ނަތަންޔާހޫ ގެ އެމެރިކާ ދަތުރުފުޅުގައި އިސްކަންދެއްވާނީ އީރާނާ އެކު ކުރިއަށްދާ މަޝްވަރާތަކާ މެދު އިޒްރޭލުން ދެކޭ ގޮތް ހާމަ ކުރަން
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އެމެރިކާ އަށް ކުރައްވާ ދަތުރުފުޅުގައި ރައީސް ޓްރަމްޕާ ބައްދަލުކުރައްވައި، ޣައްޒާގެ މައްސަލަ އާއި ސަރަހައްދީ މަސްލަހަތާ ގުޅޭގޮތުން މަޝްވަރާކުރެއްވުމަށް ވަނީ ހަމަޖެހިފައި. މި ބައްދަލުވުމުގައި އެންމެ ބޮޑު އިސްކަމެއް ދެއްވާނީ އީރާނާއެކު ކުރިއަށްދާ މަޝްވަރާތަކާ މެދު އިޒްރޭލުން ދެކޭގޮތް ހުށަހެޅުއްވުމަށް.
ރައީސް ޑޮނަލްޑް ޓްރަމްޕް އަދި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ. | އޭޕީ
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ މި ހަފުތާގައި އެމެރިކާގެ ވޮޝިންޓަނަށް ކުރައްވާ ދަތުރުފުޅުގައި، އެމެރިކާގެ ރައީސް ޑޮނަލްޑް ޓްރަމްޕާ ބައްދަލުކުރައްވައި އީރާނާއެކު ކުރިއަށްދާ މަޝްވަރާތަކާ ގުޅޭގޮތުން ވާހަކަދެއްކުމަށް އިސްކަންދެއްވާނެ ކަމަށް އަންގާރަ ދުވަހު ވިދާޅުވެއްޖެ އެވެ.
ބުދަ ދުވަހު ރައީސް ޓްރަމްޕާ ބައްދަލުކުރެއްވުމަށް އެމެރިކާ އަށް ފުރާވަޑައިގަތުމުގެ ކުރިން ނަތަންޔާހޫ ވިދާޅުވީ، މި ދަތުރުފުޅުގައި ޣައްޒާގެ މައްސަލައާއި ސަރަހައްދީ މަސްލަހަތާ ގުޅުންހުރި ގިނަ ކަންތައްތަކަކާ ބެހޭގޮތުން މަޝްވަރާ ކުރައްވާނެ ކަމަށެވެ. ނަމަވެސް އެންމެ ބޮޑު އިސްކަމެއް ދެއްވާނީ އީރާނާއެކު ކުރިއަށްދާ މަޝްވަރާތަކަށް ކަމަށާއި، އެ މަޝްވަރާތައް ބިނާވާންޖެހޭ އުސޫލުތަކާ މެދު އިޒްރޭލުން ދެކޭގޮތް ރައީސް ޓްރަމްޕަށް ހުށަހަޅުއްވާނެ ކަމަށްވެސް ނަތަންޔާހޫ ވިދާޅުވި އެވެ.
މި ދެ ބޭފުޅުން ބައްދަލުކުރައްވަނީ، ދެކޮޅުވެރި ދެ ގައުމު ކަމަށްވާ އީރާނާއި އެމެރިކާއާ ދެމެދު މިދިޔަ ހަފުތާގައި އޮމާންގައި މަޝްވަރާތަކެއް ބޭއްވިތާ މަދު ދުވަސްކޮޅެއްގެ ތެރޭގަ އެވެ. އެ މަޝްވަރާތަކަށްފަހު ރައީސް ޓްރަމްޕް ވަނީ އީރާނާއެކު އިތުރު ބުރެއްގެ މަޝްވަރާތައް ކުރިއަށްދާނެ ކަމަށް ވިދާޅުވެފަ އެވެ.
