އައު އެއާކްރާފްޓް ކެރިއަރެއް ބިނާ ކުރަން ހަމަޖެހިފައިވާ ކަމަށް މެކްރޮން ވިދާޅުވެއްޖެ

ފްރާންސް އިން، އައު އެއާކްރާފްޓް ކެރިއަރެއް ބިނާ ކުރުމަށް ހަމަޖެހިފައިވާ ކަމަށް އެ ޤައުމުގެ ރައީސް އިމަނުއެލް މެކްރޮން އިއުލާން ކުރައްވައިފި އެވެ. 

އާދީއްތަ ދުވަހު މެކްރޮން އެކަން އިއުލާން ކުރައްވާފައިވާއިރު، މިއީ 2038 ވަނަ އަހަރުގެ ނިޔަލަށް ބޭނުން ކުރުން ހުއްޓާލަން ނިންމާފައިވާ ޗާލްސް ޑީ ގޯލްގެ ބަދަލުގައި ގެންނަ ކެރިއަރެއް ކަމަށް ހާމަ ކުރައްވާފައިވެ އެވެ. 

މި ނިންމުން ނިންމާފައި ވަނީ، ރަޝިޔާ އިން ޔުކްރެއިން އަށް ހަމަލާ ދެމުން އަންނައިރު، އެ ޙާލަތުގައި ޔޫރަޕުގެ ޤައުމު ތަކުން އެ ޤައުމު ތަކުގެ ސިފައިންގެ ބާރު ވަރުގަދަ ކުރުމަށް މަސައްކަތް ކުރަމުން އަންނަ ދަނޑިވަޅެއްގަ އެވެ. މިއީ ފްރާންސް އިން ކަނޑުގައި އޮންނަ އެ ޤައުމުގެ ބާރު އިތުރު ކުރުމަށް މަސައްކަތް ކުރަމުން އަންނަ ދަނޑިވަޅެއްކަން ވެސް ފާހަގަ ކުރެވެ އެވެ. 

އެކަން އިއުލާން ކުރައްވަމުން މެކްރޮން ވިދާޅުވީ، ހަމަލާ އެއް ދީފާނެ ކޮންމެ ޙާލަތަކަށް ފްރާންސް އޮންނަން ޖެހޭނީ ވަރުގަދަކޮށް ކަމަށެވެ. އެގޮތުން އެކަމުގެ ދަށުން ފްރާންސް އަށް އައު އެއާކްރާފްޓް ކެރިއަރެއް ހޯދުމަށް ނިންމެވީ ކަމަށް މެކްރޮން ވިދާޅުވި އެވެ. އަދި އެކަން ކުރިއަށް ގެންދަން ނިންމީ މި ހަފުތާގެ ތެރޭގައި ކަމަށް ވެސް މެކްރޮން ވިދާޅުވި އެވެ. 

ނިއު ޖެނެރޭޝަން އެއާކްރާފްޓް ކެރިއަރު (ޕީއޭއެންޖީ)ގެ ނަން ދީފައިވާ މި މަޝްރޫއަށް ޚަރަދު ވާނެ ކަމަށް ލަފާ ކޮށްފައި ވަނީ ގާތް ގަނޑަކަށް 10.25 ބިލިއަން ޔޫރޯ އެވެ. ނުވަތަ 12 ބިލިއަން އެމެރިކާ ޑޮލަރެވެ. 

މި ކެރިއަރުގައި ގާތް ގަނޑަކަށް 30 ފައިޓާ ޖެޓު އަދި 2000 ސިފައިންނަށް ތިބެވޭނެ އެވެ. މި ކެރިއަރުގެ ދިގު މިނުގައި 310 މީޓަރު، ނުވަތަ 1007 ފޫޓު ހުންނާނެ އެވެ. އަދި ފުޅާ މިނުގައި 85 މީޓަރު ހުންނައިރު، މިއީ ޗާލްސް ޑީ ގޯލް ކެރިއަރަށް ވުރެ ބޮޑު ކެރިއަރެކެވެ.

ފްރާންސްގެ އަސްކަރީ މިނިސްޓަރު ކެތެރީން ވޯޓްރިން އެކްސް ގައި ކުރެއްވި ޕޯސްޓެއް ގައި ވިދާޅުވީ، އެ ކެރިއަރުގެ ސަބަބުން ފްރާންސްގެ ސިފައިންނަށް އިތުރު ބާރުވެރި ކަމެއް ލިބި، ކުރިއެރުން ތަކެއް ލިބޭނެ ކަމަށެވެ. އަދި ސިފައިންނަށް ކަނޑުގެ ބާރު ދެމެހެއްޓޭނެ ކަމަށާއި، މި ކެރިއަރު 2038 ވަނަ އަހަރު ޚިދުމަތަށް ގެނައުމަށް މަސައްކަތް ކުރައްވަމުން ގެެންދަވާ ކަމަށް ވެސް އެކަމަަނާ ވިދާޅުވި އެވެ. 

ފްރާންސް އަކީ، ޔޫރަޕިއަން ޔޫނިއަންގެ ޤައުމު ތަކުގެ ތެރެއިން ނިއުކްލިއާ ހަތިޔާރު ހުރި ހަމައެކަނި ޤައުމެވެ. އެެމެރިކާ އަށް ފަހު، ނިއުކްލިއާ ބާރުން ދުއްވާ އެއާކްރާފްޓް ކެރިއަރު ހިންގާ ހަމައެކަނި ޤައުމަކީ ވެސް ފްރާންސް އެވެ. އެއާކްރާފްޓް ކެރިއަރު ހިންގާ ޔޫރަޕުގެ އެހެން ޤައުމު ތަކަކީ އިނގިރޭސިވިލާތް، އިޓަލީ، ރަޝިޔާ އަދި ތުރުކީ އެވެ.