ޗާގޯސް މޮރިޝަސް އާ ހަވާލުކުރަން އެމެރިކާ އިން ރަސްމީކޮށް ތާއީދު ކޮށް، އަންނަ ހަފްތާގައި އެމެރިކާ އާ މޮރިޝަސް ބައްދަލު ކުރަނީ

ޗާގޯސް ޖަޒީރާގެ މިލްކުވެރިކަން މޮރިޝަސްއާ ހަވާލުކުރުމަށާއި، އެ ސަރަހައްދުގައި އޮންނަ މުހިންމު އަސްކަރީ މަރުކަޒު ކުއްޔަށް ހިފުމަށް އިނގިރޭސިވިލާތުން ނިންމާފައިވާ ނިންމުމަށް އެމެރިކާ ސަރުކާރުން ރަސްމީކޮށް ތާއީދުކޮށްފި އެވެ.

އެމެރިކާގެ ސްޓޭޓް ޑިޕާޓްމަންޓުން ނެރުނު ބަޔާނެއްގައި ބުނެފައިވަނީ، ޗާގޯސް ޖަޒީރާތަކާ ގުޅޭގޮތުން މޮރިޝަސްއާއެކު ވެފައިވާ އެއްބަސްވުމާއިގެން ކުރިއަށް ދިއުމަށް އިނގިރޭސިވިލާތުން ނިންމި ނިންމުމަށް އެމެރިކާ އިން ތާއީދުކުރާ ކަމަށެވެ.

މި އެއްބަސްވުމާ މެދު އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވި ވިސްނުންފުޅު ކުއްލި ގޮތަކަށް ބަދަލުވުމާ ގުޅިގެން، މިއީ އިނގިރޭސި ސަރުކާރަށް ލިބުނު ބޮޑު ހިތްހަމަޖެހުމެކެވެ. ކުރިން މި އެއްބަސްވުމަކީ "ވަރަށް ބޮޑު މޮޔަކަމެއް" ކަމަށް ވިދާޅުވި ނަމަވެސް، ފަހުން ޓްރަމްޕް ވަނީ މިއީ އިނގިރޭސި ބޮޑުވަޒީރަށް ހެއްދޭނެ "އެންމެ ރަނގަޅު" އެއްބަސްވުން ކަމަށް ވިދާޅުވެފަ އެވެ.

އެމެރިކާ އިން މިކަން އިއުލާންކޮށްފައިވަނީ އަންނަ ހަފުތާގައި އެމެރިކާ އާއި މޮރިޝަސްއާ ދެމެދު ބޭއްވުމަށް ހަމަޖެހިފައިވާ މަޝްވަރާތަކުގެ ކުރިންނެވެ.

ސްޓޭޓް ޑިޕާޓްމަންޓުގެ ބަޔާނުގައި ބުނެފައިވަނީ، ޑިއޭގޯ ގާސިއާ ގައި އޮންނަ އަސްކަރީ މަރުކަޒު މެދުކެނޑުމެއް ނެތި ބޭނުންކުރުމުގެ ފުރުސަތު ޔަގީންކުރުމަށް އެމެރިކާ އިން ބޭނުންވާކަން އަލުން ހާމަކުރާ ކަމަށެވެ.

ޑިއޭގޯ ގާސިއާ އަކީ ޗާގޯސް ޖަޒީރާތަކުގެ ތެރެއިން އެންމެ ބޮޑު ރަށެވެ. މި ރަށް ބޭނުންކުރަނީ އިނގިރޭސިވިލާތާއި އެމެރިކާގެ ސަލާމަތީ ބާރުތަކުންނެވެ. އާ އެއްބަސްވުމުގެ ދަށުން އިނގިރޭސިވިލާތުން ޑިއޭގޯ ގާސިއާ އަލުން ކުއްޔަށް ހިފާނީ 99 އަހަރުގެ މުއްދަތަށެވެ.

އެ އަސްކަރީ މަރުކަޒުގެ މަސައްކަތްތައް ކުރިއަށް ގެންދިއުމަކީ އެމެރިކާގެ ގައުމީ ސަލާމަތަށް ލިބޭ ކުރިއެރުމެއް ކަމަށާއި، އޭގެ ސަބަބުން މުޅި އިންޑިއާ ކަނޑުގެ ސަލާމަތާއި ހަމަޖެހުން ކަށަވަރުވާނެ ކަމަށް ވެސް ސްޓޭޓް ޑިޕާޓްމަންޓުން ބުނެފައިވެ އެވެ.

މިދިޔަ މޭ މަހު އިނގިރޭސިވިލާތުން ސޮއިކުރި 3.4 ބިލިއަން ޕައުންޑް (4.6 ބިލިއަން ޑޮލަރު) ގެ މި އެއްބަސްވުމަށް ތާއީދުކުރާނެ ކަމުގެ އިޝާރާތެއް އެމެރިކާ ސަރުކާރުން މީގެ ކުރިން ވެސް ވަނީ ދީފަ އެވެ.

އެ ދުވަސްވަރު އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ މި އެއްބަސްވުމަށް މަރުހަބާ ވިދާޅުވެފަ އެވެ. ނަމަވެސް، މިދިޔަ މަހު ޓްރަމްޕް ވަނީ "ޓްރުތް ސޯޝަލް" ގައި ކުރެއްވި ޕޯސްޓެއްގައި މިއީ "ވަރަށް ބޮޑު މޮޔަކަމެއް" ކަމަށް ސިފަކުރައްވާފަ އެވެ.

ޓްރަމްޕް މިފަދަ މޭރުމަކުން ވާހަކަދެއްކެވީ، ޑެންމާކުގެ އަތުން ގްރީންލޭންޑް ގަތުމަށް އެމެރިކާގެ ރައީސް ބޭނުންފުޅުވުމާ ގުޅިގެން ވައިޓް ހައުސްވއާއި ވިލާތުގެ ގައުމުތަކާ ދެމެދު ނުތަނަވަސްކަން ބޮޑުވެފައިވާ ދަނޑިވަޅެއްގަވއެވެ. އަދި ޑެންމާކަށް ތާއީދުކުރި އިނގިރޭސިވިލާތާއި އެހެން ގައުމުތަކުން އެތެރެކުރާ މުދަލުން ޓެރިފް ނުވަތަ ޑިއުޓީ ބޮޑުކުރާނެ ކަމުގެ އިންޒާރު ވެސް ޓްރަމްޕް އެ ދުވަސްވަރު ދެއްވި އެވެ.

އިނގިރޭސި ސަރުކާރުން ބުނެފައިވަނީ ގައުމީ ސަލާމަތަށް އެއްވެސް އުނިކަމެއް އަންނާނެ ކަމަކަށް އެ ގައުމުން އެއްބަސްނުވާނެ ކަމަށެވެ. އަދި އެމެރިކާގެ ތާއީދު އަދިވެސް މި ނިންމުމަށް އޮތް ކަމަށް ބޮޑުވަޒީރުގެ ތަރުޖަމާނު އެ ދުވަސްވަރު ވިދާޅުވަމުން ގެންދެވި އެވެ.

އަންނަ ހަފުތާގައި ބޭއްވުމަށް ހަމަޖެހިފައިވާ މަޝްވަރާތައް ކުރިއަށްދާނީ މޮރިޝަސްގެ ވެރިރަށް ޕޯޓް ލުއިސްގައެވެ.

ސްޓޭޓް ޑިޕާޓްމަންޓުން ބުނި ގޮތުގައި، މި ބައްދަލުވުންތަކުގައި މައިގަނޑު ގޮތެއްގައި މަޝްވަރާކުރާނީ "ސަލާމަތީ ދާއިރާއިން އެއްބާރުލުން ދިނުމަށާއި" މޮރިޝަސް ސަރުކާރާއި އެމެރިކާއާ ދެމެދު ދިގު މުއްދަތަކަށް ސަލާމަތީ ކަންކަން ވަރުގަދަކޮށް ތަންފީޒުކުރުމާ ގުޅޭގޮތުންނެވެ.

ރަސްމީކޮށް "ބްރިޓިޝް އިންޑިއަން އޯޝަން ޓެރިޓަރީ" ގެ ނަމުން ނަންދެވިފައިވާ ޗާގޯސް ޖަޒީރާތައް އޮންނަނީ އިނގިރޭސިވިލާތުގެ ދެކުނު އިރުމަތިން ގާތްގަނޑަކަށް 5,799 މޭލު (9,332 ކިލޯމީޓަރު) ދުރުގައެވެ. އަދި މޮރިޝަސްގެ އުތުރު އިރުމަތިން ގާތްގަނޑަކަށް 1,250 މޭލު ދުރުގައެވެ.

1814 ވަނަ އަހަރުން ފެށިގެން އިނގިރޭސިންގެ ބާރުގެ ދަށުގައި އޮތް މި ޖަޒީރާތައް އިނގިރޭސި ސަރުކާރުން ގަނެފައިވަނީ 3 މިލިއަން ޕައުންޑަށެވެ. އަދި 1965 ވަނަ އަހަރު މި ސަރަހައްދަކީ އިނގިރޭސިވިލާތުގެ ބޭރުގެ އިދާރީ ދާއިރާއެއްގެ ގޮތުގައި ވަނީ ކަނޑައަޅާފައެވެ.

ނަމަވެސް، މޮރިޝަސްއިން ޒަމާނުއްސުރެ ވަކާލާތު ކުރަމުން އަންނަނީ، އެ ގައުމަށް މިނިވަންކަން ދިނުމުގެ ބަދަލެއްގެ ގޮތުން މި ޖަޒީރާތައް ދޫކޮށްލުމަށް މަޖުބޫރުކުރުވީ ބައިނަލްއަގުވާމީ ގާނޫނުތަކާ ހިލާފަށް ކަމަށެވެ.