އީރާންއާ ގުޅޭ ގޮތުން މަޝްވަރާ ކުރުމަށް ޓްރަމްޕް އާއި ނަތަންޔާހޫ ބައްދަލު ކުރައްވަނީ

އެމެރިކާގެ ރައީސް ޑޮނަލްޑް ޓްރަމްޕް އާއި، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ބައްދަލު ކުރައްވާ ގޮތަށް ހަމަޖެހިފައިވާ ކަމަށް ހާމަ ކޮށްފި އެވެ. 

އެކަން ހާމަ ކޮށްފައި ވަނީ އިޒްރޭލްގެ ބޮޑު ވަޒީރުގެ އޮފީހުންނެވެ. އެގޮތުން އެ އޮފީހުން ބުނެފައި ވަނީ މި ހަފުތާގެ ބުދަ ދުވަހު ނަތަންޔާހޫ އާއި ޓްރަމްޕް ބައްދަލު ކުރައްވާނެ ކަަމަށެވެ. އަދި އެ ބައްދަލު ކުރެއްވުން އޮންނާނީ އެމެރިކާގެ ރިޔާސީ ގަނޑުވަރު، ވައިޓް ހައުސްގައި ކަމަށް ވެސް ބުނެފައިވެ އެވެ. 

ބޮޑު ވަޒީރު ނަތަންޔާހޫގެ އޮފީހުން ބުނެފައި ވަނީ، އެ ބައްދަލުވުމުގައި އީރާންއާ ގުޅޭ ގޮތުން ނަތަންޔާހޫ އާއި ޓްރަމްޕް މަޝްވަރާ ކުރައްވާނެ ކަމަށެވެ. އެމެރިކާ އާއި އީރާންއާ ދެމެދު މިދިޔަ ހުކުރު ދުވަހު ވަނީ ނުސީދާ މަޝްވަރާތައް ކުރިއަށް ގެންގޮސްފަ އެވެ. އޮމާންގައި ކުރިއަށް ގެންދިޔަ މަޝްވަރާ ތަކުގައި ވަނީ އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން މަޝްވަރާ ކޮށްފަ އެވެ. އެ މަޝްވަރާ ތަަކަށް ފަހު ދެ ޤައުމުން ވެސް ވަނީ އުންމީދު ފާޅުކޮށް، މަޝްވަރާތައް ކާމިޔާބު ކަމަށް ބުނެފައި އެވެ. 

ނަތަންޔާހޫގެ އޮފީހުން ނެރެފައިވާ ބަޔާނުގައި ބުނެފައި ވަނީ، އީރާން އާއެކު ކުރިއަށް ގެންދާ ކޮންމެ މަޝްވަރާ ތަކެއްގައި ބެލިސްޓިކް މިސައިލްގެ މައްސަލަ އާއި، އީރާންގެ ފަރާތުން އެކި އެކި ގުރޫޕު ތަކަށް ދެމުން އަންނަ ތާއީދު ހުއްޓުވުމުގެ މައްސަލަ ވެސް ހިމަނަން ޖެހޭ ކަމަަށް ބޮޑު ވަޒީރު ޤަބޫލު ކުރައްވާ ކަމަށެވެ. 

އެމެރިކާ އާއެކު ކުރިއަށް ގެންދިޔަ މަޝްވަރާތަކާ ގުޅޭ ގޮތުން ރޮއިޓާސް އަށް މައުލޫމާތު ދެމުން ބުނެފައި ވަނީ، ޔުރޭނިއަން ފައްކާ ކުރުމުގެ ހައްގު ލިބިގެންވާ ކަމަށް އީރާން އިން އެ ބައްދަލުވުމުގައި ވެސް ބުނެފައިވާ ކަމަށެވެ. އަދި އީރާންގެ މިސައިލް ޤާބިލު ކަމުގެ މައްސަލައާ ގުޅޭ ގޮތުން މަޝްވަރާ ކުރުމަށް އެ ޤައުމުން ދެކޮޅު ހަދާ ކަމަށް ވެސް ފާހަގަ ކޮށްފައިވެ އެވެ. 

ޓްރަމްޕް އާއި ނަތަންޔާހޫ ބައްދަލު ކުރައްވާއިރު، އެމެރިކާ އާއި އިޒްރޭލް އަކީ ގާތް ގުޅުމެއް އޮންނަ ދެ ޤައުމެވެ. ޓްރަމްޕްގެ ރިޔާސީ ދެ ވަަނަަ ދައުރުގެ ތެރޭގައި އެންމެ ގިނައިން ވައިޓް ހައުސް އަށް ވަޑައިގެން ޓްރަމްޕްއާ ބައްދަލު ކުރެއްވި ލީޑަރަކީ ވެސް ނަތަންޔާހޫ އެވެ.