އީރާނާއި ރަޝިޔާ ގުޅިގެން ކަނޑުމަތީގެ އަސްކަރީ ތަމްރީނު ފަށަނީ
މި ހަރަކާތްތަކާ ގުޅިގެން ސްޓްރެޓެޖިކް ގޮތުން މުހިންމު ހޯމޫޒް ކަނޑުއޮޅީގެ ބައެއް ސަރަހައްދުތައް ވަގުތީގޮތުން ބަންދުކުރުމަށް ވެސް އީރާނުން ވަނީ ނިންމާފައި.
އީރާނުގެ އަސްކަރިއްޔާއިން 12 މާރިޗު 2025 ގައި އާންމުކޮށްފައިވާ މި ފޮޓޯއިން ފެންނަނީ، އޮމާން ކަނޑުގައި ކުރިއަށްދިޔަ އަސްކަރީ ތަމްރީނެއްގެ ތެރެއިން އެ ގައުމުގެ ކަނޑުގެ ސިފައިން މޮޓޯ ބޯޓެއްގައި ހަރަކާތްތެރިވާ މަންޒަރު. | އޭއެފްޕީ
ޖެނީވާގައި އީރާނާއި އެމެރިކާއާ ދެމެދު ކުރިއަށްދިޔަ މަޝްވަރާތަކުގެ ފަހުގެ ބުރު ނިމުނުތަނުން، އީރާނާއި ރަޝިޔާ ގުޅިގެން އޮމާން ކަނޑުގައި އަސްކަރީ ތަމްރީނުތަކެއް ބުރާސްފަތި ދުވަހު ފެށުމަށް ހަމަޖެހިފައިވާ ކަމަށް އީރާނުގެ މީޑިއާތަކުން ރިޕޯޓްކޮށްފި އެވެ.
އީރާނުގެ އަސްކަރިއްޔާ ގެ ފިކުރީ ގޮފި ކަމުގައިވާ އިސްލާމިކް ރިވެލޫޝަނަރީ ގާޑް ކޯޕްސް (އައިއާރްޖީސީ) އިން ވަނީ، އެ ސަރަހައްދުގައި ހަރަކާތްތެރިވާ އެމެރިކާގެ ކަނޑުގެ ސިފައިންނަށް ގޮންޖަހައި، ސްޓްރެޓެޖިކް ގޮތުން މުހިންމު ހޯމޫޒް ކަނޑުއޮޅީގައި މިދިޔަ ހޯމަ ދުވަހު ވެސް ތަމްރީނުތަކެއް ފަށާފައެވެ.
އީރާން އާއި ރަޝިޔާ ގުޅިގެން ހިންގާ ކަނޑުގެ އަސްކަރީ ތަމްރީނުތައް މާދަމާ (ބުރާސްފަތި ދުވަހު) އޮމާން ކަނޑާއި އިންޑިއާ ކަނޑުގެ އުތުރު ސަރަހައްދުގައި ކުރިއަށްދާނެ ކަމަށް، ތަމްރީނުތަކުގެ ތަރުޖަމާނު ރިއަރ އެޑްމިރަލް ހަސަން މަޣްސޫދުލޫ އާ ހަވާލާދީ 'އިސްނާ' ނިއުސް އެޖެންސީން ވަނީ ރިޕޯޓްކޮށްފަ އެވެ.
މި ތަމްރީނުތައް ކުރިއަށްދާނެ މުއްދަތެއް ހާމަނުކޮށް އޭނާ ވިދާޅުވީ، މި ހަރަކާތުގެ މަގްސަދަކީ ކަނޑުގެ ސަލާމަތާއި ރައްކާތެރިކަން ވަރުގަދަކުރުމާއި، ދެ ގައުމުގެ ކަނޑުގެ ސިފައިންގެ މެދުގައި އޮތް ގުޅުން އިތުރަށް ބަދަހިކުރުން ކަމަށެވެ.
މި އަސްކަރީ ތަމްރީނުތައް މި ފަށަނީ، އޮމާން މެދުވެރިވެގެން ޖެނީވާގައި މިދިޔަ އަންގާރަ ދުވަހު ބޭއްވި މަޝްވަރާތަކުގެ ދެވަނަ ބުރަށްފަހު، އީރާނުން އެކަމާ މެދު އުންމީދީ ރޫހެއްގައި ވާހަކަދައްކާފައިވާ ދަނޑިވަޅެއްގަ އެވެ.
ވާދަވެރި ދެ ގައުމުގެ މެދުގައި މީގެ ކުރިން ބޭއްވި މަޝްވަރާތައް ހުއްޓުމަކަށް އައީ، 2025 ވަނަ އަހަރުގެ ޖޫން މަހު އިޒްރޭލުން އީރާނަށް ދިން ވަރުގަދަ ހަމަލާއާ ގުޅިގެންނެވެ. އެ ހަމަލާއާ ގުޅިގެން 12 ދުވަހުގެ ހަނގުރާމައެއް ފެށުނުއިރު، އެމެރިކާއިން ވެސް ވަނީ ކުޑަ ވަގުތުކޮޅަކަށް އެ ހަނގުރާމައިގައި ބައިވެރިވެފަ އެވެ.
މިހާރު އަނެއްކާވެސް މަސްރަހް ހޫނުވެ އެމެރިކާގެ ރައީސް ޑޮނަލްޑް ޓްރަމްޕް ވަނީ އެ ސަރަހައްދަށް ކަނޑުގެ ސިފައިންގެ ބޮޑު ފައުޖެއް ފޮނުއްވާފަ އެވެ.
އެމެރިކާއާ ދެމެދު ނުތަނަވަސްކަން ބޮޑުވާ ދަނޑިވަޅުތަކުގައި، ހޯމޫޒް ކަނޑުއޮޅި ބަންދުކުރާނެ ކަމުގެ އިންޒާރު އީރާނުގެ އޮފިޝަލުން ތަކުރާރުކޮށް ދެއްވަމުން ގެންދެވި ނަމަވެސް، މިހާތަނަށް އެ ސަރަހައްދު މުޅިން ބަންދުކޮށްފައެއް ނުވެ އެވެ.
ދުނިޔޭގެ ބާޒާރަށް ތެލާއި ގޭސް ސަޕްލައިކުރުމުގައި މުހިންމު ދައުރެއް އަދާކުރާ ހޯމޫޒް ކަނޑުއޮޅިއަކީ މީގެ ކުރިންވެސް ނުރައްކާތެރި އެތައް ހާދިސާތަކެއް ހިނގާފައިވާ ތަނެކެވެ. އަދި އެމެރިކާއާއި އީރާނުގެ މަޝްވަރާތަކާ ގުޅިގެން ފިއްތުންތައް އިތުރުވެފައިވާ މި ދަނޑިވަޅުގައި، އެ ސަރަހައްދަށް ވަނީ އަނެއްކާވެސް ދުނިޔޭގެ ސަމާލުކަން ހުއްޓިފަ އެވެ.
އީރާނުން ހޯމޫޒް ކަނޑުއޮޅީގައި ކުރިއަށްގެންދާ އަމިއްލަ ތަމްރީނުތަކާ ގުޅިގެން، "ސަލާމަތީ" ސަބަބުތަކަށްޓަކައި އެ ކަނޑުއޮޅީގެ ބައެއް ސަރަހައްދުތައް މަދު ގަޑިއިރުތަކަކަށް ބަންދުކުރާނެ ކަމަށް އެ ގައުމުން މިދިޔަ އަންގާރަ ދުވަހު ވަނީ އިއުލާންކޮށްފައެވެ.
