އީރާނުގެ އަސްކަރީ ބޯޓެއް ވެއްޓި ޕައިލެޓަކު މަރުވެއްޖެ
20 ފެބުރުއަރީ 2026 | ހުކުރު 09:58މި ހާދިސާ ހިނގީ ބޯޓަށް ދިމާވި ފަންނީ މައްސަލައަކާ ގުޅިގެން ކުއްލި ހާލަތުގައި ޖައްސަން އުޅުމުގެ ތެރޭގައި ކަމަށް ރިޕޯޓުތައް ބުނާއިރު، ބޯޓު ވެއްޓެން މެދުވެރިވި ސަބަބު ކަމާބެހޭ އިދާރާތަކުން ދަނީ ތަހުގީގު ކުރަމުން. ފްރެންޑްލީ ފަޔަރ ގެ ސަބަބުން މި ހާދިސާ ހިނގި ކަމަށް ދެކެވޭ ވާހަކަތައް އީރާނުގެ އަސްކަރިއްޔާ އިން ވަނީ ދޮގުކޮށްފައި.
އީރާނުގެ އަސްކަރިއްޔާއިން ފުރަތަމަ ފަހަރަށް ބިމުގެ އަޑީގައި ގާއިމުކުރި އަސްކަރީ ވައިގެ މަރުކަޒު ދައްކާލުމަށް، 2023 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހު އެ ގައުމުގެ އަސްކަރީ އޮފީހުން އާންމުކުރި ފޮޓޯއަކުން ފެންނަ ފައިޓާ ޖެޓެއް. | އޭއެފްޕީ
އީރާނުގެ ހަމަދާން ޕްރޮވިންސަށް އަސްކަރީ ބޯޓެއް ވެއްޓި، އޭގައި ތިބި ދެ ޕައިލެޓުންގެ ތެރެއިން އެކަކު މަރުވެއްޖެ ކަމަށް އެ ގައުމުގެ ފާރސް ނިއުސް އެޖެންސީން ރިޕޯޓުކޮށްފިއެވެ.
އީރާނުގެ އަސްކަރިއްޔާއިން ބުރާސްފަތި ދުވަހުގެ ރޭ ބުނި ގޮތުގައި، އެއާފޯސްގެ މި ބޯޓު ވެއްޓިފައިވަނީ އީރާނުގެ ހުޅަނގު ސަރަހައްދެއްގައި ރޭގަނޑު ކުރިއަށްގެންދިޔަ ތަމްރީނު މިޝަނެއްގެ ތެރޭގައެވެ. މި ހާދިސާގައި އެއް ޕައިލެޓު މަރުވި ނަމަވެސް، އަނެއް ޕައިލެޓު ވަނީ ސަލާމަތްވެފައެވެ.
އީރާނުގެ އެއާފޯސްގެ ޕަބްލިކް ރިލޭޝަންސް އޮފީހުން ނެރުނު ބަޔާނެއްގައި ބުނެފައިވަނީ، ބޯޓު ވެއްޓެން މެދުވެރިވި ސަބަބު އަދިވެސް ދަނީ ތަހުގީގު ކުރަމުންނެވެ. ނަމަވެސް، ވެއްޓުނީ ކޮން ބާވަތެއްގެ ބޯޓެއް ކަމެއް ނުވަތަ ހާދިސާ ހިނގަން މެދުވެރިވި އިތުރު ތަފްސީލެއް އެ އިދާރާއިން ހާމަކޮށްފައެއް ނުވެއެވެ.
އަލް އަރަބިއްޔާގެ ރިޕޯޓެއްގައިވާ ގޮތުން، އޭވިއޭޝަން އެކްސްޕާޓެއް ކަމަށްވާ ބާބަކް ތަގްވާޢީ ބުނެފައިވަނީ، 31 ވަނަ ޓެކްޓިކަލް ފައިޓަރ ސްކޮޑްރަންއަށް ނިސްބަތްވާ މި ބޯޓަށް ތަމްރީނުތަކުގެ ތެރޭގައި ގެއްލުންތަކެއް ލިބުނު ކަމަށެވެ. އެހެންނަމަވެސް، ޕައިލެޓުން ވަނީ ހަމަދާންގައި ހުންނަ ތިންވަނަ ޓެކްޓިކަލް އެއާ ބޭސްއަށް ބޯޓު އަނބުރާ ގެންދިއުމަށް މަސައްކަތް ކޮށްފައެވެ.
އޭނާ އިތުރަށް ބުނި ގޮތުގައި، ބޯޓު ކުއްލި ހާލަތުގައި ޖައްސަން އުޅުމުގެ ތެރޭގައި ބޯޓުގެ ފުރޮޅުތައް (ލޭންޑިންގ ގިއަރ) ފުރިހަމައަށް މަސައްކަތް ނުކުރުމުގެ ސަބަބުން، ބޯޓު ވަނީ ރަންވޭއިން ކަސާލައިގެން ގޮސްފައެވެ.
މި ހާދިސާ ހިނގީ އީރާނުގެ އަމިއްލަ އަސްކަރީ ބާރުތަކުން އޮޅިގެން ދިން "ފްރެންޑްލީ ފަޔަރ" އެއްގެ ސަބަބުން ކަމަށް ދެކެވޭ ވާހަކަތަކާ ގުޅިގެން އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އެއަރޯސްޕޭސް ފޯސްއިން ރަސްމީކޮށް އެއްޗެއް ބުނެފައެއް ނުވެއެވެ. ނަމަވެސް، އެފަދަ އެއްވެސް ކަމެއް ހިނގާފައިވާކަމަށް ދެކެވޭ ވާހަކަތައް އައި.އާރް.ޖީ.ސީ އިން ދޮގުކުރާ ކަމަށް އެ ގައުމުގެ ބައެއް މީޑިއާތަކުން ވަނީ ރިޕޯޓުކޮށްފައެވެ.
