ޓްރަމްޕްގެ ނަމަށް ފްލޮރިޑާ އެއާޕޯޓުގެ ނަން ބަދަލުކުރަނީ

އެމެރިކާގެ ފްލޮރިޑާގެ އެއާޕޯޓަކަށް އެ ގައުމުގެ ރައީސް ޑޮނަލްޑް ޓްރަމްޕްގެ ނަން ދިނުމަށް ހުށަހެޅި ބިލު، އެ ސްޓޭޓްގެ ގާނޫނު ހަދާ މަޖިލީހުން ބުރާސްފަތި ދުވަހު ފާސްކުރުމާ ގުޅިގެން، އެ އެއާޕޯޓުގެ ނަން ވަރަށް އަވަހަށް ބަދަލުކުރާނެ ކަމަށް ރިޕޯޓުތައް ބުނެފި އެވެ.

ދުނިޔޭގެ އެކި ކަންކޮޅުތަކުގައި ހުރި ގިނަ އިމާރާތްތަކެއްގައި އަމިއްލަ ނަންފުޅު ޖައްސަވާފައިވާ ރިއަލް އެސްޓޭޓްގެ މަހުޖަނު، ޑޮނަލްޑް ޓްރަމްޕް ގެންދަވަނީ މީގެ ކުރިން ފެނިފައި ނުވާ ފަދަ ވަރުގަދަ ކެމްޕޭނެއްގެ ދަށުން، އެމެރިކާގެ އެކި ތަންތަނުގައި އެމަނިކުފާނުގެ ނަންފުޅާއި ތަަަަސްވީރު ބޭނުންކުރައްވައިގެން ހަނދާންތައް ބިނާކުރެއްވުމަށް މަސައްކަތް ކުރައްވަމުންނެވެ.

ފްލޮރިޑާގެ ރެކޯޑްތަކުން ދައްކާ ގޮތުގައި، އެ ސްޓޭޓްގެ ރިޕަބްލިކަން ޕާޓީގެ އަޣުލަބިއްޔަތު އޮންނަ ގާނޫނު ހަދާ މަޖިލީހުން ވަނީ "ޕާމް ބީޗް އިންޓަނޭޝަނަލް އެއާޕޯޓް" ގެ ނަން "ޕްރެޒިޑެންޓް ޑޮނަލްޑް ޖޭ. ޓްރަމްޕް އިންޓަނޭޝަނަލް އެއާޕޯޓް" އަށް ބަދަލުކުރުމަށް ފާސްކޮށްފައެވެ. ކުރިން ޓްރަމްޕާ ދެކޮޅަށް މަސައްކަތް ކުރެއްވި ނަމަވެސް، މިހާރުގެ ގަވަރުނަރު ރޮން ޑިސާންޓިސް މި ބިލު ތަސްދީގު ކުރައްވާނެ ކަމަށް ބެލެވެއެވެ.

ހިތްގައިމު ގޮނޑުދޮށްތަކާއި އަގުބޮޑު ގެތައް ހުންނަ މަޝްހޫރު ޕާމް ބީޗްގައި އޮންނަ މި އެއާޕޯޓަކީ، ޓްރަމްޕްގެ އަމިއްލަފުޅު ރެސިޑެންސް ކަމަށްވާ "މާ-އަ-ލާގޯ" އާ ވަރަށް ކައިރީގައި އޮންނަ އެއާޕޯޓެކެވެ.

ފްލޮރިޑާގެ ގާނޫނު ހަދާ މަޖިލީހުން ފާސް ކުރ ނަމަވެސް އެއާޕޯޓުގެ ނަން ބަދަލުކުރުމަށްޓަކައި އެމެރިކާގެ ފެޑަރަލް އޭވިއޭޝަން އެޑްމިނިސްޓްރޭޝަންގެ ހުއްދަ ވެސް ހޯދަން ޖެހޭނެއެވެ.

ދާދި ފަހުން ވޮޝިންގޓަންގައި ހުންނަ، ކުރީގެ ރައީސް ޖޯން އެފް. ކެނެޑީގެ ހަނދާނުގައި ބިނާކޮށްފައިވާ އާޓްސް ކޮމްޕްލެކްސް "ކެނެޑީ ސެންޓަރު" ގެ ބޯޑުން މިދިޔަ ޑިސެމްބަރު މަހު ވަނީ އެ ތަނުގެ ނަން "ޓްރަމްޕް-ކެނެޑީ ސެންޓަރު" އަށް ބަދަލުކުރުމަށް ވޯޓު ދީފައެވެ. މި ބޯޑަކީ ރައީސް ޓްރަމްޕް އަމިއްލަފުޅަށް އައްޔަންކުރައްވާފައިވާ ބޯޑެކެވެ.