އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން ލަވްރޮވް އާއި އަރާގްޗީ މަޝްވަރާ ކުރައްވައިފި
ރަޝިޔާ އަކީ އީރާންއާ ގާތް ގުޅުމެއް ބާއްވަމުން އަންނަ ޤައުމު. ދެ ޤައުމުގެ ދެމެދުގައި ސިޔާސީ ގުޅުން ތަކުގެ އިތުރުން، އިޤްތިޞާދީ ގޮތުން އޮންނަ ގުޅުން ވެސް ވަރަށް ބަދަހިކަން ފާހަަގަވެފައިވޭ.
ރަޝިޔާގެ ފޮރިން މިނިސްޓަރު ލަވްރޮވް އާއި، އީރާންގެ ފޮރިން މިނިސްޓަރު އަރާގްޗީ | ރޮއިޓާސް
އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން ރަޝިޔާގެ ފޮރިން މިނިސްޓަރު ސާގޭ ލަވްރޮވް އާއި، އީރާންގެ ފޮރިން މިނިސްޓަރު އައްބާސް އަރާގްޗީ މަޝްވަރާ ކުރައްވައިފި އެވެ.
ހުކުރު ދުވަހު މިކަން ހާމަ ކޮށްފައި ވަނީ ރަޝިޔާގެ ފޮރިން މިނިސްޓްރީ އިންނެވެ. އެގޮތުން އެ މިނިސްޓްރީގެ ޓެލެގްރާމް ޗެނަލްގައި ބުނެފައި ވަނީ، ލަވްރޮވް އާއި އަރާގްޗީ ފޯނުން ގުޅުއްވައި، ނިއުކްލިއާ ޕްރޮގްރާމްއާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައިވާ ކަމަށެވެ.
އީރާންގެ ނިއުކްލިއާ ޕްރޮގްރާމް އަކީ ބައިނަލްއަޤުވާމީ މައިދާނުގައި ގިނަ ދުވަސް ތަކެއް ވަންދެން ބަހުސް ކުރެވެމުން އަންނަ މައްސަލަ އެކެވެ. ޚާއްސަކޮށް ހުޅަނގުގެ ޤައުމު ތަކުން އީރާންގެ ނިއުކްލިއާ ޙަރަކާތްތަކާ މެދު ކަންބޮޑުވުން ފާޅު ކުރަމުން އަންނައިރު، އީރާން އިން ބުނަމުން އަންނަނީ އެ ޤައުމުގެ ނިއުކްލިއާ ޕްރޮގްރާމް އަކީ ސުލްޙަވެރި ބޭނުން ތަކަށް ހިންގާ ޕްރޮގްރާމެއް ކަމަށެވެ.
ރަޝިޔާ އަކީ އީރާންއާ ގާތް ގުޅުމެއް ބާއްވަމުން އަންނަ ޤައުމެކެވެ. ދެ ޤައުމުގެ ދެމެދުގައި ސިޔާސީ ގުޅުން ތަކުގެ އިތުރުން، އިޤްތިޞާދީ ގޮތުން އޮންނަ ގުޅުން ވެސް ވަރަށް ބަދަހިކަން ފާހަަގަވެފައިވެ އެވެ. ރަޝިޔާ އިން އީރާންގެ ނިއުކްލިއާ ޕްރޮގްރާމް އަށް ތާއީދުކޮށް، އެ މައްސަލައިގައި އީރާން އަށް ބޭނުންވާ އެހީތެރިކަން ފޯރުކޮށްދެމުން އަންނަ ކަމަށް ބައިނަލްއަޤުވާމީ މީޑިއާ ތަކުގައި އަބަދު ވެސް ރިޕޯޓު ކުރެ އެވެ.
އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން މީގެ ކުރިން ހެދިފައި އޮތް ބައިނަލްއަޤުވާމީ އެއްބަސްވުމެއް ކަމަށްވާ ޖޮއިންޓް ކޮމްޕްރެހެންސިވް ޕްލޭ އޮފް އެކްޝަން (ޖޭސީޕީއޭއޯ) އެއްބަސްވުމުން އެމެރިކާ ވަކިވުމާ ގުޅިގެން، އީރާންގެ ނިއުކްލިއާ މައްސަލަ އަކީ އިތުރަށް ފަސޭހަ ނުވެ އޮތް މައްސަލަ އެކެވެ. މި މައްސަލަ ޙައްލު ކުރުމަށް ބައިނަލްއަޤުވާމީ ގޮތުން މަސައްކަތް ތަކެއް ކުރަމުން އަންނައިރު، ރަޝިޔާ އިން އީރާން އާއެކު މަޝްވަރާ ކުރުމަކީ މުހިންމު ކަމެއް ކަމަށް ބައެއް މާހިރުން ދެކެ އެވެ.
ލަވްރޮވް އާއި އަރާގްޗީގެ މަޝްވަރާ ތަކުގައި ދެ ޤައުމުގެ ދެމެދުގައި އޮންނަ ދެ ފަރާތަށް ފައިދާ ހުރި އެހެނިހެން މައްސަލަ ތަކަށް ވެސް މަޝްވަރާ ކޮށްފައިވާ ކަމަށް ރިޕޯޓުތައް ބުނެ އެވެ. ނަމަވެސް، އެކަމާ ގުޅޭ ތަފްސީލީ މައުލޫމާތު ރަޝިޔާގެ ފޮރިން މިނިސްޓްރީ އިން ހާމަކޮށްފައި ނުވެ އެވެ.
މަސްދަރު: ރޮއިޓާސް
