މައްސަލައިގެ ތަހުގީގުގައި ބުނެފައި ވަނީ އޭނާ ބަލި މީހުންނަށް ވިހަ ދީފައިވާ ކަމަށާއި، އެކަމުގެ ސަބަބުން އެ މީހުންގެ ހިތުގެ ޙާލަތު ގޯސްވެ، ހިތް ހުއްޓިފައިވާ ކަމަށް. އެ ހާދިސާ ތަކުގައި 12 މީހުންގެ ފުރާނަ ސަލާމަތް ނުކުރެވި މަރުވެފައިވާ ކަމަށާއި، ބާކީ ތިބި މީހުންގެ ފުރާނަ ފަރުވާ އިން ސަލާމަތް ކުރެވުނު ކަމަށް ފާހަގަ ކޮށްފައިވޭ.
ބަޔަކަށް ވިހަ ދީ މަރާލި މައްސަލައިގައި އުމުރު ދުވަހުގެ ޖަލު ހުކުމް އިއްވި ޑޮކްޓަރު
ފްރާންސްގައި 30 ބަލި މީހުންނަށް ވިހަ ދީ، 12 މީހަކު މަރާލި މައްސަލައިގައި، ޑޮކްޓަރަކު އުމުރު ދުވަހަށް ޖަލަށް ލުމަށް ފްރާންސްގެ ކޯޓަކުން ޙުކުމް ކޮށްފި އެވެ.
ބުރާސްފަތި ދުވަހު ފްރާންސްގެ ކޯޓަކުން އުމުރު ދުވަހުގެ ޖަލު ޙުކުމެއް އިއްވާފައި ވަނީ އުމުރުން 53 އަހަރުގެ ފްރެޑެރިކް ޕެޝިއާ ނަމަކަށް ކިޔާ ޑޮކްޓަރެއްގެ މައްޗަށެވެ.
އޭނާ މަސައްކަތް ކޮށްފައި ވަނީ އިރުމަތީ ސިޓީ ބެސަންސޮންގައި ހުންނަ ދެ ކްލިނިކެއްގައި އެނެސްތީސިއާ ޑޮކްޓަރެއްގެ ގޮތުގަ އެވެ. އެތައް ބަޔަކަށް ވިހަ ދީ، ބަޔަކު މަރާލި ކަމަށް ތުހުމަތު ކުރެވޭ ހާދިސާ ހިނގާފައި ވަނީ 2008 ވަނަ އަހަރުން ފެށިގެން، 2017 ވަނަ އަހަރާ ދެމެދު ކަމަށް ބުނެފައިވެ އެވެ.
މައްސަލައިގެ ތަހުގީގުގައި ބުނެފައި ވަނީ އޭނާ ބަލި މީހުންނަށް ވިހަ ދީފައިވާ ކަމަށާއި، އެކަމުގެ ސަބަބުން އެ މީހުންގެ ހިތުގެ ޙާލަތު ގޯސްވެ، ހިތް ހުއްޓިފައިވާ ކަމަށެވެ. އެ ހާދިސާ ތަކުގައި 12 މީހުންގެ ފުރާނަ ސަލާމަތް ނުކުރެވި މަރުވެފައިވާ ކަމަށާއި، ބާކީ ތިބި މީހުންގެ ފުރާނަ ފަރުވާ އިން ސަލާމަތް ކުރެވުނު ކަމަށް ފާހަގަ ކޮށްފައިވެ އެވެ.
މީގެ އިތުރުން ތަހުގީގުގައި ބުނެފައި ވަނީ ޑޮކްޓަރު އެކަން ކޮށްފައި ވަނީ، އޭނާ އާއެކު މަސައްކަތް ކުރާ ބައެއް އެހެން ޑޮކްޓަރުންގެ އަގު ވައްޓާލައި، އެމީހުންގެ ނަން ހަޑި ކުރުމުގެ މަޤުސަދުގަ އެވެ. އެގޮތުން އޭނާ އެ ކުށްތައް ކޮށްފައި ވަނީ، އެހެން ޑޮކްޓަރުންގެ ބޮލުގައި ދޮގު ތުހުމަތު ތަކެއް އެޅުވުމުގެ މަޤުސަދުގައި ކަމަށް ފާހަގަ ކޮށްފައިވެ އެވެ.
ޝަރީއަތުގައި އޭނާގެ މައްޗަށް އެ މައްސަލަ ސާބިތުވެފައިވާ ކަމަށް ނިންމާފައިވާއިރު، މައްސަލައިގައި ޙުކުމް ކޮށްފައި ވަނީ އޭނާ އަށް އުމުރު ދުވަހުގެ ޖަލު ޙުކުމެއް ތަންފީޒު ކުރުމަށެވެ. މިއީ ފްރާންސްގެ ޤާނޫނުގައި އެފަދަ ކުށް ތަަކަށް ކަނޑައަޅާފައިވާ އެންމެ ބޮޑު އަދަބެވެ.
ފްރާންސްގެ މީޑިއާ ތަކުގައި ބުނެފައި ވަނީ، އެ މައްސަލަ އަކީ ފްރާންސްގެ ޞިއްޙީ ނިޒާމުގައި ހިނގި ވަރަށް ބޮޑު ކުށެއް ކަމަށެވެ. ޚާއްސަކޮށް ބަލި މީހުންނަށް ފަރުވާ ދިނުމަށް ތިބޭ ޑޮކްޓަރުންނާއި، އާންމުންގެ އިތުބާރު ހޯދާފައިވާ ޑޮކްޓަރުން މިފަދަ ކަންކަން ކުރުމަކީ ކަންބޮޑުވާ ކަމެއް ކަމަށް ބުނެފައިވެ އެވެ.
މި މައްސަލަ ފެންމަތި ވުމުން ފްރާންސްގެ ޞިއްޙީ ދާއިރާ އަށް ވަނީ ބޮޑެތި ބަދަލު ތަކެއް ގެނެސްފަ އެވެ. އެގޮތުން ހޮސްޕިޓަލު ތަކާއި، ކްލިނިކް ތަކުގައި ބަލި މީހުންގެ ރައްކާތެރިކަން ކަށަވަރު ކުރުމަށް އިތުރު ފިޔަވަޅުތައް އެޅުމަށް ވަނީ ނިންމައިފަ އެވެ. އަދި އެކަން ތަންފީޒު ކުރުމަށް ވެސް މިހާރު ވަނީ ފަށައިފަ އެވެ.
ޑޮކްޓަރުގެ މައްޗަށް އުމުރު ދުވަހުގެ ޖަލު ހުކުމެއް އިއްވާފައިވާއިރު، އެ މައްސަލައިގައި އަނިޔާވި ބަލި މީހުންގެ އާއިލާ ތަކުން ވަނީ އެކަމުގެ ހިތްހަމަ ޖެހުން ފާޅު ކޮށްފަ އެވެ. ނަމަވެސް، އެ މީހުންގެ އާއިލާ މީހުންނަށް ލިބުނު ގެއްލުން އަދި ވެސް އިންތިހާ އަށް ބޮޑު ކަމަށާއި، އެކަމުގެ ސަބަބުން އާއިލާ ތަކަށް އިންތިހާ އަށް ނިކަމެތިކަން ކުރިމަތިވެފައިވާ ކަމަށް ވަނީ ބުނެފަ އެވެ.
މަސްދަރު: އޭއެފްޕީ
