އިޒްރޭލް އިން، ޓްރަމްޕްގެ ބޯޑު އޮފް ޕީސްއާ ގުޅިއްޖެ
އިޒްރޭލް އިން އަންނަނީ ނަސްލު ނައްތާލުމާއި، ހަނގުރާމައިގެ ކުށް ތަކެއް ހިންގަމުން ކަމަށާއި، ސުލްޙަ އަށް އުފައްދާ ބޯޑަކުން އެފަދަ ޤައުމަކަށް ފުރުސަތު ދިނުމަކީ ޤަބޫލު ކުރެވޭނެ ކަމެއް ނޫން ކަމަށް ބުނެ، ފަލަސްޠީނުގެ ހައްގުގައި މަސައްކަތް ކުރާ އެތައް ބަޔަކު ވަނީ ނުރުހުން ފާޅު ކޮށްފައި.
އިޒްރޭލްގެ ބޮޑު ވަޒީރު ނަތަންޔާހޫ އާއި، އެމެރިކާގެ ރައީސް ޓްރަމްޕް | ރޮއިޓާސް
އެމެރިކާގެ ރައީސް ޑޮނަލްޑް ޓްރަމްޕް އުފައްދަވާފައިވާ ބޯޑު އޮފް ޕީސްއާ ގުޅިފައިވާ ކަމަށް، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ.
ނަތަންޔާހޫ މިހެން ވިދާޅުވެފައި ވަނީ، ބުދަ ދުވަހު އެމެރިކާގެ ރައީސް ޓްރަމްޕް އާއި، ސެކްރެޓަރީ އޮފް ސްޓޭޓް މާކޯ ރޫބިއޯއާ އެކު ރިޔާސޫ ގަނޑުވަރުގައި ބޭއްވި ބައްދަލުވުމަށް ފަހު އެވެ. އެއަށް ފަހު ނަތަންޔާހޫ ވަނީ އެ ބޯޑުގައި އިޒްރޭލް އިން ބައިވެރިވެފައިވާ ކަމަށް އިއުލާން ކުރައްވައިފަ އެވެ.
ނަތަންޔާހޫ އާއި ރޫބިއޯ ބައްދަލު ކުރައްވާފައިވާއިރު، އާންމު ކޮށްފައިވާ ވީޑިއޯ ތަކުން ފެންނަ ގޮތުގައި ބޯޑު އޮފް ޕީސްގައި ބައިވެރިވުމުގެ ލިޔުމުގައި ނަތަންޔާހޫ ވަނީ ސޮއި ކުރައްވައިފަ އެވެ. އެއަށް ފަހު ނަތަންޔާހޫ އެކްސްގައި ކުރެއްވި ޕޯސްޓެއްގައި ވަނީ، ބޯޑު އޮފް ޕީސްގައި އިޒްރޭލް އިން ބައިވެރިވެ، އެ ބޯޑުގެ އެއްބަސްވުމުގައި ސޮއި ކޮށްފައިވާކަން ކަށަވަރު ކޮށްދެއްވައިފަ އެވެ.
އެއަށް ފަހު ނަތަންޔާހޫ އާއި، ޓްރަމްޕް ވަނީ އީރާންގެ މައްސަލައާ ގުޅޭ ގޮތުން ވެސް މަޝްވަރާ ކުރައްވައިފަ އެވެ. އެމެރިކާ އަށް ވަޑައިގެންނެވުމުގެ ކުރިން ވެސް، ނަތަންޔާހޫ ވަނީ އެ ދަތުރުފުޅުގައި އީރާންގެ މައްސަލައިގައި ޓްރަމްޕްއާ މަޝްވަރާ ކުރައްވާނެ ކަމަށް ވިދާޅުވެފަ އެވެ.
މިދިޔަ އަހަރުގެ ނޮވެމްބަރު މަހުގެ ތެރޭގައި އދ.ގެ ސަލާމަތީ މަޖިލީހުން ފާސް ކުރި ޤަރާރެއްގެ ދަށުން، ޣައްޒާގައި ބައިނަލްއަޤުވާމީ ސަލާމަތީ ބާރެއް ޤާއިމު ކުރުމުގެ އިޚުތިޔާރު އެ މަޖިލީހަށާއި، އެ މަޖިލީހާ ގުޅިގެން މަސައްކަތް ކުރާ ޤައުމު ތަކަށް ވަނީ ދީފަ އެވެ. ޣައްޒާގައި މިހާރު އޮތް ނާޒުކު ޙާލަތާއި، ދެމުން އަންނަ ހަމަލާތައް ހުއްޓާލުމަށް އެކުލަވާލާފައިވާ އެއްބަސްވުމަކީ ޓްރަމްޕްގެ އިސް ނެންގެވުމުގެ މަތިން، މިދިޔަ އަހަރުގެ އޮކްޓޫބަރު މަހުގެ ތެރޭގައި އެކުލަވާލި އެއްބަސްވުމެކެވެ.
ޓްރަމްޕްގެ ބޯޑު އޮފް ޕީސްގައި އިޒްރޭލް ބައިވެރި ވާނެ ކަމަށް މީގެ ކުރިން ވެސް ރިޕޯޓު ކޮށްފައިވާއިރު، ބައިނަލްއަޤުވާމީ ގިނަ ބަޔަކު ވަނީ އެކަމުގެ ކަންބޮޑުވުން ފާޅު ކޮށްފަ އެވެ. އެގޮތުން އިޒްރޭލް އިން އަންނަނީ ނަސްލު ނައްތާލުމާއި، ހަނގުރާމައިގެ ކުށް ތަކެއް ހިންގަމުން ކަމަށާއި، ސުލްޙަ އަށް އުފައްދާ ބޯޑަކުން އެފަދަ ޤައުމަކަށް ފުރުސަތު ދިނުމަކީ ޤަބޫލު ކުރެވޭނެ ކަމެއް ނޫން ކަމަށް ބުނެ، ފަލަސްޠީނުގެ ހައްގުގައި މަސައްކަތް ކުރާ އެތައް ބަޔަކު ވަނީ ނުރުހުން ފާޅު ކޮށްފަ އެވެ.
މަސްދަރު: ރޮއިޓާސް
