އީސީ އާ ދެކޮޅަށް ހުށަހެޅި މައްސަލަ ބޭރުކޮށްލީ ގާނޫނާ ޚިލާފަށް، ހައި ކޯޓުގެ ރަޖިސްޓްރާގެ މައްސަލަ ޖޭއެސްސީ އަށް ހުށަހަޅާނަން: މަލީހު
ކައުންސިލް އިންތިހާބަށް ކުރިމަތިލާ ފޯމުތައް ހަމައެކަނި އީފާސް މެދުވެރިކޮށް ހުށަހަޅަން ޖެހޭ ގޮތަށް އޮތް އޮތުމާ ގުޅިގެން ޕީއެންއެފް އިން ހައި ކޯޓަށް ހުށަހެޅި މައްސަލަ ބޭރުކޮށްލީ ގާނޫނާ ހިލާފަށް ކަމަށް އެ ޕާޓީން ވަނީ ބުނެފަ. މި މައްސަލަ ބޭރުކޮށްލި ގޮތާ މެދު ހިތްހަމަނުޖެހުން ފާޅުކުރައްވަމުން މަލީހު ޖަމާލު ވިދާޅުވީ، ހައި ކޯޓުގެ ރަޖިސްޓްރާގެ އެ ނިންމުން ޖޭއެސްސީއަށް ހުށަހެޅުމަށް ނިންމާފައިވާ ކަމަށް. މީގެ އިތުރުން، އިންތިހާބަށް ފޯމު ހުށަހެޅުމުގައި އޮންލައިން ނޫން ގޮތްތައް ވެސް އިލެކްޝަންސް ކޮމިޝަނުން ފަހިކޮށްދޭން ޖެހޭނެ ކަމަށް އެ ޕާޓީން ދެކޭ ކަމަށް ވިދާޅުވި.
ހައި ކޯޓް - މި މައްސަލަ ހައި ކޯޓަށް ހުށަހެޅުއްވީ ޕީއެންއެފްގެ ފަރާތުން އެ ޕާޓީގެ ސެނެޓް މެންބަރު އަދި ގާނޫނީ ވަކީލު އާދަމް އާސިފް | ގޫގުލް
ކުރިއަށް އޮތް ލޯކަލް ކައުންސިލް އަދި އަންހެނުންގެ ތަރައްގީ އަށް މަސައްކަތްކުރާ ކޮމިޓީ ތަކުގެ އިންތިހާބަށް ކުރިމަތިލާ ކެންޑިޑޭޑުން ފޯމް ހުށަހެޅުމުގެ ހުރިހާ ކަމެއް އީފާސް މެދުވެރިކޮށް ކުރަން މަޖުބޫރު ކޮށްފަވާތީ، ޕީއެންއެފް އިން އިލެކްޝަންސް އާ ދެކޮޅަށް ހުށަހެޅި މައްސަލަ ހައި ކޯޓުން ބޭރު ކޮށްލީ ގާނޫނާ ޚިލާފަށް ކަމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެ އެވެ.
މި އަހަރުގަ ބާއްވާ މި އިންތިހާބު ތަކަށް ވާދަކުރާ ކެންޑިޑޭޓުންގެ ފޯމް އަދި އަމިއްލަ ގޮތުން ވާދަކުރާ ކެނޑިޑޭޓުން ފުރިހަމަ ކުރަންޖެހޭ 50 މީހުންގެ ތާއީދު ފޯމު ވެސް ފުރަން ޖެހެނީ އީފާސް މެދުވެރިކޮށެވެ. މިކަމާ ގުޅިގެން އިދިކޮޅު އެންމެ ބޮޑު ޕާޓީ އެމްޑީޕީ އިން ވެސް ކަންބޮޑުވުން ފާޅުކޮށްފަ ވާއިރު، ޕީއެންއެފް އިން ވަނީ މި މައްސަލަ ހައި ކޯޓަށް ހުށަހަޅާފަ އެވެ.
މި މައްސަލަ ހައި ކޯޓަށް ހުށަހެޅުއްވީ ޕީއެންއެފްގެ ފަރާތުން އެ ޕާޓީގެ ސެނެޓް މެންބަރު އަދި ގާނޫނީ ވަކީލު އާދަމް އާސިފް އެވެ.
ހޯމަ ދުވަހު އެ މައްސަލަ ބޭރުކޮށްލާފައި ވާއިރު ސަބަބެއް ކަމަށް ކޯޓުގެ ރަޖިސްޓްރާގެ ނިންމުމުގައި ބުނެފައިވަނީ، އިންތިހާބަށް ކުރިމަތިލުމަށް ބޭނުންވާ ލިޔެކިއުންތަކާއި އިދާރީ ފީ އީފާސް މެދުވެރިކޮށް ދެއްކުމަށް ޝަރުތުކުރުމަކީ ގާނޫނާ ޚިލާފު ކަމެއް ކަމަށް މައްސަލާގައި ބުނެފައިވީ ނަމަވެސް، ގާނޫނާ ޚިލާފުވާ ގޮތް ގާނޫނީ އުސޫލުތަކުގެ އަލީގައި ބަޔާންކޮށްފައި ނުވާ ކަމަށެވެ.
މިކަމާ ގުޅިގެން ރާއްޖެޓީވީ އާ ވާހަކަދައްކަވަމުން މަލީހު ވިދާޅުވީ ފޯމު ހުށަހެޅުމުގެ ސުންގަޑި ހަމަވިއިރު ވެސް ހައި ކޯޓުން އެ މައްސަލައަށް ރިއާޔަތް ކޮށްފައި ނުވާ ކަމަށެވެ. އަދި މައްސަލައިގެ އަޑުއެހުމެއް ވެސް ބާއްވާ ފައި ނުވާއިރު މައްސަލަ ބަލައިގަތް ކަން ނުވަތަ ނޫން ކަން ވެސް އަންގާފައި ނުވާ ކަމަށެވެ.
ބަލައިގަތް ކަން ވެސް ބަލައިނުގަންނަ ކަން ވެސް އަންގާފައެއް ނުވޭ. އެހެން ނަމަވެސް މުއްދަތު ހަމަވުމަށް ފަހު އިއްޔެގެ ވަގުތެއްގައި މި އަންނަނީ ރަޖިސްޓްރާގެ ފަރާތުން އަޅުގަނޑުމެން ދެކޭގޮތުގައި އެއީ ހުކުމެއްގެ ގޮތުގައި އަޅުގަނޑުމެންނަށް ސިފަ ވަނީ. ހައިކޯޓުގެ ރަޖިސްޓްރާ އަށް ނެތް ބާރެއް ބޭނުން ކުރައްވާ، އަޑުއެހުމެއް ނުބާއްވާ ނިންމާފަ އޮތް ޝަރީއަތުގެ މަޖިލީހުގެ ގަޒިއްޔާއެއް ނުވަތަ ހުކުމެއް ގޮތުގަ އަޅުގަނޑުމެންނަށް ސިފަވަނީ. އެހެންވީމަ އަޅުގަނޑުމެން މި ބަލަނީ އެއް ކަމެއްގެ ގޮތުގަ ހައި ކޯޓުގެ ރަޖިސްޓްރާ ގެ މައްސަލަ ޖޭއެސްސީ އަށް ހުށަހެޅުން.ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު
އޭގެ އިތުރުން މި މައްސަލައާ ގުޅިގެން ފަނޑިޔާރުންގެ މަޖިލީހުގެ ރިވިއު އަކަށް ނުވަތަ ގާނޫނީ ގޮތުން ދެން ކުރެވެން ހުރި ކަންތައްތައް ކުރުމުގެ މަސައްކަތްތައް ކުރިއަށް ދާ ކަމަށް ވެސް މަލީހު ވިދާޅުވި އެވެ.
މަލީހު ވިދާޅުވީ ދިވެހިރާއްޖޭގެ ހައި ކޯޓުން މިކަންކަން ކޮށްފަ ވަނީ އާންމު އުސޫލުން ގާނޫނުތަކާ ޚިލާފަށް ކަމަށް އެ ޕާޓީ އިން ދެކޭ ކަމަށެވެ.
ޕީއެންއެފް ގެ ފަރާތުން ބުނީ ހަމައެކަނި އޮންލައިންކޮށް ކެންޑިޑޭޓުންނަށް ފޯމު ހުށަހެޅޭ ގޮތަށް އިންތިޒާމްތައް ހަމަޖެއްސުމަކީ ބަލައިގަނެވޭ ކަމެއް ނޫން ކަަމަށެވެ. އަދި އިލެކްޝަންސް ކޮމިޝަނަށް ގޮސްގެން ފޯމު ހުށަހެޅުމުގެ މަސައްކަތް ކުރެވޭނެ މަގު އިލެކްޝަންސް ކޮމިޝަނުން ފަހިކޮށްދޭން ޖެހޭނެ ކަމަށާއި އެއީ ކުރިއަރާފައިވާ މުޖުތަމައުތަކުގައި ވެސް އަމަލުކުރާ ގޮތް ކަމަށެވެ.
ކުރިއަށް އޮތް ލޯކަލް ކައުންސިލް އިންތިހާބު ކާމިޔާބު ކުރުމަށްޓަކާ ސަރުކާރުން ދަނީ އެކި ގޮތްގޮތުން ނުފޫޒު ފޯރުވާ، ސާރުކާރު މުވައްޒަފުންނަށް ބިރު ދެއްކުމުގެ އަމަލުތައް ވެސް ހިންގަމުން ކަމަށް ގިނަ ފަރާތްތަކަކުން ތުހުމަތު ކުރެ އެވެ.
