މޯލްޑިވްސް ގޭސް ގެ ކުރީގެ އެމްޑީ އަށް ކޮށްފައިވާ ރިޝްވަތު ހިފުމުގެ 5 ދަޢުވާ ސާބިތު ނުވުން: ޕީޖީ އިން ގަސްތުކުރަނީ މައްސަލަ އިސްތިއުނާފް ކުރަން
22 ޖެނުއަރީ 2026 | ބުރާސްފަތި 11:27މޯލްޑިވްގޭހުގެ ކުރީގެ އެމްޑީ ޢަބްދުﷲ މައުމޫންގެ މައްޗަށް ރިޝްވަތު ހިފުމުގެ 7 ދަޢުވާގެ ތެރެއިން 5 ދަޢުވާ ކްރިމިނަލް ކޯޓުން ސާބިތުނުވާކަމަށް ހުކުމްކުރުމުން ޕީޖީ އޮފީހުން އެ މައްސަލަތައް އިސްތިއުނާފް ކުރުމަށް ވިސްނާކަން ހާމަކޮށްފައިވޭ.
މޯލްޑިވް ގޭސް ޕްރައިވެޓް ލިމިޓެޑް ކުރީގެ މެނޭޖިންގ ޑިރެކްޓަރ ޢަބްދުالله މައުމޫން | ސޯޝަލް މީޑިއާ
މޯލްޑިވް ގޭސް ޕްރައިވެޓް ލިމިޓެޑް ކުރީގެ މެނޭޖިންގ ޑިރެކްޓަރ ޢަބްދުالله މައުމޫން ގެ މައްޗަށް ރިޝްވަތު ހިފުމުގެ 5 ދަޢުވާ އެއް ސާބިތު ނުވާކަމަށް ކްރިމިނަލް ކޯޓުން ޙުކުމް ކުރުމުން، ޕީޖީ އިން ގަސްތު ކުރަނީ މައްސަލަ އިސްތިއުނާފްކުރުމަށް ކަމަށް ޕްރޮސެކޮއުޓަރ ޖެނެރަލްގެ އޮފީހުން ހާމަކޮށްފި އެވެ.
މައުމޫން ގެ މައްޗަށް އެ ދައުވާތައް ކުރުމަށް ފޮނުވީ އޭނާ މޯލްޑިވް ގޭސްގެ އެމްޑީގެ ގޮތުގައި ހުރި އިރު އެ ކުންފުންޏަށް ލިކުއިޑް ޕެޓްރޯލިއަމް ގަތުމަށް ހަވާލުކޮށްފައިވާ، ކުންފުނިން މައުމޫނާއި އޭނާ އާޢި ގުޅުން ހުރި މީހުން ގެ އެކައުންޓްތަކަށް އެކި ފަހަރު މަތިން 298،000 ޑޮލަރު ޖަމާ ކުރި މައްސަލައަކާއި ގުޅިގެންނެވެ.
މައުމޫންގެ މައްޗަށް ރިޝްވަތު ހިފުމުގެ 7 ދަޢުވާ ވަނީ އުފުލާފަ އެވެ. އޭގެ ތެރެއިން 5 ދަޢުވާ ސާބިތު ނުވާ ކަމަށް ކްރިމިނަލް ކޯޓުން ޙުކުމް ކޮށްފައި ވަނީ ބުރާސްފަތި ދުވަހު އެވެ.
ޕީޖީ އޮފީހުން ބުނީ މި 5 ދަޢުވާ ސާބިތު ނުވާ ކަމަށް ނިންމި ސަބަބުތަކަށް ބަލާއިރު މި ނިންމުން ނިންމާފައި ވަނީ ދައުލަތުން ހުށަހެޅި ހެކިތަކަށް އެކަށީގެންވާ ގޮތެއްގައި ރިޢާޔަތް ކުރުމެއްނެތި ކަމަށެވެ. އަދި އެ ނިންމުން ނިންމާފައި ވަނީ ޝަރުޢީ އަދި ޤާނޫނީ އުޞޫލުތަކާ ޚިލާފަށްކަމަށް ޕީޖީ އޮފީހުން ޤަބޫލު ކުރެ އެވެ.
އެހެންކަމުން، ސާބިތު ނުވާ ކަމަށް ކަނޑައަޅާފައިވާ 5 ދަޢުވާ ދިވެހިރާއްޖޭގެ ހައިކޯޓުގައި އިސްތިއުނާފު ކުރުމަށް އެ އޮފީހުން ޤަޞްދުކުރާ ކަން ޕީޖީ އޮފީހުން ވަނީ ބުރާސްފަތި ދުވަހު ހާމަކޮށްފަ އެވެ.
އެހެންނަމަވެސް މިކަމުގައި އެންމެ ފަހު ނިންމުމެއް ނިންމެން އޮތީ މައްސަލައިގެ ޝަރީޢަތް ނިމުނު ގޮތުގެ ފުރިހަމަ ރިޕޯޓު މި އޮފީހަށް ލިބުމުންކަމަށް އެ އޮފީހުން ވަނީ ބުނެފަ އެވެ. އެ ރިޕޯޓް މި އޮފީހަށް ލިބުމުން އިސްތިއުނާފުކުރުމާ މެދު ފަހު ނިންމުމެއް ނިންމާނެ ކަމަށް އެ އޮފީހުން ބުނެ އެވެ.
މި މައްސަލާގައި ޢަބްދުالله މައުމޫންގެ މައްޗަށް ކްރިމިނަލް ކޯޓަށް ހުށަހެޅި ރިޝްވަތު ހިފުމުގެ 2 ދަޢުވާ ސާބިތުވާކަމަށް ކަނޑައަޅައި، ޢަބްދުالله މައުމޫން 12 (ބާރަ) އަހަރާއި، 9 (ނުވައެއް) މަހާއި، 18 (އަށާރަ) ދުވަހަށް ޖަލަށްލުމަށް 29 ސެޕްޓެންބަރު 2025 ދުވަހު ކްރިމިނަލް ކޯޓުން ޙުކުމްކޮށްފައި ވެ އެވެ. އޭނާ އަންނަނީ 12 އަހަރުގެ ޖަލު ހުކުމެއް ތަންފީޒުކުރަމުންނެވެ.
