މަދޫރޯ ހައްޔަރު ކުރުމާ އެކު، މެކްރޮން ގޮވާލެއްވީ ސުލްހަވެރި އަދި ޑިމޮކްރަޓިކް ބަދަލަކަށް

ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކޮށްފައިވާއިރު، އެ ޤައުމުގައި ސުލްހަވެރި އަދި ޑިމޮކްރަޓިކް ބަދަލެއް ގެނައުމަށް ފްރާންސްގެ ރައީސް އިމަނުއެލް މެކްރޮން ގޮވާލައްވައިފި އެވެ. 

އެމެރިކާ އިން މަދޫރޯ ހައްޔަރު ކުރުމާ އެކު، އެކްސްގައި ކުރެއްވި ޕޯސްޓެއްގައި މެކްރޮން ވިދާޅުވެފައި ވަނީ ވެނެޒުއެލާ އަށް ޑިމޮކްރަޓިކް ބަދަލެއް ގެންނަން ޖެހޭ ކަމަށެވެ. އަދި އެކަން ކުރަން ވާނީ ވެނެޒުއެލާގެ ރައްޔިތުން ބޭނުންވާ ގޮތަށް އިޙުތިރާމާ އެކު ކަމަށް ވެސް މެކްރޮން ވަނީ ވިދާޅުވެފަ އެވެ، 

މެކްރޮން ވިދާޅުވީ ކުރިއަށް އޮތް މަރުހަލާ ވާން ޖެހޭނީ ސުލްހަވެރިކަމާ އެކު އަދި ޑިމޮކްރަޓިކް ނިޒާމެއްގެ ތެރެއިން ކުރިއަށް ގެންދެވޭނެ މަރުހަލާ އަކަށް ކަމަށެވެ. އަދި 2024 ވަނަ އަހަރު ވެނެޒުއެލާގެ ރައީސް ކަމަށް އިންތިޚާބުވީ އެޑްމުންޑޯ ގޮންޒާލެޒް އުރުޓިއާގެ ބެއްލެވުމުގެ ދަށުން، ބަދަލުގެ އެ މަރުހަލާ ކުރިއަށް ގެންދަވާނެ ކަމަށް އުންމީދު ކުރައްވާ ކަމަށް ވެސް މެކްރޮން ވަނީ ވިދާޅުވެފަ އެވެ. 

ދުނިޔޭގެ އެތައް ޤައުމަކުން މަދޫރޯގެ ވެރިކަން ޤަބޫލު ނުކުރާއިރު، ފްރާންސް އިންް ވެސް މަދޫރޯގެ ވެރިކަން ޤަބޫލެއް ނުކުރެ އެވެ. މެކްރޮންގެ ޕޯސްޓުގައި ވެސް މަދޫރޯ ސިފަ ކުރައްވާފައި ވަނީ ޑިކްޓޭޓަރެއްގެ ގޮތުގަ އެވެ. އަދި ޑިކްޓޭޓަރެއްގެ ކިބައިން ވެނެޒުއެލާގެ ރައްޔިތުން މިނިވަން ވެފައިވާ ކަމަށް މެކްރޮން ވިދާޅުވެފައިވެ އެވެ.

މީގެ އިތުރުން މެކްރޮން ވިދާޅުވެފައި ވަނީ، ކުރިއަށް އޮތް ބަދަލުގެ މަރުހަލާ އަށް ބައިނަލްއަޤުވާމީ މުޖުތަމައުގެ އެއްބާރުލުން އަދި ތާއީދު ލިބެން ޖެހޭ ކަމަށެވެ. އަދި މި ހައްސާސް ވަގުތުގައި ސަލާމަތާއި ރައްކާތެރިކަން ކަށަވަރު ކުރުމަށް، ސަރަހައްދުގެ ބައިވެރިންނާ އެކު ފްރާންސް އިން ވާހަކަ ދައްކަމުން ގެންދާނެ ކަމަށް މެކްރޮން ފާހަގަ ކުރެއްވި އެވެ. 

ހޮނިހިރު ދުވަހު އެމެރިކާ އިން ވަނީ ކުއްލި ގޮތެއްގައި ވެނެޒުއެލާ އަށް އަމާޒުކޮށް ހަމަލާ ތަކެއް ދީފަ އެވެ. އެއަށް ފަހު ވަނީ، މަދޫރޯ އާއި އޭނާ ގެ އަނބިކަނބަލުން ހައްޔަރު ކޮށްފަ އެވެ. އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް ކުރިއަށް ގެންދިޔަ މި އޮޕަރޭޝަންގައި މަދޫރޯ ހައްޔަރު ކޮށްފައިވާއިރު، މިއީ އިންސާފުގެ ކުރި މައްޗަށް އޭނާ ގެނައުމަށް ކުރި މަސައްކަތެއް ކަމަށް އެމެރިކާ އިން ވަނީ ފާހަގަ ކޮށްފަ އެވެ. 

އާދިއްތަ ދުވަހު މެކްރޮން ކުރެއްވި އިތުރު ޕޯސްޓެއްގައި ވިދާޅުވެފައި ވަނީ، ވެނެޒުއެލާގެ އިދިކޮޅު ލީޑަރު މަރީއާ ކޮރީނާ މަޗާޑޯ ވާހަކަ ދައްކަވައި، މަޝްވަރާ ކުރައްވާފައިވާ ކަމަށެވެ. އެގޮތުން މަދޫރޯގެ ވެރިކަމުގައި ހައްޔަރު ކޮށްފައިވާ ސިޔާސީ ގައިދީން މިނިވަން ކުރުމާއި، އެ މީހުންނަށް ރައްކާތެރިކަން ދިނުމަށް މަޗާޑޯ ގޮވާލައްވާފައިވާ ގޮވާލެއްވުމަށް ތާއީދު ކުރައްވާ ކަމަށް ވެސް މެކްރޮން ވިދާޅުވި އެވެ. 

މީގެ އިތުރުން ވެނެޒުއެލާގެ އެހެން ރައްޔިތުންނެކޭ އެއް ފަދައިން، މަޗާޑޯ އަށް ވެސް ފްރާންސް އަށް އިތުބާރު ކުރެވޭނެ ކަމަށް މެކްރޮން ވިދާޅުވި އެވެ. ޚާއްސަކޮށް ސުލްޙަވެރިކަމާއި، ޑިމޮކްރަޓިކް ނިޒާމެއްގެ ތެރެއިން ކަންކަން ކުރިއަށް ގެންދިޔުމަށް މަޗާޑޯ ގޮވާލަމުންދާ ގޮވާލުމަށް ފްރާންސްގެ ތާއީދު އޮންނާނެ ކަމަށް ވެސް ވިދާޅުވެފައިވެ އެވެ. 

އެމެރިކާ އިން މަދޫރޯ ހައްޔަރު ކޮށްފައިވާއިރު، މިހާރު އޭނާ ހުންނެވީ އެމެރިކާގެ ބެލުމުގެ ދަށުގަ އެވެ. އެމެރިކާގެ ރައީސް ޓްރަމްޕް ވިދާޅުވެފައި ވަނީ، ވެނެޒުއެލާގެ ކަންކަން ކުރިއަށް ގެންދާނީ އެމެރިކާގެ ބެލުމުގެ ދަށުން ކަމަށެވެ.