އީރާނަށް އަސްކަރީ ހަމަލާ ދޭން ޗާގޯސް ބޭނުން ނުކުރެވޭނެ ކަމަށް އިނގިރޭސިވިލާތުން ބުނެފި
އީރާނުގެ ނިއުކްލިއާ ޕްރޮގްރާމާ ދެކޮޅަށް އެމެރިކާއިން ދޭން ރާވާ އަސްކަރީ ހަމަލާތަކުގައި އިނގިރޭސިވިލާތުގެ ވައިގެ މަރުކަޒުތައް ބޭނުންކުރުމުގެ ހުއްދަ ނުދިނުމުން، ދެ ގައުމުގެ ގުޅުމަށް ވަނީ ބޮޑެތި ބަދަލުތަކެއް އައިސްފައި. މި މައްސަލައިގައި ރައީސް ޓްރަމްޕް ވަނީ އިނގިރޭސި ބޮޑުވަޒީރާ މަޝްވަރާކުރައްވައި، އީރާނާ ދެކޮޅަށް ހަރުކަށި ފިޔަވަޅު އަޅާނެ ކަމުގެ އިންޒާރު ތަކުރާރުކުރައްވާފައި.
2001 ވަނަ އަހަރުގެ އޮކްޓޫބަރު މަހުގެ 22 ވަނަ ދުވަހު، ޑިއޭގޯ ގާސިއާގައި އޮންނަ އަސްކަރީ މަރުކަޒުގައި، އެމެރިކާގެ އެއަރ ފޯސްގެ ހަތިޔާރު އުފުލާ މުވައްޒަފަކު، ބީ-1 ބޮމާ މަތިންދާބޯޓަކަށް އެރުވުމަށްޓަކައި 2،000 ޕައުންޑުގެ ބޮމެއް ގެންދަނީ. | ގެޓީ އިމޭޖަސް
އީރާނަށް ދީފާނެ އަސްކަރީ ހަމަލާތަކެއްގައި އިނގިރޭސިވިލާތުގެ ވައިގެ ސިފައިންގެ މަރުކަޒުތައް ބޭނުންކުރުމުގެ ހުއްދަ އެ ގައުމުން ނުދިނުމާ ގުޅިގެން، ޗާގޯސް ޖަޒީރާތައް މޮރިޝަސްއާ ހަވާލުކުރުމަށް އިނގިރޭސިވިލާތުން އެކުލަވާލާފައިވާ އެއްބަސްވުމަށް ދެމުންދިޔަ ތާއީދު އެމެރިކާގެ ރައީސް ޑޮނަލްޑް ޓްރަމްޕް އަނބުރާ ގެންދަވާފައިވާ ކަމަށް އިނގިރޭސިވިލާތުގެ ނޫހެއް ކަމަށްވާ "ދަ ޓައިމްސް" އިން ބުރާސްފަތި ދުވަހު ރިޕޯޓުކޮށްފިއެވެ.
"ދަ ޓައިމްސް" އިން ރިޕޯޓުކޮށްފައިވާ ގޮތުގައި، އީރާނަށް ހަމަލާދިނުމަށްޓަކައި އެމެރިކާގެ ވައިޓް ހައުސްއިން ދަނީ އަސްކަރީ ތަފްސީލީ ޕްލޭންތަކެއް އެކުލަވާލަމުންނެވެ. މި ހަމަލާތަކުގައި ޑިއޭގޯ ގާސިއާގެ އިތުރުން، ޔޫރަޕްގައި އޮންނަ އެމެރިކާގެ ބަރު ހަތިޔާރު އުފުލާ ބޯޓުތަކުގެ މަރުކަޒު ކަމަށްވާ އިނގިރޭސިވިލާތުގެ ގްލޮސްޓަޝަޔާގައި ހުންނަ އާރް.އޭ.އެފް ފެއަރފޯޑް ބޭނުންކުރުމަށް ވަނީ ރޭވިފައެވެ.
ނަމަވެސް، އިނގިރޭސިވިލާތާއި އެމެރިކާއާ ދެމެދު ވެފައިވާ އެއްބަސްވުންތަކުގެ ދަށުން، އެމެރިކާގެ އަސްކަރީ މަރުކަޒުތައް ބޭނުންކުރެވޭނީ އިނގިރޭސި ސަރުކާރާއެކު ކުރިން އެއްބަސްވެފައިވާ އަސްކަރީ އޮޕަރޭޝަންތަކަށް އެކަނި ކަމަށް އެ ނޫހުގައި ބަޔާންކޮށްފައިވެއެވެ.
އެ ރިޕޯޓުގައިވާ ގޮތުން، އަންގާރަ ދުވަހުގެ ރޭ ރައީސް ޓްރަމްޕް ވަނީ އިނގިރޭސި ބޮޑުވަޒީރާ ފޯނުން ގުޅުއްވައި، އީރާނުގެ ނިއުކްލިއާ ޕްރޮގްރާމާ ގުޅޭގޮތުން އެމެރިކާއިން ދީފައިވާ އިންޒާރުތަކާ ބެހޭގޮތުން މަޝްވަރާ ކުރައްވާފައެވެ. އަދި އޭގެ ޖެހިގެން އައި ދުވަހު، ޗާގޯސް އެއްބަސްވުމަށް ފާޑުވިދާޅުވެ ޓްރަމްޕް ބަޔާނެއް ނެރުއްވި ކަމަށްވެސް އެ ނޫހުގައިވެއެވެ.
