ޔޫރަޕުގެ ސިޔާސީ ނިޒާމު އޮތީ ނުރައްކަލެއްގެ ތެރޭގައި: ފްރާންސްގެ ފޮރިން މިނިސްޓަރު

ޔޫރަޕުގެ ސިޔާސީ ނިޒާމު އޮތީ ބޮޑު ނުރައްކަލެއްގެ ތެރޭގައި ކަމަށާއި، އެ ނިޒާމު ދެމެހެއްޓުމަށް ފިޔަވަޅު ތަކެއް އަޅަން ޖެހޭ ކަމަށް ފްރާންސްގެ ފޮރިން މިނިސްޓަރު ޖީން ނޮއެލް ބަރޮޓް ވިދާޅުވެއްޖެ އެވެ.

ފްރާންސްގެ ފޮރިން މިނިސްޓަރު ބަރޮޓް މިހެން ވިދާޅުވީ ހުކުރު ދުވަހު ފްރާންސްގެ ސަފީރުންނަށް ދެއްވި އަހަރީ ޚިތާބުގަ އެވެ. 

އެގޮތުން ބަރޮޓް ވިދާޅުވީ ޔޫރަޕުގެ ސިވިލައިޒޭޝަން ނެތިގެން ނުދާނެ ކަމަށާއި، ނަމަވެސް ޔޫރަޕުގެ ސިޔާސީ ނިޒާމު މިއަދު އޮތީ ނުރައްކަލެއްގެ ތެރޭގައި ކަމަށެވެ. އޭނާ ބުނީ ލަފާ ކުރަން ނޭނގޭ ޙާލަތެއްގައި ދުނިޔެ އޮތް ނަަމަވެސް، ސައިންޓިފިކް ގޮތުންނާއި، ޓެކްނޮލޮޖީގެ ގޮތުންނާއި، ސަގާފީ އަދި މާލީ ގޮތުން ކުރިއެރުން ތަކެއް ހުރި ކަމަށެވެ. އެކަމަކު ވެސް، ޔޫރަޕުގެ ސިޔާސީ ނިޒާމު މިއަދު ނުރައްކަލަކަށް ހުށަހެޅިފައިވާ ކަމަށް އޭނާ ވިދާޅުވި އެވެ. 

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން މިދިޔަ ޑިސެމްބަރު މަހުގެ ތެރޭގައި ނެރުނު އެމެރިކާގެ ޤައުމީ ސަލާމަތީ ސްޓްރެޓެޖީގައި ވަނީ، ޔޫރަޕަށް ވަރަށް ބޮޑަށް ފާޑު ކިޔައިފަ އެވެ. އެ ސްޓްރެޓެޖީގައި ޔޫރަޕުގެ ސިވިލައިޒޭޝަން ނެތިގެންދާ ނުރައްކަލެއްގައި އޮތް ކަމަށް ބުނެ، ކަނާއަތު ފިޔައިގެ ޕާޓީ ތަކުގެ ތެރޭގައި ކުރިމަތިލުން ބިނާ ކުރުމަށް ވެސް ގޮވާލާފައިވެ އެވެ. 

ފޮރިން މިނިސްޓަރު ބަރޮޓް ވިދާޅުވީ، ޔޫރަޕުގެ ސިވިލައިޒޭޝަން ނެތިގެންދާ ޙާލަތެއްގައި ނެތް ކަމަށާއި، އެހެން ބުނާ ފަރާތް ތަކުން އެމީހުންގެ ނަފުސު ރައްކާތެރި ކުރަން ވިސްނާލަން ވާނެ ކަމަށެވެ. 

ނަމަވެސް، ބަރޮޓް ދެކިލައްވާ ގޮތުގައި ޔޫރަޕުގައި އެންމެ ބޮޑު ނުރައްކަލެއް އޮތީ، އެކުވެރި ކަމުގެ ގުޅުން ބަލި ކަށި ކުރަން މަސައްކަތް ކުރާ ދުޝްމިނުންގެ ފަރާތުންނެވެ. އެގޮތުން ބަރޮޓް ވިދާޅުވީ، ޔޫރަޕިއަން ޔޫނިއަން މިހާރު އޮތް ގޮތަށް މީގެ ދިހަ އަހަރު ފަހުން ދެމި އޮންނާނެ ކަމުގެ ޔަގީން ކަމެއް ވެސް ނެތް ކަމަށެވެ.

ބަރޮޓްގެ ވާހަކައިގައި އެމެރިކާ ސިފަ ކޮށްފައި ވަނީ އަބަދު އެއްބަސް ނުވެވޭ، ނަމަވެސް، އެކުވެރި ބައެއްގެ ގޮތުގަ އެވެ.