ޔޫކްރެއިން އަށް ސަލާމަތީ ޔަޤީންކަން ދިނުމަށް، ޔޫރަޕާއި އެމެރިކާގެ އިއްތިހާދުން އެއްބަސްވެއްޖެ

ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމައިގައި، ޔޫކްރެއިން އަށް ސަލާމަތީ ޔަޤީންކަން ދިނުމަށް ޔޫރަޕާއި އެމެރިކާގެ އިއްތިހާދީ ޤައުމު ތަކުން އެއްބަސްވެއްޖެ އެވެ.

ފްރާންސްގެ ރައީސް އިމަނުއެލް މެކްރޮން އަންގާރަ ދުވަހު ވިދާޅުވެފައި ވަނީ، ޔޫކްރެއިންގެ ސަލާމަތީ ޔަޤީންކަން ކަށަވަރު ކުރުމުގެ އެއްބަސްވުމެއް އެކުލަވާލާފައިވާ ކަމަށެވެ. އެގޮތުން ހަނގުރާމަ ހުއްޓުމަކަށް ގެނައުމަށް ފަހު، އެކަމުގެ ދަށުން ބަލަހައްޓަން ޖެހޭ ކަންކަމުގައި އެމެރިކާ އިން ލީޑު ކުރާނެ ކަމަށް ވެސް މެކްރޮން ވިދާޅުވެފައިވެ އެވެ. 

މެކްރޮންގެ އިތުރުން، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އާއި، ޔޫކްރެއިންގެ ރައީސް ވޮލޮޑިމިއަރ ޒެލެންސްކީ ވަނީ ފްރާންސްގެ ވެރި ރަށް ޕެރިހުގައި ބައްދަލު ކުރައްވައިފަ އެވެ. ކޯލިޝަން އޮފް ދަ ވިލިންގެ ބައްދަލުވުމަށް ފަހު ވަނީ، ހަނގުރާމަ ހުއްޓުމަށް ފަހު އިނގިރޭސިވިލާތާއި، ފްރާންސް އަދި ޔޫރަޕުގެ އެހެން ޤައުމު ތަކުން ޔޫކްރެއިންގެ ބިމަށް ސިފައިން ފޮނުވުމަށް އެއްބަސްވެ ވަނީ ސޮއި ކޮށްފަ އެވެ. 

އެ ބައްދަލުވުމުގައ މެކްރޮން ވިދާޅުވީ، އެ ފިޔަވަޅު ތަކަކީ ދެމެހެއްޓެނެވި ސުލްޙައެއް ޤާއިމު ކުރުމަށް ވަރުގަދަ ސަލާމަތީ ޔަޤީންކަން ދިނުމަށް އުޅޭ ފިޔަވަޅު ތަކެއް ކަމަށެވެ. އެމެރިކާ ހިމެނޭހެން އިއްތިހާދީ ޤައުމު ތަކުގެ ދެމެދު އޮޕަރޭޝަނަލް ގޮތުން އެއްބައިވަންތަކަން ޙާސިލު ވެފައިވާ ކަމަށް ވެސް މެކްރޮން ވަނީ ވިދާޅުވެފަ އެވެ. އެކަން ފާހަގަ ކުރައްވައި މެކްރޮން ވިދާޅުވީ، ސަލާމަތީ ޔަޤީން ކަމަކީ ސުލްޙައިގެ އެއްބަސްވުމަކުން ރަޝިޔާ އިން އަލުން ޔޫކްރެއިން އަށް ނުރައްކަލެއް ކުރިމަތި ނުވާނެކަން ކަށަވަރު ކުރެވޭނެ ހަމައެކަނި ގޮތް ކަމަށެވެ. 

އެ މަޝްވަރާ ތަކުގައި އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް ވެސް ވަނީ ބައިވެރިވެ ވަޑައިގެންފަ އެވެ. ވިޓްކޮފް ވިދާޅުވީ މަޝްވަރާ ތަކުން ވަރަށް ބޮޑު ކުރިއެރުމެއް ލިބިފައިވާ ކަމަށެވެ. އެގޮތުން އިއްތިހާދީ ޤައުމު ޔަކުން ޔޫކްރެއިން އަށް ދޭނެ ސަލާމަތީ ޔަޤީންކަމުގެ މައްސަލަ ބޮޑު ދަރަޖަ އަކަށް ނިންމާލެވިފައިވާ ކަމަށް އޭނާ ވިދާޅުވި އެވެ. އަދި އެކަމުގެ ސަބަބުން ހަނގުރާމަ ނިމުމުން، އެއީ ދާއިމީ ނިމުމަކަށް ވާނެކަން ޔޫކްރެއިންގެ ރައްޔިތުންނަށް އެނގޭނެ ކަމަށް ވެސް ވިޓްކޮފް ވިދާޅުވި އެވެ. 

އިނގިރޭސިވިލާތުގެ ބޮޑު ވަޒީރު ސްޓާމާ ވިދާޅުވެފައި ވަނީ، ހަނގުރާމަ ހުއްޓުވުމަށް ފަހު އިނގިރޭސިވިލާތް އަދި ފްރާންސް އިން ޔޫކްރެއިންގެ އެކި ހިސާބު ތަކުގައި އަސްކަރީ ހަބުތައް ޤާއިމުކޮށް، ޔޫކްރެއިންގެ ދިފާއި ބޭނުން ތަކަށް ހަތިޔާރާއި، އަސްކަރީ ސާމާނު ބެހެއްޓުމަށް ރައްކާތެރި ތަންތަން ރާވާފައިވާ ކަމަށެވެ. ނަމަވެސް، ރަޝިޔާގެ ރައީސް ވުލަޑިމިއަރ ޕުޓިން ހުންްނެވީ ސުލްޙަ އަށް ތައްޔާރަށް ނޫން ކަމަށް ސްޓާމާ ވަނީ ވިދާޅުވެފަ އެވެ.