2024 ވަނަ އަހަރުގެ ދިރާސީ އަހަރުގެ ސަރކިއުލާ އެކުލަވާލި ގޮތުން ޕްލޭ ސްކޫލްގައި ރިޕީޓްކުރި ދަރިވަރާ މެދު އެޑިއުކޭޝަނުން އަލުން ގޮތެއް ކަނޑައެޅުމަށް ހައިކޯޓުން ޙުކުމްކޮށްފި
2023 ވަނަ އަހަރު ޕްލޭ ސްކޫލަށް ވައްދާފައިވާ ދަރިވަރަކު ދިރާސީ އަހަރު ފުރިހަމަކުރި ނަމަވެސް 2024 ގެ ސާކިއުލާ އާއި އެއްގޮތަށް އުމުރު ނުފުރޭތީ ރިޕީޓްކުރުމުން ކުއްޖާ އަލުން އެސެސްކުރުމަށް ހައިކޯޓުން ވަނީ ޙުކުމްކޮށްފަ. އިސްތިއުނާފުކުރާ ފަރާތުގެ ދަރިފުޅުގެ ޚާއްޞަ ޙާލަތާ ގުޅޭގޮތުން ހުށަހަޅާފައިވާ ކަންކަމަށް ރިއާޔަތްކުރުމަށް އަންގާފައިވޭ.
ހައިކޯޓު ބޭރުން ނަގާފައިވާ ފޮޓޯ އެއް | ހައި ކޯޓް
2024 ވަނަ އަހަރުގެ ދިރާސީ އަހަރުގެ ސާކިއުލާ އަށް އަމަލުކުރުމުގެ ގޮތުން ދަރިވަރަކު ޕްލޭ ސްކޫލުން ބޭބީ ނާސަރީ އަށް ޕްރޮމޯޓް ނުކޮށް، ޕްލޭ ސްކޫލް ރިޕީޓްކުރި މައްސަލައިގައި، އެ ދަރިވަރާ މެދު ސިވިލް ކޯޓުން ނިންމާފައިވާ ނިންމުން ބާތިލްކޮށް އެޑިއުކޭޝަނުން އަލުން ގޮތެއް ކަނޑައެޅުމަށް ހައިކޯޓުން ޙުކުމްކޮށްފި އެވެ.
މި މައްސަލަ އަކީ 2023 ވަނަ ދިރާސީ އަހަރުގެ ޕްލޭ ސްކޫލަށް ވެއްދި ދަރިވަރަކު އޭރު މިނިސްޓްރީ އިން ކަނޑައެޅި އުސޫލުތަކާއި އެއްގޮތަށް ދިރާސީ އަހަރު ފުރިހަމަކޮށްފައި ވަނިކޮށް އޭނާ ރިޕީޓް ވުމަށް މަޖުބޫރުވާ ގޮތަށް އޭނާ އާއި މެދު އެޑިއުކޭޝަން މިނިސްޓްރީ އިން އަމަލުކޮށްފައިވާ މައްސަލައެކެވެ.
2023-2024 ވަނަ އަހަރު ދަރިވަރުން ވައްދާ އުމުރުފުރާތަކުގެ ތެރެއިން ބޭބީ ނަރސަރީ އަށް ވަދެވޭނީ އެ އަަހަރުގެ ޖުލައި މަހަށް 2 އަހަރު ފުރި 3 އަހަރު ނުފުރޭ ކުދިންނަށެވެ. މި މައްސަލައިގައި ބުނާ ކުއްޖާގެ އުފަން ތާރީހަކީ 13 ޖުލައި 2021 ކަމަށް ވުމާއި އެކު ދަރިވަރު ސްކޫލަށް ވައްދާފައި ވަނީ ރަނގަޅަށެވެ. 2024 ވަނަ އަހަރުގެ ދިރާސީ އަހަރަކީ މެއި 2024 އިން ޑިސެމްބަރު 2024 އެވެ. 30 ޖެނުއަރީގައި ނެރުނު ސަރކިއުލާ އެއްގައި އެޑިއުކޭޝަނުން ބުނީ ކުދިން ނަރސަރީ އަށް 31 ޑިސެމްބަރ 2023 އަށް 3 އަހަރު ފުރި، 4 އަހަރު ނުފުރޭ ކުދިންނަށް ކަމަށެވެ.
މި އުސޫލާއި އެއްގޮތަށް ދަރިފުޅަށް 3 އަހަރު ނުފުރޭތީ ނަރސަރީ އަށް ޕްރޮމޯޓް ނުވާ ކަމަށް މިނިސްޓްރީ އިން ނިންމި އެވެ. އެކަމާއި ގުޅިގެން ތަކުރާރުކޮށް މަސައްކަތްކޮށްގެން ސަރުކާރުގެ ތެރެއިން ހައްލެއް ނުލިބުމުން މި މައްސަލައިގައި ހިމެނޭ ބެލެނިވެރިޔާ ދަރިވަރުގެ ހައްގު ހޯދުމަށް އެދި ވުޒާރާ އަށް ސިޓީ އެއް ވެސް ހުށަޙަޅާފައިވެ އެވެ.
މި މައްސަލަ އަށް ހައްލެއް ނުލިބިގެން ކުއްޖާގެ ބެލެނިވެރިޔާ ވަނީ ސިވިލް ކޯޓަށް މައްސަލަ އެއް ހުށަހަޅާފަ އެވެ. ސިވިލްކޯޓުން ނިންމީ އެޑިއުކޭޝަންގެ ސަރކިއުލާ އެކުލަވާލީ އެ ވުޒާރާ އަށް ލިބޭ ޤާނޫނީ ބާރުތަކުގެ ދަށުން ކަމަށެވެ. އެހެންކަމުން އެ ސަރކިއުލާ މި މައްސަލައިގައި ބުނާ ކުއްޖާގެ މައްޗަށް ތަތުބީގުކުރުމުގައި އެޑިއުކޭޝަނުން ޤާނޫނާއި ޚިލާފު ނުވާ ކަމަށް ކަނޑައެޅި އެވެ. އަދި އެ މައްސަލައިގައި ނަގައިދިނުމަށް އެދުނު އެއްވެސް ފަރުވާ އެއް ނަގާދޭނެ ތަނެއް ނެތްކަމަށް ޙުކުމް ކުރި އެވެ.
ހައިކޯޓުން ނިންމާފައި ވަނީ ސިވިލް ކޯޓުގެ ނިންމުން ބާތިލް ކުރުމަށެވެ. އިސްތިއުނާފުކުރާ ފަރާތުގެ ދަރިފުޅުގެ ޚާއްޞަ ޙާލަތާ ގުޅޭގޮތުން ހުށަހަޅާފައިވާ ކަންކަމާއި، އެސެސްމަންޓުތައް މިނިސްޓްރީގެ ކަމާބެހޭ ފަންނުވެރިންގެ ފަރާތުން އިންޞާފުވެރިކަމާ އެކު އަލުން ވަޒަންކޮށް އިސްތިއުނާފުކުރާ ފަރާތުގެ ދަރިފުޅު މިހާރު ހުންނަންޖެހޭ ގުރޭޑާ މެދު މިނިސްޓްރީން އަލުން ގޮތެއް ނިންމަން ޖެހޭކަމަށް ވަނީ ކަނޑައަޅާފަ އެވެ.
