އެޕްސްޓީންއާ މެކްރޮންއާ ދެމެދު ގުޅުމެއް އޮތް ކަމަށް ބުނެ، ރަޝިޔާއާ ގުޅުން ހުރި ބަޔަކު ދޮގު ޚަބަރު ތަކެއް ފެތުރި

އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީން އާއި، ފްރާންސްގެ ރައީސް އިމަނުއެލް މެކްރޮންއާ ގުޅުން ތަކެއް އޮތް ކަމަށް ބުނެ، ރަޝިޔާއާ ގުޅުން ހުރި ބަޔަކު ދޮގު މައުލޫމާތު ފަތުރާފައިވާ ކަމަށް ފްރާންސް ސަރުކާރުގެ އިސް އޮފިޝަލުން ބުނެފި އެވެ. 

ފްރާންސް ސަރުކާރުގެ މަސްދަރަކުން ހުކުރު ދުވަހު ބުނެފައި ވަނީ، ރަޝިޔާއާ ގުޅުން ހުރި ސްޓޯމާ-1516 ނެޓްވާރކްއާ ގުޅިފައިވާ ދޮގު ޚަބަރު ފަތުރާ އޮޕަރޭޝަނެއް ފްރާންސްގެ އިދާރާ ތަކަށް ދެނެގަނެވިފައިވާ ކަމަށެވެ. އެ އޮޕަރޭޝަންގެ މަޤުސަދަކީ ފްރާންސްގެ ރައީސް މެކްރޮން އާއި، އެޕްސްޓީންއާ ދެމެދު ޝައްކު އުފެދޭ ގުޅުން ތަކެއް އޮތް ކަަމަށް ބުނުން ކަމަށް ފާހަގަ ކޮށްފައިވެ އެވެ. 

ފްރާންސް ސަރުކާރުގެ އިދާރާއެއް ކަމަށްވާ ވިޖިނަމް އިން ބުދަ ދުވަހު ވަނީ މި އޮޕަރޭޝަން ދެނެގެންފަ އެވެ. މި އިދާރާ އަކީ އޮންލައިންކޮށް ބޭރުގެ ފަރާތް ތަކުން ވެރިކަން ކުރުމާ ދެކޮޅަށް މަސައްކަތް ކުރުމަށް ހަވާލު ކުރެވިފައިވާ އިދާރާ އެކެވެ. އެ އޮޕަރޭޝަން ހިންގީ ފްރާންސް-ސޯއާ ނަމަކަށް ކިޔާ ޚަބަރު ފަތުރާ ވެބްސައިޓެއް ކަހަލަ ވެބްސައިޓެއް ހަދައިގެން ކަމަށް އެ މަސްދަރުން ބުނެފައިވެ އެވެ. 

އެއަށް ފަހު އެ ވެބްސައިޓުގައި ވަނީ ފްރާންސްގެ ރައީސް މެކްރޮން އާއި، އެޕްސްޓީންއާ ގުޅުން ތަކެއް އޮތް ކަމަށް ބުނާ ލިޔުން ޝާއިއު ކޮށްފަ އެވެ. އެއަށް ފަހު، އެ ޚަބަރު ވަނީ ސޯޝަލް މީޑިއާގެ އެކްސްގައި ފަތުރައިފަ އެވެ. 

އެމެރިކާގެ ޑެޕިއުޓީ އެޓަރނީ ޖެނަރަލް ޓޮޑް ބްލާންޗް ވިދާޅުވީ، އެޕްސްޓީން މައްސަލައިގެ ތިން މިލިއަނަށް ވުރެ ގިނަ ޞަފްހާގެ ފައިލް ތަކެއް ޖަނަވަރީ މަހުގެ 30 ވަނަ ދުވަހު އެމެރިކާގެ ޖަސްޓިސް ޑިޕާޓްމަންޓް އިން ޝާއިއު ކުރި ކަަމަށާއި، އޭގެ ތެރޭގައި އިތުރު ދައުވާ ތަކަށް މަގުފަހިވާ އައު އެއްވެސް މައުލޫމާތެއް ނެތް ކަމަށެވެ. އެޕްސްޓީންގެ ފައިލް ތަކުގައި ނަން އޮތް ކޮންމެ މީހަކީ އެކަމުގެ ތެރޭގައި ކުށްވެރިވެފައިވާ މީހެއް ނޫން ކަމަށް ފާހަގަ ކޮށްފައި ވީ ނަަމަވެސް، އެ ފައިލް ތަކުގެ ސަބަބުން ސިޔާސީ ގިނަ ބަޔަކު ވަނީ ހޫނު ފެނަށް ވެއްޓިފަ އެވެ. 

ބުދަ ދުވަހުގެ ރޭ ފްރާންސް-ސޯއާ އިން ވަނީ ބަޔާނެއް ނެރެ، މެކްރޮންއާ ގުޅޭ ގޮތުން ދޮގު ޚަބަރު ފަތުރާ ކަމަށް ބުނާ ބުނުމާ އެއްވެސް ގުޅުމެއް ނެތް ކަމަށް ބުނެފަ އެވެ. އެކްސްގައި ޝާއިރު ކުރި ބަޔާނެއްގައި ފްރާންސް-ސޯއާ އިން ބުނެފައި ވަނީ، އެ ނަމުގައި ހަދައިގެން އުޅޭ ފޭކް ވެބްސައިޓާ އެއްވެސް ގުޅުމެއް ވެސް ނޯންނާނެ ކަމަށެވެ. 

ސަރުކާރުގެ މަސްދަރުން ބުނެފައި ވަނީ، ދޮގު ޚަބަރު ފެތުރި އެ ސައިޓާއި، ކޮޕީކޮޕް ނަމަކަށް ކިޔާ ދޮގު ޚަބަރު ފަތުރާ ބަޔަކާ ގުޅުމެއް އޮތް ކަަމަށް ޤަބޫލު ކުރެވޭ ކަމަށެވެ. ކޮޕީކޮޕް ގުޅިފައި ވަނީ 2016 ވަަނ އަހަރުން ފެށިގެން ރަޝިޔާގައި ދިރިއުޅެމުން އަންނަ، އެމެރިކާގެ ކުރީގެ ފުލުހުންގެ އޮފިސަރެއް ކަމަށްވާ ޖޯން މާކް ޑޫގަންއާ ކަމަށް ވެސް އެ މަސްދަރުން ބުނެފައިވެ އެވެ. 

އެކްސްގައި އެންމެ ފުރަތަަމަ އެ ވީޑިއޯ ހިއްސާ ކޮށްފައިވާ އެކައުންޓަކީ ސްޓޯމް-1516 އޮޕަރޭޝަންތައް ފަތުރާލުމުގައި ގިނައިން ބަައިވެރިވާ އެކައުންޓަކުން ކަަމަށް ބުނެފައިވެ އެވެ. އެއަށް ފަހު، ވިޖިނަމް އިން ބަލަމުން އަންނަ އެހެން ގިނަ އެކައުންޓު ތަކުން އެ ވީޑިއޯ ފަތުރާފައިވާ ކަމަށާއި، އެއީ ފައިސ ދީގެން ހިންގާ އެކައުންޓު ތަކެއް ކަަމަށް ޤަބޫލު ކުރެވޭ ކަމަށް ސަރުކާރުގެ މަސްދަރުން ބުނެފައިވެ އެވެ.