ޕީއެންސީގެ ޓިކެޓުގައި މަޖިލީހަށް ވާދަކޮށް ނާކާމިޔާބުވި ރައޫފް ހައިކޯޓުގެ ފަނޑިޔާރު ކަމަށް އައްޔަންކޮށްފި
ރައޫފަކީ މީގެކުރިން ސުލޫކީ މައްސަލައެއްގައި މަގާމުން ވަކިކުރަން އުޅުމުން އިސްތިއުފާ ދެއްވުމަށްފަހު، ޕީއެންސީގެ ޕްރައިމަރީގައި ވެސް ވާދަކުރައްވާފައިވާ ބޭފުޅެއް. އޭނާ އަލުން ފަނޑިޔާރުކަމަށް މި އައްޔަންކުރީ ސިޔާސީ ހަރަކާތްތަކުގައި އުޅުއްވުމަށްފަހު މަޖިލިސް އިންތިހާބުން ނާކާމިޔާބުވެފައި ވަނިކޮށް.
ޕީއެންސީގެ މަޖިލިސް ޕްރައިމަރީގައި ކެޔޮދޫ ދާއިރާއަށް ވާދަކުރެއްވި ފަނޑިޔާރު ރައޫފް | ޕީއެންސީ
ޕީއެންސީގެ ޓިކެޓުގައި މަޖިލީހަށް ވާދަކޮށް ނާކާމިޔާބުވި އަބްދުއްރައޫފް އިބްރާހިމް ހައިކޯޓު ފަނޑިޔާރު ކަމަށް އައްޔަންކޮށްފި އެވެ.
ޖޭއެސްސީ އިން މިދިޔަ ހޯމަ ދުވަހު ބޭއްވި ބައްދަލުވުމުގައިވަނީ ކްރިމިނަލް ކޯޓާއި ހައިކޯޓަށް ފަނޑިޔާރުން އައްޔަންކުރަން ނިންމައިފަ އެވެ. ހައި ކޯޓުގެ ފަނޑިޔާރު ކަމަށް އެ ކޯޓުގައި ކުރިން މަސައްކަތް ކުރެއްވި އަބްދުއްރައޫފް އިބްރާހިމް އާއި ކްރިމިނަލް ކޯޓުގެ ގާޒީ ކަމުގައި މިހާތަނަށް ހުންނެވި އިސްމާއިލް ޝަފީއު ވަނީ އައްޔަން ކުރައްވައިފަ އެވެ.
ހައި ކޯޓުގެ ފަނޑިޔާރުކަމުން ރައޫފު އިސްތިއުފާ ދެއްވީ ކުރީގެ ރައީސް އަބްދުﷲ ޔާމީންގެ ވެރިކަމުގައި ސަރުކާރުން ދޫކުރި ފްލެޓެއް އޭނާ އަށް ހުށަހެޅުމުން ގަބޫލު ކުރެއްވި ކަމަށް ބުނެ އެމްޑީޕީގެ ސަރުކާރުގައި ޖޭއެސްސީން މައްސަލަ ބަލައި މަގާމުން ވަކިކުރަން ނިންމާފައި ވަނިކޮށެވެ. އޭގެ ފަހުން އޭނާ ވަނީ މި ސަރުކާރު ހިންގާ ޕާޓީ ޕީއެންސީގެ ޓިކެޓުގައި ރައްޔިތުންގެ މަޖިލިސް އިންތިހާބުގައި ކެޔޮދޫ ދާއިރާ އަށް ވެސް ވާދަކުރައްވައިފަ އެވެ. ނަމަވެސް އެ އިންތިހާބުން އޭނާ ވަނީ ނާކާމިޔާބުވެފަ އެވެ. ގިނަ ބަޔަކު ރައޫފު ސިފަ ކުރަނީ އޭނާއަކީ ޕީއެންސީގެ އެކްޓިވިސްޓެއްގެ ގޮތުގައެވެ.
ރައޫފަކީ 10 އަހަރަށް ވުރެ ގިނަ ދުވަހު ހައިކޯޓުގައި ކުރިން މަސައްކަތްކޮށްފައިވާ ބޭފުޅެކެވެ. އޭނާ ފަނޑިޔާރު ކަމުން އޭރު އިސްތިއުފާ ދެއްވީ ކުރީގެ ރައީސް އަބްދުﷲ ޔާމީންގެ ވެރިކަމުގައި ސަރުކާރުން ދޫކުރި ފްލެޓެއް އޭނާ އަށް ހުށަހެޅުމުން ގަބޫލު ކުރެއްވި މައްސަލައެއް ސާބިތުވެ, މަގާމުން ވަކިކުރަން ނިންމާފައިވަނިކޮށެވެ.
