އެމެރިކާގެ ސުޕްރީމް ކޯޓުން ޓްރަމްޕްގެ ޓެރިފްތަކަށް ހުރަސްއަޅައި, އެއީ ބާރުގެ ނަހަމަ ބޭނުން ހިފުން ކަމަށް ކަނޑައަޅާ ހުކުމް ކޮށްފި
އެމެރިކާގެ "އިންޓަނޭޝަނަލް އިމަޖެންސީ އިކޮނޮމިކް ޕަވާސް އެކްޓް" (އައި.އީ.އީ.ޕީ.އޭ) ގެ ދަށުން އިމްޕޯޓް ޑިއުޓީ ކަނޑައެޅުމުގެ ބާރު ރައީސަށް ލިބިވަޑައިނުގަންނަވާ ކަމަށް އެ ގައުމުގެ ސުޕްރީމް ކޯޓުން ވަނީ ހުކުމްކޮށްފައި. މި ނިންމުމާއެކު، އެކި ގައުމުތަކުން އެތެރެކުރާ މުދަލުން ޓެކްސް ނެގުމަށް ރައީސް ޑޮނަލްޑް ޓްރަމްޕް ގެންގުޅުއްވާ ސިޔާސަތުތަކަށް ގާނޫނީ ހުރަސްތަކެއް ކުރިމަތިވެ، ދަށު ކޯޓުތަކުގެ ނިންމުންތަކަށް ވަނީ ތާއީދު ލިބިފައި. ނަމަވެސް، މި ހުކުމުގެ ސަބަބުން ދަގަނޑާއި އެލުމިނިއަމް ފަދަ ވަކި ބާވަތްތަކުން މިހާރު ނަގަމުންދާ ޑިއުޓީތަކަށް އެއްވެސް ބަދަލެއް ނާންނާނެ.
އެމެރިކާގެ ވައިޓް ހައުސްގެ ރޯޒް ގާޑަންގައި 2025 އޭޕްރިލް 2 ވީ ބުދަ ދުވަހު ބޭއްވި ރަސްމިއްޔާތެއްގައި، އެމެރިކާގެ ރައީސް ޑޮނަލްޑް ޓްރަމްޕް ވަނީ ޓެރިފް ނުވަތަ އިމްޕޯޓް ޑިއުޓީއާ ގުޅޭ ރިޔާސީ ގަރާރެއްގައި ސޮއިކުރައްވައި، އެ ލިޔުން ދައްކަވާލައްވާފައި. | ރޮއިޓާސް
ދުނިޔޭގެ ވިޔަފާރީގެ ނިޒާމަށް ބޮޑެތި ބަދަލުތަކެއް އަންނާނެ ފަދަ ގޮތަކަށް، އެމެރިކާގެ ރައީސް ޑޮނަލްޑް ޓްރަމްޕް އިމްޕޯޓް ޑިއުޓީ ނުވަތަ ޓެރިފްތަކެއް ކަނޑައެޅުއްވީ އެމަނިކުފާނަށް ލިބިވަޑައިގަންނަވާ ބާރުގެ ބޭރުން ކަމަށް އެމެރިކާގެ ސުޕްރީމް ކޯޓުން ހުކުރު ދުވަހު ކަނޑައަޅައިފިއެވެ. މި ނިންމުމާއެކު، ރައީސް ޓްރަމްޕްގެ އިގްތިސާދީ ސިޔާސަތުތައް ތަންފީޒުކުރުމަށް ބޭނުންކުރައްވާ މުހިންމު ވަސީލަތަކަށް ވަނީ ހުރަސް އެޅިފައެވެ.
ކޮންޒަވޭޓިވް މެޖޯރިޓީއެއް އޮންނަ ސުޕްރީމް ކޯޓުގެ ނުވަ ފަނޑިޔާރުންގެ ތެރެއިން ހަ ފަނޑިޔާރުންގެ އަޣުލަބިއްޔަތުން ކުރި މި ހުކުމުގައި ބުނެފައިވަނީ، "އިންޓަނޭޝަނަލް އިމަޖެންސީ އިކޮނޮމިކް ޕަވާސް އެކްޓް" (އައި.އީ.އީ.ޕީ.އޭ) ގެ ދަށުން ޓެރިފް ކަނޑައެޅުމުގެ ބާރު ރައީސަށް ލިބިވަޑައިނުގަންނަވާ ކަމަށެވެ.
ޓްރަމްޕަކީ މީގެ ކުރިން ވެސް އެކި ގައުމުތަކަށް ފިއްތުންތައް ކުރިމަތިކުރުވުމަށާއި މަޝްވަރާތަކުގައި ބާރު ހޯއްދެވުމަށް ޓެރިފް ބޭނުންކުރައްވާ ބޭފުޅެކެވެ. ނަމަވެސް، މިދިޔަ އަހަރު ދެވަނަ ދައުރަކަށް ރައީސްކަމާ ހަވާލުވެވަޑައިގަތުމަށްފަހު، އެމެރިކާއާއެކު ވިޔަފާރިކުރާ ގާތްގަނޑަކަށް ހުރިހާ ގައުމަކުން އެތެރެކުރާ މުދަލުން އާ ޑިއުޓީތަކެއް ނެގުމަށް ކުއްލި ނުރައްކަލުގެ އިގްތިސާދީ ބާރުތަކުގެ ބޭނުން މީގެ ކުރިން ދުވަހަކުވެސް ނުކުރާ މިންވަރަށް ޓްރަމްޕް ވަނީ ކުރައްވާފައެވެ.
މީގެ ތެރޭގައި ވޮޝިންގްޓަނުން ގަބޫލުކުރާ ގޮތުގައި އިންސާފުވެރި ނޫން ވިޔަފާރީގެ އުސޫލުތަކާ ދެކޮޅަށް ކަނޑައެޅި "ރެސިޕްރޯކަލް" ޓެރިފްތަކުގެ އިތުރުން، މަސްތުވާތަކެތީގެ ވަގުފާރިއާއި ހިޖުރަވެރިންގެ މައްސަލައިގައި މެކްސިކޯ، ކެނެޑާ އަދި ޗައިނާއަށް އަމާޒުކޮށްގެން ނަގަން ފެށި ވަކި ޚާއްސަ ޓެކްސްތައް ހިމެނެއެވެ.
ސުޕްރީމް ކޯޓުން ހުކުރު ދުވަހު ފާހަގަކުރި ގޮތުގައި، އައި.އީ.އީ.ޕީ.އޭ ގާނޫނުގެ ދަށުން ޓެރިފް ކަނޑައެޅުމުގެ މިފަދަ އާދަޔާޚިލާފު ބާރެއް ރައީސަށް ދިނުމަށް ކޮންގްރެސްއިން ގަސްދުކުރި ނަމަ، އެހެން ޓެރިފް ގާނޫނުތަކެކޭވެސް އެއްފަދައިން އެކަން އެ ގާނޫނުގައި ސަރީހަ ބަހުން ބަޔާންކުރީސް ކަމަށެވެ.
މި ހުކުމުގެ ސަބަބުން، ދަގަނޑާއި އެލުމިނިއަމް ފަދަ ވަކި ބާވަތްތަކުގެ މުދަލުން ޓްރަމްޕް ވަކިން ނަންގަވަމުން ގެންދަވާ ޑިއުޓީތަކަށް އެއްވެސް ބަދަލެއް ނާންނާނެއެވެ.
ސުޕްރީމް ކޯޓުގެ މި ނިންމުމަކީ، އައި.އީ.އީ.ޕީ.އޭގެ ދަށުން ޓްރަމްޕް ކަނޑައެޅުއްވި ޓެރިފްތަކަކީ ޣައިރު ގާނޫނީ ނިންމުންތަކެއް ކަމަށް ދަށު ކޯޓުތަކުން ކުރިން ނިންމާފައިވާ ނިންމުންތަކަށް ތާއީދުކޮށް ނެރުނު ހުކުމެކެވެ.
މިދިޔަ މޭ މަހު ވިޔަފާރިއާ ބެހޭ ދަށު ކޯޓަކުން ވަނީ، ހުރިހާ ދާއިރާއަކުން ޓެކްސް ނެގުމަށް ޓްރަމްޕް ނިންމެވި ނިންމެވުމަކީ ބާރުގެ ބޭނުން ނަހަމަ ގޮތުގައި ހިފުން ކަމަށް ކަނޑައަޅައި، އެ ޓެކްސްތައް ނެގުން ހުއްޓުވާފައެވެ. ނަމަވެސް، ސަރުކާރުން އެ މައްސަލަ އިސްތިއުނާފު ކުރުމާ ގުޅިގެން އެ ހުކުމަށް އަމަލުކުރުން އޮތީ މަޑުޖެހިފައެވެ.
