މީޑިއާ އެންޑް ބްރޯޑްކާސްޓިން ކޮމިޝަނުގެ ގާނޫނު ބާތިލް ކުރުމަށް ހައިކޯޓަށް މައްސަލަ އެއް ހުށަހަޅައިފި
26 ޖެނުއަރީ 2026 | ހޯމަ 14:46މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނަކީ ގާނޫނުއަސާސީ އާއި ރާއްޖެ ބައިވެރިވެފައިވާ މުއާހަދާތަކާ ޚިލާފަށް ފާސްކޮށްފައިވާ ގާނޫނަކަށް ވާއިރު އެ ޤާނޫނުގެ ސަބަބުން ހިޔާލުފާޅުކުރުމުގެ މިނިވަންކަމާއި މައުލޫމާތު ހޯދުމުގެ މިނިވަންކަމަށް ހުރަސްއެޅޭ ކަމަށް އެމްޖޭއޭ އިން ބުނޭ
އެމްޖޭއޭ އިން ބޭއްވި ނޫސްވެރިންގެ ބައްދަލުވުމެއްގެ ތެރެއިން | ރާއްޖެއެމްވީ
މީޑިއާ އެންޑް ބްރޯޑްކާސްޓިން ކޮމިޝަނުގެ ގާނޫނު ބާތިލް ކުރުމަށްޓަކާ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ހައި ކޯޓަށް މައްސަލަ އެއް ހުށަހަޅައިފި އެވެ.
މީގެ އިތުރުން އެ މައްސަލަ ނިމެންދެން ވަގުތީ އަމުރެއް ނެރެދިނުމަށް ވަނީ އެދިފަ އެވެ. އެމްޖޭއޭއިން އެދިފައިވާ ވަގުތީ އަމުރުގައި ހައި ކޯޓުން މައްސަލައިގައި ވަކި ގޮތެއް ކަނޑައަޅަންދެން އެ ގާނޫނުގެ ދަށުން އެއްވެސް ފަރާތަކާމެދު ފިޔަވަޅު ނޭޅުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ މައްޗަށް އަމުރުކޮށްދިނުމަށް އެދިފައިވެ އެވެ.
ބާތިލުކުރަން ހުށަހަޅާފައިވާ މީޑިއާ އެންޑް ބްރޯޑްކާސްޓިން ކޮމިޝަނުގެ ގާނޫނަކީ ރާއްޖޭގެ ގާނޫނު އަސާސީގައި އެކަށައަޅާފައިވާ އުސޫލުތަކާއި ރާއްޖެ ބައިވެރިވެފައިވާ މުއާހަދާތަކާ ޚިލާފަށް ފާސްކޮށްފައިވާ ޤާނޫނެއް ކަމަށް އެމްޖޭއޭ އިން ޤަބޫލުކުރެ އެވެ.
އެގޮތުން އެ ޤާނޫނަކީ އައިސީސީޕީއާރްގެ އާޓިކަލް 19 ގައި އެބުނާ ތްރީޕާޓް ޓެސްޓާވެސް ހިލާފަށް އެކުލަވާލެވިފައިވާ ޤާނޫނެއް ކަމަށް އެ ޖަމިއްޔާ އިން ވަނީ ބުނެފަ އެވެ. މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ގާނޫނު ބާތިލުކުރަން ހައި ކޯޓުގައި އެދިފައި ވަނީ ގާނޫނުއަސާސީގެ ގިނަ މާއްދާތަކާ ހިލާފުވުމާއުި އެ ގާނޫނަކީ އެތަކެއް ހައްގުތަކެއް ގެއްލޭ ގޮތަށް އޮތް ޤާނޫނަކަށް ވާތީ އެވެ.
އެމްޖޭއޭއިން ބުނީ އެ ޤާނޫނުގެ ސަބަބުން ގާނޫނުއަސާސީން ކަށަވަރުކޮށްދީފައިވާ ގާނޫނުގެ ރައްކާތެރިކަމަށް ހުރަސް އެޅޭ ކަމަށެވެ. އަދި ހިޔާލުފާޅުކުރުމުގެ މިނިވަންކަމާއި، މައުލޫމާތު ހޯދުމާއި މައުލޫމާތު ދިނުމުގެ މިނިވަންކަމަށް ވެސް ހުރަސް އެޅޭ ކަމަށް ވަނީ ބުނެފަ އެވެ.
