މިފްކޯ ގެ ވޭނަކުން ދެ މިލިއަން ރުފިޔާ ފޭރިގަތް މައްސަލައިގައި ވަކިކުރި މީހަކަށް ލައްކައެއްހާ ރުފިޔާގެ ބަދަލުދޭން ހުކުމެއް

މިފްކޯގެ ވޭނަކުން ދެ މިލިއަން ރުފިޔާ ފޭރިގަތް މައްސަލައާ ގުޅިގެން ވަޒީފާ އިން ވަކިކުރި މިފްކޯގެ ކުރީގެ މުވައްޒަފަކަށް 96،960 (ނުވަދިހަ ހަ ހާސް ނުވަ ސަތޭކަ ފަސްދޮޅަސް) ރުފިޔާ ދޭން ހައިކޯޓުން ހުކުމްކޮށްފި އެވެ.

ނަމަވެސް އޭނާ ވަޒީފާގައި އަލުން ބެހެއްޓުމަށް ވަޒީފާއާބެހޭ ޓްރައިބިއުނަލުން ކުރި ހުކުމް ހައިކޯޓުން ވަނީ ބާތިލުކޮށްފަ އެވެ.

މި މައްސަލައަކީ 2019 ވަނަ އަހަރުގެ މާރިޗު މަހު ހިނގި ފައިސާ ފޭރުމުގެ ބޮޑު ހާދިސާއާ ގުޅިފައިވާ މައްސަލައެކެވެ. އެ ހާދިސާގައި ބޮޑުތަކުރުފާނު މަގުން މިފްކޯގެ ވޭނެއްގައި ގިނަ އަދަދެއްގެ ފައިސާ ހިފައިގެން ދަނިކޮށް، ސައިކަލުން ދިޔަ މޫނު ނިވާކޮށްގެން ތިބި ބަޔަކު އެ ވޭން މަގުމަތިން ހުއްޓުވި އެވެ. އެ ފަހުން ވޭނުގެ ބިއްލޫރިތައް ތަޅައި، ދެ މިލިއަން ރުފިޔާ ފޭރިގަތެވެ.

އެ މައްސަލައާ ގުޅިގެން އޭރު މިފްކޯގެ ޖޫނިއާ އެގްޒެކެޓިވްއެއްގެ މަގާމުގައި ހުރި މ. ސައިލާ، އިސްމާއިލް ނާތިގު ވަޒީފާއިން ވަކިކުރި އެވެ. ނާތިގު ވަޒީފާ އިން ވަކިކުރީ ފޭރުމުގައި އަމަލީ ގޮތުން ބައިވެރިވި މީހަކާ، އެ ހާދިސާ ހިނގުމުގެ 16 ދުވަސް ފަހުން ނާތިގުގެ ފޯނުން މުއާމަލާތް ކުރިކަމަށް ބެލެވިގެން ފުލުހުން ސުވާލުކޮށްފައި ވަނިކޮށެވެ.

އެ މައްސަލަ ނާތިގުގެ ފަރާތުން ވަޒީފާއާބެހޭ ޓްރައިބިއުނަލަށް ހުށަހެޅުމުން، 2021 ވަނަ އަހަރުގެ އޭޕްރީލް މަހު އެ ޓްރައިބިއުނަލުން ނިންމީ ނާތިގު ވަޒީފާ އިން ވަކިކޮށްފައިވަނީ ގާނޫނާ ހިލާފަށް ކަމަށެވެ. އެހެންކަމުން އޭނާ ވަޒީފާގައި ހުރިނަމަ ލިބޭނެ މުސާރައާއި އިނާޔަތްތައް އޭނާއަށް ދިނުމަށާއި، ވަޒީފާ އަނބުރާ އިއާދަކޮށްދިނުމަށް ވަޒީފާއާބެހޭ ޓްރައިބިއުނަލުން ހުކުމް ކުރި އެވެ.

މިފްކޯގެ ފަރާތުން 2021 ވަނަ އަހަރު ހައިކޯޓަށް އިސްތިއުނާފު ކުރި އެ މައްސަލަ، އަންގާރަ ދުވަހި ގާތްގަނޑަކަށް ފަސް އަހަރު ފަހުން ހައިކޯޓުން ނިންމީ ވަޒީފާއާބެހޭ ޓްރައިބިއުނަލްގެ ހުކުމުގެ އެއްބައި ބާތިލު ކުރުމަށްފަހު އެވެ. ފަނޑިޔާރު ހުސެއިން މަޒީރު، މުހައްމަދު ޝަނީޒް އަބްދުﷲ އަދި އަބްދުﷲ ޖަމީލް މޫސާގެ އިއްތިފާގުން ނިންމި ނިންމުމުގައިވަނީ ނާތިގު ވަޒީފާ އިން ވަކިކުރުމުގައި މައްސަލަތަކެއް ހުރިނަމަ ވެސް އަލުން ވަޒީފާދޭން އެންގި އެންގުން ބާތިލުކޮށްފަ އެވެ.

އަދި ނާތިގު އަށް އޭރު ލިބެމުން ދިޔަ މުސާރައާއި އިނާޔަތްތަކުގެ އަދަދުން، އެއް އަހަރަށްވާ ފައިސާ ދިނުމަށް ހައިކޯޓުން ހުކުމް ކުރި އެވެ. އޭނާގެ މުސާރަ އަކީ އޭރު 5050 ރުފިޔާ އެވެ. އަދި އެލަވަންސްގެ ގޮތުގައި އޭގެ 60 އިންސައްތަ އޭރު ލިބެމުން ދިޔައިރު، އަހަރަކަށް ބަލާނަމަ އެއީ ގާތްގަނޑަކަށް ލައްކައެއްހާ ރުފިޔާ އެވެ.