ނަތަންޔާހޫ އެމެރިކާ އަށް ކުރައްވާ ދަތުރުގެ ސަބަބުން ޑިޕްލޮމެޓިކް މަސައްކަތްތަކަށް "ނޭދެވޭ" ނުފޫޒުތަކެއް ފޯރަފާނެ ކަމުގެ އިންޒާރު އީރާނުން ދީފި

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ، އެމެރިކާގެ ވޮޝިންޓަނަށް ކުރައްވާ ދަތުރުފުޅުގައި އީރާނާއެކު ކުރިއަށްދާ މަޝްވަރާތަކަށް ބޮޑު ސަމާލުކަމެއް ދޭނެ ކަމަށް ބެލެވޭއިރު، އެ ދަތުރުފުޅުގެ ސަބަބުން ޑިޕްލޮމެޓިކް މަސައްކަތްތަކަށް "ނޭދެވޭ" ނުފޫޒުތަކެއް ފޯރަފާނެ ކަމުގެ އިންޒާރު އީރާނުން އަންގާރަ ދުވަހު ދީފިއެވެ.

އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަޣާއީ ހަފުތާއަކު އެއްފަހަރު ބާއްވާ ނޫސްވެރިންގެ ބައްދަލުވުމުގައި ވިދާޅުވީ، އީރާނުން މަޝްވަރާކުރާ ފަރާތަކީ އެމެރިކާ ކަމަށެވެ. އަދި ސަރަހައްދަށް ގެއްލުންދެނިވި ފިއްތުންތަކާއި ނޭދެވޭ ނުފޫޒުތަކުން އެއްކިބާވެ، މިނިވަންކަމާއެކު ގޮތް ނިންމުމަކީ އެމެރިކާގެ އިޚުތިޔާރުގައި އޮތް ކަމެއް ކަމަށް އޭނާ ވިދާޅުވި އެވެ.

މީގެއިތުރުން، ޒަޔަނިސްޓް އިޒްރޭލަކީ ސަރަހައްދީ ސުލްހައަށް މަގުފަހިވާ ކޮންމެ ޑިޕްލޮމެޓިކް މަސައްކަތަކަށް ހުރަސްއަޅާ ބައެއްކަން ތަކުރާރުކޮށް ސާބިތުކޮށްދީފައިވާ ކަމަށްވެސް ތަރުޖަމާނު ވިދާޅުވި އެވެ.

މިދިޔަ ޖޫން މަހު އިޒްރޭލުން އީރާނަށް ދިން ވަރުގަދަ ބޮމުގެ ހަމަލާތަކާ ގުޅިގެން 12 ދުވަހުގެ ހަނގުރާމައެއް ފެށި، ކުރިން ކުރިއަށްދިޔަ މަޝްވަރާތައް މެދުކެނޑިފައި އޮތުމަށްފަހު، އީރާނާއި އެމެރިކާއިން އަލުން މަސްކަޓުގައި މަޝްވަރާތައް ފަށާފައިވަނީ މިދިޔަ ހުކުރު ދުވަހު އެވެ.

އެ ހަނގުރާމައިގެ ތެރޭގައި އިޒްރޭލުން ވަނީ އީރާނުގެ އަސްކަރީ އިސް އޮފިޝަލުންނާއި، ނިއުކްލިއާ ސައިންސްވެރިންނާއި، ނިއުކްލިއާ މަރުކަޒުތަކުގެ އިތުރުން އާންމުން ދިރިއުޅޭ ސަރަހައްދުތަކަށް އަމާޒުކޮށް ހަމަލާދީފަ އެވެ.

ފަހުން އެމެރިކާ ވެސް އެ ހަމަލާތަކުގައި ބައިވެރިވެ، އީރާނުގެ މުހިންމު ނިއުކްލިއާ މަރުކަޒުތަކަށް އަމިއްލައަށް ހަމަލާތައް ދީފައިވެ އެވެ.

އެމެރިކާ އާއި އިޒްރޭލުގެ ހަމަލާތަކަށް ރައްދު ދިނުމުގެ ގޮތުން އީރާނުން ވަނީ އިޒްރޭލަށް ޑްރޯން އަދި މިސައިލް ހަމަލާތައް ދީފަ އެވެ. އަދި ގަތަރުގައި ހުންނަ މެދުއިރުމަތީގެ އެންމެ ބޮޑު އެމެރިކާގެ އަސްކަރީ މަރުކަޒަށްވެސް އީރާނުން ހަމަލާ އަމާޒުކުރި އެވެ.

ތަރުޖަމާނު ބަޣާއީ ވިދާޅުވީ ޖޫން މަހުގެ ތަޖުރިބާއަކީ ވަރަށް ހިތްދަތި ތަޖުރިބާއެއް ކަމަށާއި، އެކަންކަމަށް ރިއާޔަތްކޮށް ޑިޕްލޮމެޓިކް މަގުން އީރާނުގެ ގައުމީ މަސްލަހަތު ހިމާޔަތްކުރުމަށް އަޒުމް ކަނޑައަޅާފައިވާ ކަމަށެވެ.

އީރާނުގެ މައްޗަށް އަޅާފައިވާ ދަތިކުރުމުގެ ފިޔަވަޅުތައް އުވާލުމުގެ ބަދަލުގައި، އެ ގައުމުން ހަމައެކަނި ނިއުކްލިއާ މައްސަލައަށް ސަމާލުކަން ދޭނެ ކަމަށް އޭނާ ބާރުއަޅުއްވައި ވިދާޅުވި އެވެ.

ނިއުކްލިއާ މައްސަލައިގެ ބޭރުން އެހެން އެއްވެސް ކަމަކާ ގުޅޭގޮތުން މަޝްވަރާކުރުމަށް އީރާނުން އިންކާރުކުރާ ކަމަށް ތެހެރާނުން ތަކުރާރުކޮށް ބުނަމުންދެ އެވެ.

ނަމަވެސް، ހޮނިހިރު ދުވަހު ނަތަންޔާހޫގެ އޮފީހުން ނެރުނު ބަޔާނެއްގައި ބުނެފައިވަނީ، އީރާނާއެކު ކުރެވޭ ކޮންމެ މަޝްވަރާއެއްގައި ބެލިސްޓިކް މިސައިލް އުފެއްދުން ހަނިކުރުމާއި، ސަރަހައްދުގައި އީރާނާ ގުޅިފައިވާ ހަތިޔާރު އެޅި ޖަމާއަތްތަކަށް ދޭ އެހީތެރިކަން ހުއްޓުވުން ހިމަނަންޖެހޭނެ ކަމަށް ބޮޑުވަޒީރު ގަބޫލުކުރައްވާ ކަމަށެވެ.

މި މަޝްވަރާތައް އަލުން ފަށާފައި މިވަނީ، މިދިޔަ މަހު އީރާނުގައި ސަރުކާރާ ދެކޮޅަށް ކުރި މުޒާހަރާތައް ހުއްޓުވުމަށް އެ ގައުމުގެ ސަރުކާރުން ބާރުގެ ބޭނުންކުރުމާ ގުޅިގެން، އެމެރިކާ އިން އިންޒާރުދީ އެ ސަރަހައްދަށް މަތިންދާބޯޓު އުފުލާ މަނަވަރުތައް ފޮނުވާފައިވާ ދަނޑިވަޅެއްގަ އެވެ.

ދިރިއުޅުމުގެ ޚަރަދުތައް ބޮޑުވުމާ ގުޅިގެން ޑިސެމްބަރު މަހުގެ ފަހުކޮޅު ފެށުނު އެ މުޒާހަރާތަކަކީ ސުލްހަވެރި ހަރަކާތްތަކެއްގެ ގޮތުގައި ފެށުނު ކަމެއް ނަމަވެސް، އެމެރިކާ އާއި އިޒްރޭލުން ހިތްވަރުދީގެން އެކަން "ހަމަނުޖެހުމަކަށް" ބަދަލުކޮށް، މީހުން މެރުމާއި މުދަލަށް ގެއްލުންދިނުން ފަދަ އަމަލުތައް ހިންގާފައިވާ ކަމަށް އީރާނުގެ ކަމާބެހޭ ފަރާތްތަކުން ބުނެ އެވެ.