އީރާނުން މުހިންމު އަސްކަރީ ސައިޓުތަކުގެ ދިފާއު ވަރުގަދަކުރަނީ

އީރާނުގެ މުހިންމު އަސްކަރީ ސައިޓެއްގައި އަލަށް ބިނާކުރި ފެސިލިޓީއެއްގެ ދިފާއު ވަރުގަދަ ކުރުމުގެ ގޮތުން މަތީގައި ކޮންކްރީޓް އައްޑަނައެއް ހަރުކޮށް، އޭގެ މައްޗަށް ފަސްއަޅައި ފޮރުވާފައިވާކަން ފަހުގެ ސެޓެލައިޓް ފޮޓޯތަކުން ހާމަވެއްޖެ ކަމަށް މާހިރުން ބުނެފި އެވެ. އެމެރިކާއާ ދެމެދު އޮތް ނުތަނަވަސްކަމުގެ ތެރެއިން 2024 ވަނަ އަހަރު އިޒްރޭލުން ބޮން އެޅި ކަމަށް ބުނާ މި ސަރަހައްދުގައި އީރާނުން ދަނީ މަސައްކަތްތައް އިތުރަށް ފުޅާކުރަމުންނެވެ.

މީގެ އިތުރުން، މިދިޔަ އަހަރު އިޒްރޭލާއި އީރާނާ ދެމެދު ހިނގި 12 ދުވަހުގެ ހަނގުރާމައިގައި އެމެރިކާ އިން ބޮން އެޅި ނިއުކްލިއާ ސައިޓެއްގެ ފާހަގަކުރެވޭ ޓަނަލްތަކުގެ ދޮރުތައް އީރާނުން ފަސްއަޅައި ވަޅުލާފައިވާކަން ވެސް ފޮޓޯތަކުން ފެނެ އެވެ. އަދި އެހެން ސައިޓެއްގެ ކައިރީގައި ހުރި ޓަނަލްތަކުގެ ދޮރުތައް ވަރުގަދަކޮށް، ހަނގުރާމައިގައި ހަމަލާ އަމާޒުވި މިސައިލް ބޭސްތައް މަރާމާތުކޮށްފައިވާކަން ވެސް ފާހަގަކުރެވެ އެވެ.

މި ފޮޓޯތަކުން ހާމަވަނީ އީރާނާއި އެމެރިކާއާ ދެމެދު އުފެދިފައިވާ ނުތަނަވަސްކަމުގެ ތެރެއިން ނުރައްކާވެދާނެ މައިގަނޑު ސަރަހައްދުތަކުގައި ދިފާއު ވަރުގަދަ ކުރުމަށް އީރާނުން ކުރަމުންދާ މަސައްކަތްތައް ކަމަށް ތަޖުރިބާކާރުން ބުނެ އެވެ. އެމެރިކާއިން އީރާނުގެ ނިއުކްލިއާ ޕްރޮގްރާމާ ގުޅޭ އެއްބަސްވުމަކަށް އައުމަށް ފިއްތުންތައް އިތުރުކުރަމުން ދާއިރު، މަޝްވަރާތައް ނާކާމިޔާބުވެއްޖެ ނަމަ އަސްކަރީ ފިޔަވަޅު އަޅާނެ ކަމުގެ އިންޒާރު ވެސް އެމެރިކާގެ ރައީސް ޓްރަމްޕް ވަނީ ދީފަ އެވެ.

ޕަރްޗިން އަސްކަރީ ކޮމްޕްލެކްސް

ތެހެރާނުގެ އިރުދެކުނުން ގާތްގަނޑަކަށް 30 ކިލޯމީޓަރު (20 މޭލު) ދުރުގައި އޮންނަ ޕަރްޗިން ކޮމްޕްލެކްސް އަކީ އީރާނުގެ އެންމެ ނާޒުކު އެއް އަސްކަރީ ސައިޓެވެ. ހުޅަނގުގެ ޖާސޫސީ އިދާރާތަކުން ތުހުމަތުކުރާ ގޮތުގައި، މީގެ ވިހި އަހަރަށްވުރެ ގިނަ ދުވަސް ކުރިން އީރާނުން ވަނީ ނިއުކްލިއާ ބޮން ގޮއްވުމާ ގުޅޭ ޓެސްޓުތަކެއް އެތަނުގައި ހިންގާފަ އެވެ.

އީރާނުން އަބަދުވެސް ބުނަމުންދަނީ އެ ގައުމުން ނިއުކްލިއާ ހަތިޔާރު އުފައްދަން މަސައްކަތް ނުކުރާ ކަމަށެވެ. ނަމަވެސް، 2024 ވަނަ އަހަރުގެ އޮކްޓޫބަރު މަހު އިޒްރޭލުން ޕަރްޗިން އަށް ހަމަލާދިން ކަމަށް ރިޕޯޓުތައް ބުނެ އެވެ.

އެ ހަމަލާގެ ކުރިންނާއި ފަހުން ނަގާފައިވާ ސެޓެލައިޓް ފޮޓޯތަކުން ފެންނަ ގޮތުގައި، ޕަރްޗިންގައި ހުރި  ބިނާއަކަށް ބޮޑެތި ގެއްލުންތަކެއް ލިބިފައިވެ އެވެ. އަދި 2024 ނޮވެމްބަރު 6 ވަނަ ދުވަހުގެ ފޮޓޯތަކުން އެތަން އަލުން ބިނާކުރަމުންދާ މަންޒަރު ފެނެ އެވެ.

2025 އޮކްޓޫބަރު 12 ވަނަ ދުވަހުގެ ފޮޓޯތަކުން ފެންނަނީ އެ ސައިޓުގައި އާ އޮނިގަނޑެއްގެ މަސައްކަތް ކުރިއަށްދާ މަންޒަރާއި، އޭގެ ކައިރީގައި ހުރި ކުޑަ ދެ ބިނާއެކެވެ. ނޮވެމްބަރު 14 ވަނަ ދުވަހުގެ ފޮޓޯތަކުން ފެންނަ ގޮތުގައި، ބޮޑު ބިނާގެ މަތީގައި މެޓަލް ފުރާޅެއް ވަނީ އަޅާފަ އެވެ.

ނަމަވެސް، ޑިސެމްބަރު 13 ވަނަ ދުވަހުގެ ފޮޓޯތަކުން ފެންނަނީ އެ ފެސިލިޓީގެ ބައެއް ފޮރުވާފައިވާ މަންޒަރެވެ. އަދި ފެބްރުއަރީ 16 އާ ހަމައަށް އައިއިރު، އެތަން އެއްކޮށް ވަނީ ލޮލަށް ނުފެންނަ ވަރަށް ފޮރުވާލާފަ އެވެ. މާހިރުން ބުނާ ގޮތުގައި އެތަން ފޮރުވާލާފައިވަނީ ކޮންކްރީޓް ސްޓްރަކްޗަރެއް ބޭނުންކޮށްގެންނެވެ.

އިންސްޓިޓިއުޓް ފޯ ސައިންސް އެންޑް އިންޓަނޭޝަނަލް ސެކިއުރިޓީ (އައިސިސް) އިން ޖެނުއަރީ 22 ގައި ނެރުނު ދިރާސާއެއްގައި ބުނެފައިވަނީ، "ތަލޭގާން 2" ގެ ނަމުން ނަންދީފައިވާ އާ ފެސިލިޓީގެ ވަށައިގެން ކޮންކްރީޓް ސްޓްރަކްޗަރެއް ބިނާކުރުމުގެ މަސައްކަތް ކުރިއަށްދާ ކަމަށެވެ.

ނޮވެމްބަރު މަހު އައިސިސް އިން ރިޕޯޓުކުރި ގޮތުގައި، ފޮޓޯތަކުން ފެންނަނީ ގާތްގަނޑަކަށް 36 މީޓަރު ދިގު އަދި 12 މީޓަރު ފުޅާ ސިލިންޑަރެއްގެ ބައްޓަމަށް ހުރި ބޮޑު ޓޭންކެއް ނުވަތަ "ހައި-އެކްސްޕްލޯސިވް ކޮންޓެއިންމަންޓް ވެސެލް" އެއް އިމާރާތެއްގެ ތެރޭގައި ބަހައްޓާފައިވާ މަންޒަރެވެ.

އައިސިސް އިން އިތުރަށް ބުނި ގޮތުގައި، މިފަދަ ޓޭންކުތަކަކީ ނިއުކްލިއާ ހަތިޔާރު އުފެއްދުމަށް ކޮންމެހެން ބޭނުންތެރި އެއްޗެކެވެ. ނަމަވެސް މިއީ އާދައިގެ އެހެން ހަތިޔާރުތައް އުފެއްދުމުގައި ވެސް ބޭނުންކުރެވިދާނެ އެއްޗެކެވެ.

ކޮންޓެސްޓެޑް ގްރައުންޑްގެ އިމޭޖް އެނަލިސްޓް ވިލިއަމް ގުޑްހިންޑް ބުނި ގޮތުގައި، އެ އިމާރާތުގެ ފުރާޅުގެ ކުލަ ހުރީ ވަށައިގެންވާ ސަރަހައްދުގެ ކުލައާ އެއްގޮތަށެވެ. އޭނާ ލަފާކުރާ ގޮތުގައި ކޮންކްރީޓްގެ ކުލަ ފޮރުވުމަށްޓަކައި އޭގެ މައްޗަށް ވަނީ ފަސް އަޅާފަ އެވެ.

އައިސިސް ގެ ބާނީ ޑޭވިޑް އަލްބްރައިޓް އެކްސްގައި ލިޔުއްވާފައިވާ ގޮތުގައި، މަޝްވަރާތައް ލަސްކުރުމުގެ ފައިދާ އީރާނުން ދަނީ ނަގަމުންނެވެ. ފާއިތުވި ދެތިން ހަފުތާގެ ތެރޭގައި އީރާނުން ވަނީ "ތަލޭގާން 2" ފެސިލިޓީ ވަޅުލުމުގެ މަސައްކަތް ބާރަށް ކުރިއަށް ގެންގޮސްފަ އެވެ. އަދި މާލަސްތަކެއް ނުވެ އެތަން ވައިގެ ހަމަލާތަކުން ރައްކާތެރިކޮށްދޭ، ވަކިކުރަން ނޭނގޭ ފަދަ ބަންކަރަކަށް ބަދަލުވެގެންދާނެ ކަމަށް އޭނާ ވިދާޅުވި އެވެ.

އިސްފަހާން ނިއުކްލިއާ ކޮމްޕްލެކްސްގެ ޓަނަލްތައް ވަޅުލުން

އިސްފަހާން ކޮމްޕްލެކްސް އަކީ މިދިޔަ ޖޫން މަހު އެމެރިކާ އިން ބޮން އެޅި އީރާނުގެ ޔުރޭނިއަމް މުއްސަނދިކުރާ ތިން މަރުކަޒުގެ ތެރެއިން ތަނެކެވެ.

ނިއުކްލިއާ ފިއުލް ސައިކަލްގެ މަސައްކަތް ކުރާ ފެސިލިޓީތަކުގެ އިތުރުން، އިސްފަހާންގައި ބިމުގެ އަޑީގައި ހާއްސަ ސަރަހައްދެއް އޮވެ އެވެ. ޑިޕްލޮމެޓުން ބުނާ ގޮތުގައި އީރާނުން މުއްސަނދިކޮށްފައިވާ ޔުރޭނިއަމްގެ ބޮޑު ބައެއް ރައްކާކޮށްފައިވަނީ އެތަނުގަ އެވެ.

ޖެނުއަރީ މަހުގެ ފަހުކޮޅު ނަގާފައިވާ ސެޓެލައިޓް ފޮޓޯތަކުން ފެންނަ ގޮތުގައި، އެ ކޮމްޕްލެކްސްގެ ޓަނަލްގެ ދެ ދޮރެއް ވަޅުލުލާ ފޮރުވާލުމުގެ މަސައްކަތް އީރާނުން ވަނީ ފަށާފަ އެވެ. ފެބްރުއަރީ 9 ގައި އައިސިސް އިން ބުނި ގޮތުގައި، ތިންވަނަ ދޮރެއް ވެސް މިހާރު ވަނީ ފަސްއަޅައި ފޮރުވާލާފައެވެ. މިއާއެކު އެ ޓަނަލް ކޮމްޕްލެކްސް އަށް ވަންނަން ހުރި ހުރިހާ ދޮރުތަކެއް މިހާރު ވަނީ އެއްކޮށް ވަޅުލާފަ އެވެ.

ފެބްރުއަރީ 10 ވަނަ ދުވަހުގެ ފޮޓޯތަކުން ވެސް މި ތިން ޓަނަލް ވަޅުލާފައިވާކަން ފެންނަން ހުރި ކަމަށް ގުޑްހިންޑް ބުންޏެވެ.

އައިސިސް އިން ބުނާ ގޮތުގައި، ޓަނަލްތަކުގެ ދޮރުތައް ވަޅުލުމަކީ ވައިގެ ހަމަލާތަކުން ލިބޭ ގެއްލުން ކުޑަކުރުމަށާއި، ހާއްސަ ސިފައިންގެ ފައުޖަކުން އެތަނަށް ވަދެ ޔުރޭނިއަމް އަތުލައިގަތުމަށް ނުވަތަ އެތަން ހަލާކުކޮށްލުމަށް ކުރާ މަސައްކަތްތަކަށް ހުރަސް އެޅުމަށް ކުރާ ކަމެކެވެ.

ނަތާންޒް ކައިރީގައި ހުރި ޓަނަލްތަކުގެ ދޮރުތައް ވަރުގަދަކުރުން

ނަތާންޒްގައި ހުންނަ އީރާނުގެ ޔުރޭނިއަމް މުއްސަނދިކުރާ އަނެއް ދެ މަރުކަޒާ ދެ ކިލޯމީޓަރު (1.2 މޭލު) ދުރުގައި، ފަރުބަދައެއްގެ އަޑީގައި ހުރި ޓަނަލް ކޮމްޕްލެކްސްއެއްގެ ދެ ދޮރެއް ވަރުގަދަކުރުމުގެ މަސައްކަތް ފެބްރުއަރީ 10 އިން ފެށިގެން އީރާނުން ކުރަމުންދާ ކަމަށް އައިސިސް އިން ވަނީ ރިޕޯޓުކޮށްފަ އެވެ.

ސެޓެލައިޓް ފޮޓޯތަކުން ފެންނަ ގޮތުގައި، އެ ސަރަހައްދުގައި ގިނަ އަދަދެއްގެ ޑަމްޕް ޓްރަކްތަކާއި، ސިމެންތި ގަށާ މެޝިންތަކާއި، ބަރު މެޝިނަރީތައް ބޭނުންކޮށްގެން ބާރަށް މަސައްކަތް ކުރަމުންދެއެވެ.

"ޕިކްއެކްސް މައުންޓަން" ގެ ނަމުން ނަންދީފައިވާ މި ފެސިލިޓީއާ މެދު އީރާނުން ގެންގުޅޭ ރޭވުންތަކެއް އަދި ސާފެއް ނޫނެވެ.

ޝީރާޒް މިސައިލް ބޭސް

އީރާނުގެ ދެކުނުގައިވާ ޝީރާޒްގެ ދެކުނުން 10 ކިލޯމީޓަރު (6 މޭލު) ދުރުގައި އޮންނަ މި ބޭސްއަކީ، މެދު ރާސްތާގެ ބެލިސްޓިކް މިސައިލް ފޮނުވާލުމުގެ ގާބިލްކަން ހުރި އީރާނުގެ މައިގަނޑު 25 ބޭސްގެ ތެރެއިން އެއް ތަނެވެ. އިޒްރޭލުގެ "އަލްމާ ރިސާޗް އެންޑް އެޑިއުކޭޝަން ސެންޓަރު" އިން ބުނާ ގޮތުގައި، މިދިޔަ އަހަރުގެ ހަނގުރާމައިގައި މި ބޭސްގެ ބިމުން މަތީގައި ހުރި ބައެއް ތަންތަނަށް ވަނީ ކުޑަ ގެއްލުމެއް ލިބިފަ އެވެ.

2025 ޖުލައި 3 އަދި 2026 ޖެނުއަރީ 30 ގެ ފޮޓޯތައް އަޅާކިޔުމުން، އެ ބޭސްގެ މައި ލޮޖިސްޓިކްސް އަދި ކޮމާންޑް ސަރަހައްދު އަލުން ބިނާކޮށް، ސާފުކުރުމުގެ މަސައްކަތް ކުރަމުންދާކަން އެނގޭ ކަމަށް ގުޑްހިންޑް ބުންޏެވެ.

ނަމަވެސް، ވައިގެ ހަމަލާތަކުގެ ކުރިން އެތަން ހުރި ފުރިހަމަ ހާލަތަށް އަދިވެސް ބަދަލުނުވާ ކަމަށް އޭނާ ފާހަގަކުރި އެވެ.

ގޮމް މިސައިލް ބޭސް

ގޮމް ސިޓީގެ އުތުރުން 40 ކިލޯމީޓަރު ދުރުގައި އޮންނަ މި ބޭސްގެ ބިމުން މަތީގައި ހުރި ބިނާތަކަށް މެދު މިންވަރެއްގެ ގެއްލުން ލިބިފައިވާ ކަމަށް އަލްމާ ސެންޓަރުން ބުނެ އެވެ.

2025 ޖުލައި 16 އާއި 2026 ފެބްރުއަރީ 1 އާ ދެމެދު ނަގާފައިވާ ފޮޓޯތަކުން ފެންނަ ގޮތުގައި، ގެއްލުން ލިބިފައިވާ އިމާރާތެއްގެ މަތީގައި ވަނީ އާ ފުރާޅެއް އަޅާފަ އެވެ. ގުޑްހިންޑް ބުނާ ގޮތުގައި، ފުރާޅު މަރާމާތުކުރުމުގެ މަސައްކަތް ނޮވެމްބަރު 17 ގައި ފަށައި، 10 ދުވަސް ތެރޭގައި ވަނީ ނިންމާލާފަ އެވެ.