އީރާން އިން މުއްސަނދި ކޮށްފައިވާ ހުރިހާ ޔުރޭނިއަމެއް ބޭރު ކުރަން ޖެހޭނެ: ނަތަންޔާހޫ

އެމެރިކާ އާއި އީރާންއާ ދެމެދު އެކުލަވާލާ  އެއްބަސްވުމެއްގެ ދަށުން، އީރާންގައި މުއްސަނދި ކޮށްފައިވާ ހުރިހާ ޔުރޭނިއަމްއެއް އެ ޤައުމުން ބޭރު ކުރަން ޖެހޭނެ ކަމަށް އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ. 

އާދީއްތަ ދުވަހު ޖެރޫސަލަމްގައި އޮތް ރަސްމިއްޔާތެއްގައި ވާހަކަ ދައްކަވަމުން ނަތަންޔާހޫ ވިދާޅުވީ، އީރާންއާ އެކު ވެވޭ އެއްބަސްވުމެއްގައި މައިގަނޑު ތިން ކަމެއް ހިމެނެން ޖެހޭނެ ކަމަށެވެ. އެގޮތުން ފުރަތަމަ ކަމަކީ، މުއްސަނދި ކޮށްފައިވާ ހުރިހާ ޔުރޭނިއަމްއެއް އީރާން އިން ބޭރު ކުރުން ކަމަށާއި، ދެ ވަނަ ކަމަކީ ޔުރޭނިއަމް މުއްސަނދި ކުރުމުގެ ޤާބިލުކަން އެ ޤައުމުގައި ނުބޭއްވުން ކަމަށް އޭނާ ފާހަގަ ކުރެއްވި އެވެ. އަދި ތިން ވަނަ ކަމަކީ، އީރާންގެ ބެލިސްޓިކް މިސައިލް ޕްރޮގްރާމްގެ މައްސަލަ އަށް ޙައްލެއް ހޯދުން ކަމަށް ވެސް އޭނާ ވިދާޅުވި އެވެ. 

ނަތަންޔާހޫ މި ވާހަކަތައް ދައްކަވާފައި މި ވަނީ، އީރާން އާއި އެމެރިކާއާ ދެމެދު ކުރިއަށްދާ މަޝްވަރާ ތަކުގެ ދެ ވަނަ ބުރުގެ ބައްދަލުވުން ބާއްވަން ތައްޔާރުވެފައި ވަނިކޮށެވެ. އެގޮތުން އަންގާރަ ދުވަހު ސްވިޒަލެންޑުގެ ޖެނީވާގައި ބައްދަލުވުން އޮންނައިރު، އީރާންގެ ޚާރިޖީ ވަޒީރު އައްބާސް އަރާގްޗީ ވަނީ އެ ޤައުމަށް ފުރައި ވަޑައިގެންފަ އެވެ. 

އެމެރިކާގެ ސީބީއެސް ނިއުސް އިން ރިޕޯޓު ކޮށްފައިވާ ގޮތުގައި، މިދިޔަ އަހަރުގެ ޑިސެމްބަރު މަހުގެ ފަހު ކޮޅު އެމެރިކާގެ ފްލޮރިޑާގައި ބޭއްވި ބައްދަލުވުމެއްގައި އެމެރިކާގެ ރައީސް ޑޮނަލްޑް ޓްރަމްޕް ވަނީ ނަތަންޔާހޫ އަށް ޔަޤީންކަމެއް ދެއްވައިފަ އެވެ. އެގޮތުން އެމެރިކާ އިން އީރާންއާ ދެމެދު އެއްބަސްވުމަކަށް ނާދެވިއްޖެ ނަމަ، އީރާންގެ ބެލިސްޓިކް މިސައިލް މަރުކަޒު ތަކަށް އިޒްރޭލް އިން ދޭ ހަމަލާ ތަކަށް އެމެރިކާ އިން ތާއީދު ކުރާނެ ކަމަށް ޓްރަމްޕް ވިދާޅުވެފައިވާ ކަމަށް ވަނީ ރިޕޯޓު ކޮށްފަ އެވެ. 

އެމެރިކާ އާއި އިޒްރޭލް އެކުވެގެން މިދިޔަ އަހަރުގެ ތެރޭގައި ެވސް ވަނީ އީރާން އަށް އަމާޒުކޮށް ހަމަލާ ދީފަ އެވެ. މިދިޔަ އަހަރުގެ ޖޫން މަހުގެ ތެރޭގައި ބައިނަލްއަޤުވާމޫ ނިއުކްލިއާ އެޖެންސީގެ އިންސްޕެކްޓަރުން ބެލި ބެލުމުން، އީރާންގައި 60 އިންސައްތައާ ހަމައަށް މުއްސަނދި ކޮށްފައިވާ 400 ކިލޯ ގްރާމް އަށް ވުރެ ގިނަ ޔުރޭނިއަމް ހުއްޓެވެ. ނަމަވެސް، މިހާރު އެ ތަކެއްޗަށް ވީ ގޮތެއް ނޭނގޭތީ ބޮޑެތި ކަންބޮޑުވުން ތަކެއް ވަނީ އުފެދިފަ އެވެ. ނަތަންޔާހޫގެ ވާހަކައިގައި ވިދާޅުވެފައި ވަނީ، އެންމެ ފަހުން ޓްރަމްޕް އާއެކު ބޭއްވި ބައްދަލުވުމުގައި ވެސް އެ ވާހަކަ ހިއްސާ ކޮށްފައި ވާނެ ކަމަސް ނަތަންޔާހޫ ވިދާޅުވި އެވެ. 

މީގެ އިތުރުން ނަތަންޔާހޫ ވަނީ އީރާންގެ ނިއުކްލިއާ މަސައްކަތްތައް ހުއްޓުމެއް ނެތި ބެލެހެއްޓުމަށް ގޮވާލައްވައިފަ އެވެ. އޭނާ ވިދާޅުވީ އެއްބަސްވުމެއް ކާމިޔާބުވުމަށްޓަކައި، ކުރިން އެންގުމަކާ ނުލައި ކޮންމެ ވަގުތަކު ވެސް ކުރެވޭ ފަދަ ޚަރުދަނާ އަދި ނަތީޖާ ނެރެވޭނެ ފަދަ އިންސްޕެކްޝަން ތަކެއް ހިންގަން ޖެހޭނެ ކަމަށެވެ. 

މިދިޔަ އަހަރު އީރާން އާއި އެމެރިކާއާ ދެމެދު ކުރިއަށް ގެންދިޔަ މަޝްވަރާތައް މެދު ކެނޑުނުއިރު، އަލުން އެ މަޝްވަރާތައް ފަށާފައި ވަނީ މި ހިނގާ ފެބްރުވަރީ މަހުގެ ހަ ވަނަ ދުވަހު އެވެ. މިދިޔަ އަހަރުގެ މަޝްވަރާތައް މެދު ކެނޑުނީ، އިޒްރޭލް އާއި އެމެރިކާ އިން އީރާން އަށް އަމާޒުކޮށް ހަމަލާ ދިނުމުން ފެށުނު 12 ދުވަހުގެ ހަނގުރާމައިގެ ސަބަބުންނެވެ.