ގްރީންލޭންޑާ ގުޅޭ ގޮތުން ޓްރަމްޕް އާއި، ނޭޓޯގެ މަޝްވަރާގެ ތަފްސީލެއް ފްރާންސް އަކަށް ނުލިބޭ

ގްރީންލޭންޑާ ގުޅޭ ގޮތުން ނޭޓޯގެ ސެކްރެޓަރީ ޖެނެރަލް މާކް ރުޓޭ އާއި، އެމެރިކާގެ ރައީސް ޑޮނަލްޑް ޓްރަމްޕް ކުރައްވާފައިވާ މަޝްވަރާގެ އެއްވެސް ތަފްސީލެއް ލިބިފައި ނެތް ކަމަށް ފްރާންސް އިން ހާމަ ކޮށްފި އެވެ. 

ހުކުރު ދުވަހު ފްރާންސްގެ ބީއެފްއެމް ޓީވީ އަށް ދެއްވި އިންޓަވިޔުއެއްގައި އެހެން ވިދާޅުވީ، އެ ޤައުމުގެ ފޮރިން މިނިސްޓަރު ޖީން ނޮއެލް ބަރޮޓް އެވެ. 

ބުރާސްފަތި ދުވަހު ޓްރަމްޕް ވިދާޅުވެފައި ވަނީ، ގްރީންލޭންޑާ ގުޅޭ ގޮތުން އެމެރިކާގެ އެެއްބަސްވުމެއްގެ ތަފްސީލަށް މިހާރު ވެސް މަސައްކަތް ކުރަމުން އަންނަ ކަމަށެވެ. މިއީ ބާރުގެ ބޭނުން ކޮށްގެން ވިޔަސް ގްރީންލޭންޑް ހިފާނެ ކަމަށް ޓްރަމްޕް ވިދާޅުވި ފަހުން، ދައްކަވާފައިވާ ވާހަކަ އެކެވެ. 

ފޮކްސް ބިޒްނަސް ނެޓްވޯކް އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، ހަގީގަތުގައި ވެސް މިހާރު އެކަމަށް މަޝްވަރާ ކުރަމުން އަންނަ ކަމަށާއި، ތަފްސީލީ ގޮތެއްގައި އެކަން ކުރިއަށްދާ ކަމަށެވެ. މަޝްވަރާ ކުރަމުން އަންނަނީ ފުރިހަމަ އެކްސެސް ކަމަށް ކަމަށާއި، އެއީ ނިމުމެއް ނެތް ކަމެއް ކަމަށް ޓްރަމްޕް ވިދާޅުވި އެވެ. އަދި ވަކި ލިމިޓެއް ވެސް ނެތް ކަމެއް ކަމަށް އޭނާ ވިދާޅުވި އެވެ. 

މީގެ ކުރިން ޓްރަމްޕް ވަނީ ބާރުގެ ބޭނުން ކޮށްގެން ވެސް ގްރީންލޭންޑް އެމެރިކާގެ ބާރުގެ ދަަށަށް ގެންނާނެ ކަމަށް ވިދާޅުވެފަ އެވެ. ނަމަވެސް، ފަހުން އޭނާ ވަނީ އެ ވާހަކަތައް ބަދަލު ކުރައްވައި، ބާރުގެ ބޭނުން ނުރައްވާނެ ކަމަށް ވިދާޅުވެފަ އެވެ. 

އެކި އެކި މީޑިއާ ތަކުގައި ބުނެފައިވާ ގޮތުން އެމެރިކާގެ ރައީސް ޓްރަމްޕް އާއި، ނޭޓޯގެ ސެކްރެޓަރީ ޖެނަރަލް ރުޓޭ ވަނީ ގްރީންލޭންޑާ ގުޅޭ ގޮތުން އެއްބަސްވުމަކަށް ވަޑައިގެންފަ އެވެ. ނަމަވެސް، އެ އެއްބަސްވުމުގެ އެއްވެސް ތަފްސީލެއް ހާމަ ކޮށްފައި ނުވެ އެވެ. އެކަމަށް އިޝާރާތް ކުރައްވައި ބަރޮޓް ވިދާޅުވީ، އެ އެއްބަސްވުމުގެ އެއްވެސް ތަފްސީލެއް ފްރާންސް އަށް ލިބިފައި ނުވާ ކަމަށެވެ.