ކަށިމިޔަރު ގެ މަސްވެރިކަން ހުއްޓުވަން ދުސްތޫރީ މައްސަލަ އަލުން ހައި ކޯޓަށް ހުށަހަޅައިފި
ކަށިމިޔަރުގެ މަސްވެރިކަން ހުޅުވާލުމަށް ސަރުކާރުން ނިންމި ނިންމުމާ ދެކޮޅަށް ތިމާވެށީގެ އެކްޓިވިސްޓުން ހައިކޯޓަށް ދުސްތޫރީ މައްސަލައެއް ހުށަހަޅާފައިވާއިރު، މި މަސްވެރިކަން އަލުން ފެށުމަށް އާންމު ރައްޔިތުންގެ 77 އިންސައްތަ މީހުން ދެކޮޅުކަން ގައުމީ ސާވޭއަކުން ވަނީ ހާމަވެފައި. މީގެ އިތުރުން، މިޔަރުގެ ބާވަތްތަކުގެ ބައިނަލްއަގުވާމީ ވިޔަފާރި ކުރުން މަނާކުރުމަށް "ސައިޓީސް" އިން ނިންމި ނިންމުމުގައި ރާއްޖެއިން ބައިވެރިވެފައިވާއިރު، މި މަސްވެރިކަން ހުއްދަކުރުމުން ރާއްޖެއަށް ލިބިފައިވާ މިޔަރު ސެންކްޗުއަރީއެއްގެ ލަގަބު ގެއްލޭނެ.
ކަށި މިޔަރުގެ މަސްވެރިކަން ހުއްޓުވުމަށް ދުސްތޫރީ މައްސަލަ އަނެއްކާ ވެސް ވަނީ ހައިކޯޓަށް ހުށަހަޅާފައި. | އެންޑީ މުރްޗް
ރާއްޖޭގައި މަނާ ކޮށްފައި އޮތް ކަށި މިޔަރުގެ މަސްވެރިކަން މި ސަރުކާރުން ހުޅުވާލާފައިވާތީ އެކަން ހުއްޓުވުމަށް ދުސްތޫރީ މައްސަލަ އަލުން ހައިކޯޓަށް ހުށަހަޅައިފި އެވެ.
ހައިކޯޓުގެ ރަޖިސްޓްރީ އިން ދައްކާ ގޮތުން ދައުލަތާއި ދެކޮޅަށް މި މައްސަލަ ދުސްތޫރީ މައްސަލައެއްގެ ގޮތުގައި ހުށަހެޅީ ހުމައިދާ އަބްދުއްޣަފޫރު / ހ. ޝޭޑީކޯނަރ އަދި މުހައްމަދު ސިނީން / މ. މާމުލި އެވެ. މި ދެމީހުންނަކީ ވެސް ތިމާވެށި ހިމާޔަތްކުރުމަށް ވަކާލާތުކުރާ ދެ އެކްޓިވިސްޓުންނެވެ. އެންމެ ފުރަތަމަ މި މައްސަލަ ހުށަހެޅީ މިދިޔަ ޑިސެމްބަރު މަހު އެވެ.
ނަމަވެސް އެ މައްސަލަ ބަލައި ނުގަނެ ހައިކޯޓުން ބޭރުކޮށްލި އެވެ. ހައިކޯޓުގެ އެއިރުގެ ނިންމުމަކީ ކަށި މިޔަރުގެ މަސްވެރިކަން ކުރުމުގެ ގަވާއިދު ގާނޫނު އަސާސީއާ ޚިލާފު ކަމަށް ބުނި ނަމަވެސް ޚިލާފުވާ ގޮތެއް ބުނެދީފައި ނުވާ ކަމަށެވެ. އަދި މައްސަލައެއް ދުސްތޫރީ މައްސަލައަކަށް ވަނީ ގާނޫނެއް ނުވަތަ ގަވާއިދެއް ގާނޫނު އަސާސީއާ ޚިލާފުވުމުން ކަމަށާ ސަރުކާރުން އާންމުކުރާ ޕްލޭނަކީ ގަވާއިދެއް ނުވަތަ ގާނޫނެއް ވެސް ނޫން ކަމަށް ބުނެ ކޯޓުގެ ރަޖިސްޓްރާ ވަނީ އެ މައްސަލަ ކޯޓަށް ބަލައިނުގަތުމަށް ނިންމާފަ އެވެ.
އަލުން މި މައްސަލަ ހުށަހެޅީ މި މަހުގެ 2 ވަނަ ދުވަހު އެވެ. ނަމަވެސް މި މައްސަލަ ބަލައިގަތުމާއި މެދު ގޮތެއް ނުނިންމަ އެވެ.
ރާއްޖޭގައި މަނާ ކޮށްފައި އޮތް ކަށި މިޔަރުގެ މަސްވެރިކަމަށް ސަރުކާރުން ހުޅުވާލާފައިވާ އިރު، އޭގެ ކުޑަ ދުވަސް ކޮޅެއް ފަހުން ކަށި މިޔަރު ހިމެނޭ ގޮތައް 70 ބާވަތެއްގެ މިޔަރާއި މަޑީގެ ބާވަތްތަކުގެ ބައިނަލް އަގްވާމީ ވިޔަފާރި އަށް ހުރަސް އަޅަން ފާސް ކުރުމުގައި ރާއްޖެ އިން ވަނީ ބައިވެރިވެފަ އެވެ.
ކޮންވެންޝަން އޮން އިންޓަރނޭޝަނަލް ޓްރޭޑް އިން އެންޑެންޖާޑް ސްޕީޝީޒް އޮފް ވައިލްޑް ފައުނާ އެންޑް ފްލޯރާ (ސައިޓީސް) ގެ މެމްބަރު ގައުމުތަކުން، ފެހުރިއްސާއި، އެން މަޑީގެ ހުރިހާ ބާވަތްތައް ވަނީ އެޕެންޑިކްސް I ގެ ދަށަށް ގެނެސްފައެވެ. މި ގޮތައް ނިންމުމާ އެކު އެންމެ މަތީ ދަރަޖައިގެ ރައްކާތެރިކަން މި ބާވަތްތަކަށް ލިބި، މި ބާވަތްތަކާއި އެ ތަކެތީގެ އުފެއްދުންތަކުގެ ހުރިހާ ބައިނަލްއަޤްވާމީ ވިޔަފާރިއެއް މަނާ ވެގެން ދާނެ އެވެ.
ނޮވެމްބަރު މަހުގެ 1 ވަނަ ދުވަހު ރާއްޖޭގައި ހުއްދަ ކުރި ކަށި މިޔަރުގެ ބައިނަލް އަގުވާމީ ވިޔަފާރި އަށް ސައިޓީސްގެ ނިންމުމުގެ ސަބަބުން ވަރަށް ބޮޑަށް ހުރަސް އެޅޭނެ އެވެ. ހުސްވި ނޮވެމްބަރު މަހު ބޭއްވި ސައިޓީސް ގެ ބައްދަލުވުމުގައި ކަށިމިޔަރު ވަނީ އެ މުއާހަދާ ގެ އެޕެންޑިސް 2 ގައި ހިމަނަން ފާސް ކޮށްފަ އެވެ.
ސަރުކާރުން ކަށި މިޔަރުގެ މަސްވެރިކަމަށް ހުއްދަ ދިން އިރު، ކަށި މިޔަރު ގެ މަސްވެރިކަން އަލުން ފެށުމާ ރައްޔިތުން ދެކޮޅު ކަން ގައުމީ ސަރވޭއަކުން ވަނީ ހާމަ ވެފަ އެވެ.
ބްލޫ މެރިން ފައުންޑޭޝަން ނަމަކަށް ކިޔާ ކަނޑުގެ ތިމާވެށި ރައްކާތެރިކުރުމުގެ ޖަމުއިއްޔާ އަކާއި، މޯލްޑިވްސް ރެޒިލިއަންޓް ރީފްސް އަދި މޯލްޑިވިއަން މިޔަރު ޝާކް ޕްރޮގްރާމްގެ ބައިވެރިވުމާއެކު ހެދުނު ގައުމީ ސާވޭގެ ނަތީޖާ ބުނާ ގޮތުން، ކަށި މިޔަރުގެ މަސްވެރިކަން އަލުން ފެށުމަށް ސާވޭގައި ބައިވެރިވި މީހުންގެ 77 އިންސައްތަ މީހުން ދެކޮޅެވެ.
ދިވެހިރާއްޖޭގައި 2010 ވަނަ އަހަރު ހުރިހާ ބާވަތެއްގެ މިޔަރު މަސްވެރިކަމެއް މުޅިން މަނާކުރި އެވެ. އަދި މިޔަރު މަސްވެރިކަން އަލުން ފަށައިފިނަމަ، މިޔަރު ސެންކްޗުއަރީ އެއްގެ ލަގަބު ރާއްޖެ އަށް ގެއްލިގެންދާނެ އެވެ.
