބަށްޓަކައި ކަމަށް ފިންބާގް ވިދާޅުވިއެވެ. އަދި ފާއިތުވި ދުވަސްތަކުގައި އެހެން ގައުމުތަކުންވެސް މިފަދަ ފިޔަވަޅުތައް އަޅާފައިވާކަން އޭނާ ފާހަގަކުރެއްވިއެވެ.

ނޯވޭގެ އަސްކަރީ ފައުޖުތައް އިރާގުގެ އެކި ސަރަހައްދުތަކުގެ އިތުރުން މެދުއިރުމަތީގެ އަވަށްޓެރި އެހެން ގައުމުތަކުގައިވެސް ގާއިމުވެ އެބަތިއްބެވެ.