ކޯޓުގެ ސަރވާ ހަލާކުވެފައިވާ ކަމަށް ބުނެ ބަންދުން ދޫކޮށްލަން ނެރުނު އަމުރެއް ބާތިލްކޮށްފި
8 އަހަރުގެ ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކުރި މީހަކު ކޯޓުގެ ސާވާ ސިސްޓަމަށް މައްސަލަ ދިމާވެ ޝަރީއަތް ހިންގަން ދަތިކަމަށް ބުނެ މެޖިސްޓްރޭޓް ކޯޓުން ދޫކޮށްލި ނަމަވެސް ދައުލަތުން އިސްތިއުނާފު ކުރުމުން ހައިކޯޓުން އެ މީހާ މިނިވަންކުރަން ނެރުނު އަމުރު ބާތިލުކޮށް ޝަރީއަތުގެ މަރުހަލާ ނިމެންދެން ބަންދުގައި ބެހެއްޓުމަށް އަމުރުކޮށްފައިވޭ.
ހައިކޯޓު ބޭރުން ނަގާފައިވާ ފޮޓޯ އެއް | ހައި ކޯޓް
ކޯޓުގެ ސަރވާ ހަލާކުވެފައިވާތީ ޝަރީއަތް ހިންގަން ދަތި ކަމަށް ބުނެ, ދެކުނުގެ ރަށެއްގައި ކުޑަކުއްޖަކަށް ޖިންސީ ގޯނާކުރި މައްސަލައެއްގައި ހައްޔަރުކުރި މީހަކު ދޫކޮށްލަން ނިންމި ނިންމުން ހައިކޯޓުން ބާތިލްކޮށްފި އެވެ.
މި މައްސަލަ އަކީ މިއީ އުމުރުން 8 އަހަރުގެ ތުއްތު ކުއްޖަކު ގްރޫމްކޮށް، އެ ކުއްޖާއަށް ޖިންސީ ގޯނާ ކުރި ކަމުގެ ތުހުމަތު ކުރެވޭ އާއިލާ މެމްބަރަކު ހައްޔަރުން ދޫކޮށްލި މައްސަލަ އެކެވެ. އެ މައްސަލަ އަކީ ކުޑަ ކުއްޖެއްގެ މަސްލަހަތު ހިމެނޭ މައްސަލަ އަކަށް ވާތީ އާއްމުކޮށް ހުޅުވާނުލައި ކުރިއަށް ގެންދިޔަ މައްސަލަ އެކެވެ. މި މައްސަލައިގައި ދައުވާ ލިބޭ ފިރިހެން މީހާ އަށް އުފުލާފައިވާ ދައުވާތަކުގެ ތެރޭގައި ކުޑަ ކުއްޖަކަށް ޖިންސީ ގޯނާކުރުމުގެ ކުށުގެ ދައުވާ އާއި އޮރިޔާން ކާޑު ގެންގުޅުމު ގެ ދައުވާ ހިމެނެ އެވެ.
މި މައްސަލައިގައި އޭނާ ހައްޔަރުކޮށް ފުރަތަމަ ބަންދު ގެ މުއްދަތު ޖެހީ 30 ދުވަހު އެވެ. އެ މުއްދަތު ހަމަވުމުން، ބަންދު މުއްދަތު އިތުރު ކުރަން ކޯޓަށް ގެންދިޔުމުން ކޯޓުން ވަނީ އޭނާ ދޫކޮށްލާފަ އެވެ. އެހެންނަމަވެސް، އެ މައްސަލައިގެ ޝަރީއަތްތައް ލަސްވާތީ އަދި ކޯޓުގެ ސާވާ ސިސްޓަމަށް ދިމާވެފައިވާ މައްސަލައަކާއި ގުޅިގެން ޝަރީއަތް ހިނގުމަށް ދަތިވެފައިވާކަމަށް ބުނެ އެކަން ހައްލުވަން ދެން އޭނާ ދޫކޮށްދިނުމަށް އޭނާ ގެ ފަރާތުން މެޖިސްޓްރޭޓް ކޯޓުގއި އެދުނެވެ.
އެ ހިސާބުން އެ ކޯޓުން ނިންމީ، އޭނާ ގެ ބަންދަށް ލުއި ދިނުމަށެވެ. މެޖިސްޓްރޭޓް ކޯޓުން ބުނެފައިވަނީ ކޯޓުގެ ވަސީލަތް ނެތުމުން ޝަރީއަތް ހިންގަން ދަތިވާތާ ދެ މަސް ދުވަސް ވެފައިވާއިރު އެކަމަށް އަލި މަގެއް ފެންނަން ވެސް ނެތް ކަމަށެވެ. އެހެންކަމުން ޝަރީއަތް ހިންގޭނެ ހާލަތް ނެތި، މީހެއްގެ ހައްގު ނުހިފެހެއްޓޭނެ ކަމަށް ބުނެ އޭނާ ދޫކޮށްލުމުން، ދައުލަތުން ވަނީ އެ މައްސަލަ ހައިކޯޓަށް ހުށަހަޅާފަ އެވެ.
މި މައްސަލަ ހައިކޯޓުގައި ބެއްލެވީ ފަނޑިޔާރު ހުޒައިފާ މުހައްމަދާޢި، ފާތިމަތު ފަރުހީޒާ އަދި އަބްދުﷲ ޖަމީލް މޫސާއެވެ. ތިން ފަނޑިޔާރުންގެ އިއްތިފާގުން ނިންމާފައި ވަނީ އޭނާ ޝަރީއަތުގެ މަރުހަލާ ނިމެންދެން ބަންދުގައި ބަހައްޓަން ގާނޫނުން މަގުފަހިކުރާ ކަމަށެވެ. އެހެންކަމުން ހައިކޯޓުންވަނީ އެ މީހާ މިނިވަންކުރަން ނެރުނު އަމުރު ބާތިލުކޮށްފަ އެވެ.
