ކުޑަ ކުދިންނަށް ނޭދެވޭ އަސަރު ކުރާ ކަމަށް ބުނެ ކުރި ދައުވާގައި، ހެކި ބަސް ދިނުމަށް ޒަކަބާގް ކޯޓަށް ހާޒިރު ކޮށްފި

ސޯޝަލް މީޑިއާގެ ވަސީލަތް ތަކަށް ކުޑަ ކުދިން ދެވި ހިފާ ގޮތަށް އެ ޕްލެޓްފޯމްތައް ފަރުމާ ކޮށްފައިވާ ކަމަށް ބުނެ ކުރާ ދައުވާތަކާ ގުޅިގެން، މެޓާ ކުންފުނީގެ ސީއީއޯ މާކް ޒަކަބާގް ހެކި ބަސް ދިނުމަށްޓަކައި ކޯޓަށް ހާޒިރު ކޮށްފި އެވެ. 

ބުދަ ދުވަހު އޭނާ ހާޒިރު ކޮށްފައި ވަނީ އެމެރިކާގެ ލޮސް އެންޖަލިސްގެ ކޯޓަށެވެ. މިއީ އިންސްޓަގްރާމް ފަދަ ވަސީލަތް ތަކުގެ ސަބަބުން ކުޑަ ކުދިންގެ ނަފްސާނީ ދުޅަހެޔޮ ކަމަށް ނޭދެވޭ އަސަރު ކުރާ ކަމަށް ބުނެ އުފުލާފައިވާ މައްސަލަ ތަކުގެ ތެރެއިން ތާރީޚީ މައްސަލަ އެކެވެ. 

އުމުރުން 41 އަހަރުގެ ޒަކަބާގް އަކީ ފޭސްބުކް، އިންސްޓަގްރާމް އަދި ވަޓްސްއެޕްގެ ބެލެނިވެރި ކުންފުނި ކަމަށްވާ މެޓާގެ އިސްވެރިޔާ އެވެ. ސޯޝަލް މީޑިއާގެ ކުންފުނިތަކާ ދެކޮޅަށް ކުރިއަށްދާ މި ޝަރީއަތުގައި ހެކި ބަސް ދޭނެ އެންމެ މުހިންމު އެއް ފަރާތަކީ ވެސް ޒަކަބާގް އެވެ. 

މި މައްސަލަ އަކީ އެމެރިކާގެ އެތައް ހާސް އާއިލާ އަކުން ސޯޝަލް މީޑިއާ ކުންފުނިތަކާ ދެކޮޅަށް ހުށަހަޅާފައިވާ ގިނަ ދައުވާ ތަކުގެ ތެރެއިން، ޤާނޫނީ ގޮތުން ބޮޑެތި ނިންމުން ތަކެއް ނިންމުމަށް މަގު ފަހިވެގެން ދާނެ ފުރަތަމަ މައްސަލަ އެވެ. 

މި މައްސަލައިގެ ޝަރީއަތުގައި މައިގަނޑު ގޮތެއްގައި ބަލަމުން ދަނީ، އިންސްޓަގްރާމް ފަދަ ޕްލެޓްފޯމްތައް ގަސްދުގައި ފަރުމާ ކޮށްފައި ވަނީ ބޭނުން ކުރާ ޒުވާން ފަރާތްތައް އެއަށް ދެވި ހިފާ ފަދަ ގޮތަކަށް ކަމަށް ބުނެ ކުރެވޭ ތުހުމަތެވެ. މީގެ ސަބަބުން ކުޑަ ކުދިންގެ ޞިއްޙަތަށް ލިބޭ ގެއްލުން ތަކުގެ ޒިންމާ މެޓާ އިން އުފުލަން ޖެހޭ ކަމަށް ދައުވާ ކުރާ ފަރާތްތަކުގެ ވަކީލުން ބުނެފައިވެ އެވެ. 

މި މައްސަލައިގެ ނިންމުމަކީ އެމެރިކާގެ އެކި ކޯޓު ތަކުގައި ސޯޝަލް މީޑިއާ ކުންފުނިތަކާ ދެކޮޅަށް ހުށަހެޅިފައވާ އެހެން މައްސަލަ ތަކަށް ވެސް އޭގެ ނުފޫޒު ފޯރާނެ ކަމެއް ކަމަށް ފާހަގަ ކޮށްފައިވެ އެވެ. ޒަކަބާގް ކޯޓަށް ހާޒިރުވެ ދޭ ހަކި ބަހަކީ މި ސިނާއަތުގެ މުސްތަޤުބަލަށާއި، ކުންފުނި ތަކުން ޒިންމާދާރު ވުމަށް ބާރު އެޅުމުގެ ގޮތުން ބަލާއިރު މުހިންމު ހެކި ބަހަކަށް ވެގެން ދާނެ އެވެ.