އީރާން އިން ޗައިނާ އަށް ކުރާ ތެލުގެ އެކްސްޕޯޓު ހުއްޓުވުމަށް ޓްރަމްޕް އާއި ނަތަންޔާާހޫ އެއްބަސްވުމަކަށް
15 ފެބުރުއަރީ 2026 | އާދީއްތަ 08:24ހޮނިހިރު ދުވަހު އެކްސިއޯސް އިން ރިޕޯޓު ކުރި ގޮތުގައި، އީރާންއާ ދެކޮޅަށް މެކްސިމަމް ޕްރެޝަރުގެ ސިޔާސަތު ފުރިހަމަ ބާރެއްގެ ގޮތުގައި ތަންފީޒު ކުރުމަށް ޓްރަމްޕް އާއި ނަތަންޔާހޫ އެއްބަސްވެ ވަޑައިގެންފައިވާ ކަމަށް، އެމެރިކާގެ އިސް އޮފިޝަލަކު މައުލޫމާތު ދީފައިވާ ކަމަށް.
އެމެރިކާގެ ރައީސް ޑޮނަލްޑް ޓްރަމްޕް އާއި، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ. | ގެޓީ އިމޭޖަސް
އީރާން އިން ޗައިނާ އަށް ކުރަމުން އަންނަ ތެލުގެ އެކްސްޕޯޓު ކުޑަ ކުރުމަށް، ނުވަތަ ހުއްޓުވުމަށް އެމެރިކާ އިން މަސައްކަތް ކުރުމަށް، އެމެރިކާގެ ރައީސް ޑޮނަލްޑް ޓްރަމްްޕް އާއި އިޒްރޭލްގެ ބޮޑު ވަޒީރު ބެންޖަމިން ނަަތަންޔާހޫ އެއްބަސްވުމަށް އައިސްފައިވާ ކަމަށް ރިޕޯޓު ކޮށްފި އެވެ.
މިދިޔަ ހަފުތާގެ ބުދަ ދުވަހު، އެމެރިކާގެ ރިޔާސީ ގަނޑުވަރު ވައިޓް ހައުސްގައި ޓްރަމްޕް އާއި ނަތަންޔާހޫ ބައްދަލު ކުރައްވާފައިވާއިރު، އެކްސިއޯސް އިން ބުނެފައި ވަނީ އެކަން ކުރުމަށް ދެ ލީޑަރުން އެއްބަސްވެ ވަޑައިގެންފައިވާ ކަމަށެވެ. އެކަން ރިޕޯޓު ކޮށްފައި ވަނީ، އެ މައްސަލައާ ގުޅޭ ގޮތުން ލިބިފައިވާ މައުލޫމާތާއި، އެމެރިކާގެ ދެ އޮފިޝަލެއްގެ ފަރާތުން ލިބިފައިވާ މައުލޫމާތުގެ މައްޗަށް ބިނާ ކޮށެވެ.
ހޮނިހިރު ދުވަހު އެކްސިއޯސް އިން ރިޕޯޓު ކުރި ގޮތުގައި، އީރާން އާ ދެކޮޅަށް "މެކްސިމަމް ޕްރެޝަރުގެ ސިޔާސަތު" ފުރިހަމަ ބާރެއްގެ ގޮތުގައި ތަންފީޒު ކުރުމަށް ޓްރަމްޕް އާއި ނަތަންޔާހޫ އެއްބަސްވެ ވަޑައިގެންފައިވާ ކަމަށް، އެމެރިކާގެ އިސް އޮފިޝަލަކު މައުލޫމާތު ދީފައިވާ ކަމަށެވެ. އެގޮތުން އެންމެ ފުރަތަމަ މަސައްކަތް ކުރާނީ އީރާން އިން ޗައިނާ އަށް ކުރާ ތެލުގެ އެކްސްޕޯޓު ކުޑަ ކުރުމަށް ކަމަށާއި، އެއަށް ފަހު އެއްކޮށް ހުއްޓުވާލުމަށް މަސައްކަތް ކުރާނެ ކަމަށް ވެސް އޭނާ ވަނީ ބުނެފަ އެވެ.
އީރާން އިން އެކްސްޕޯޓު ކުރާ ތެލުގެ ވިޔަފާރީގެ 80 އިންސައްތަ އަށް ވުރެ ބޮޑު ބައެއް ޗައިނާ އިން ގަނެ އެވެ. މި ވިޔަފާރީ ކުޑަ ކޮށްފި ނަމަވެސް، އީރާން އަށް ލިބޭ ތެލުގެ އާމްދަނީ ދަށް ވާނެ ކަމަަށް މާހިރުން ވަނީ ފާހަގަ ކޮށްފަ އެވެ. އެމެރިކާ އިން އެކަން ކުރަނީ، އިޒްރޭލް އިން ވަރަށް ބޮޑަށް އެކަމަށް ބާރު އަޅަމުން ގެންދާތީ ކަމަށް ވެސް ބުނެފައިވެ އެވެ.
މި މައްސަލައާ ގުޅިގެން ޗައިނާގެ ފޮރިން މިނިސްޓްރީގެ ކޮމެންޓެއް ހޯދުމަށް މަސައްކަތް ކުރި ނަމަވެސް، އެ މިނިސްޓްރީ އިން ވަކި އެއްޗެއް ބުނެފައި ނުވާ ކަމަށް އެކްސިއޯސް އިން ބުނެފައިވެ އެވެ.
އީރާންއާ ދެކޮޅަށް އެމެރިކާ އިން ގެންދަނީ ދަތި ކުރުމުގެ ފިޔަވަޅު ތަކެއް އަޅަމުންނެވެ. އެމެރިކާގެ މި އަމަލު ތަކުގެ ސަބަބުން މެދު އިރުމަތީގެ ސަރަހައްދުގައި ނުތަނަވަސްކަމެއް އުފެދޭނެ ކަމަށް މާހިރުން ފާހަގަ ކޮށްފައިވާއިރު، އެކަމުގެ ސަބަބުން އީރާންގެ އިޤްތިޞާދަށް ވެސް ނޭދެވޭ އަސަރު ކުރާނެ ކަމަށް ފާހަގަ ކޮށްފައިވެ އެވެ.
މަސްދަރު: ރޮއިޓާސް
