ޕްރެޒިޑެންޓްސް ކަޕް އާދީއްތަ ދުވަހު ފަށަނީ
އެގޮތުން ގުރޫޕް އެކެއްގައި ހިމެނޭނީ ލީގުގެ އެއް ވަނަ ޓީމާއި، ހަތަރު ވަނަ ޓީމުގެ އިތުރުން، ޕްލޭ އޮފްގެ ދެ ވަނަ މެޗުން މޮޅުވާ ޓީމެއް. އަދި ގުރޫޕް ދޭއްގައި ހިމެނޭނީ ލީގުގެ ދެ ވަނަ އާއި، ތިން ވަނައިގެ އިތުރުން ޕްލޭ އޮފްގެ ފުރަތަމަ މެޗުން މޮޅުވާ ޓީމެއް.
2023 ވަނަ އަހަރުގެ ޕްރެޒިޑެންޓްސް ކަޕްގެ ތެރެއިން | އެފްއޭއެމް
ރައީސުލްޖުމްހޫރިއްޔާގެ ވާދައިގެ ތައްޓަށް ކުޅޭ، ޕްރެޒިޑެންޓްސް ކަޕް އަންނަ އާދީއްތަ ދުވަހު ފަށާ ގޮތަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ކަނޑައަޅައިފި އެވެ.
އާދީއްތަ ދުވަހު ޕްރެޒިޑެންޓްސް ކަޕް ފަށާއިރު، މިފަހަރުގެ މުބާރާތް ކުރިއަށް ގެންދާނީ ދެ ގުރޫޕަކަށް ބަހާލައިގެންނެވެ. އެގޮތުން މިހާރު ކުރިއަށްދާ ދިރާގު ދިވެހި ޕްރިމިއާ ލީގުގެ ގަދަ ހަތަރު ޓީމަށް ޕްރެޒިޑެންޓްސް ކަޕް އިން ސީދާ ޖާގަ ލިބޭނެ އެވެ. އަނެއް ދެ ޖާގަ ލިބޭނީ ނޮކް އައުޓް މެޗު ތަކެއް ކުޅެގެން މޮޅުވާާ ދެ ޓީމަކަށެވެ.
ލީގުގެ ގަދަ ހަތަރު ޓީމު ދެ ގުރޫޕަކަށް ބަހާލާނީ ތާވަލްގައި ޕޮއިންޓު ލިބިފައިވާ ތަރުތީބުން ސީޑު ކޮށްގެންނެވެ. ނޮކް އައުޓް މެޗުތަކުގައި ކުޅެން ޖެހޭނީ ތާވަލްގެ ފަސް ވަނަ އާއި، އަށް ވަނައާ ދެމެދު އޮންނަ ހަތަރު ޓީމެވެ. އެ މެޗު ތަކުން މޮޅުވާ ދެ ޓީމާ އެކު، ޖުމުލަ ހަ ޓީމު ދެ ގުރޫޕަށް ބަހާލަން ވަނީ ނިންމައިފަ އެވެ.
އެގޮތުން ގުރޫޕް އެކެއްގައި ހިމެނޭނީ ލީގުގެ އެއް ވަނަ ޓީމާއި، ހަތަރު ވަނަ ޓީމުގެ އިތުރުން، ޕްލޭ އޮފްގެ ދެ ވަނަ މެޗުން މޮޅުވާ ޓީމެވެ. އަދި ގުރޫޕް ދޭއްގައި ހިމެނޭނީ ލީގުގެ ދެ ވަނަ އާއި، ތިން ވަނައިގެ އިތުރުން ޕްލޭ އޮފްގެ ފުރަތަމަ މެޗުން މޮޅުވާ ޓީމެވެ.
ލީގު ތާވަލްގެ އެއް ވަަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން އާއި، ހަތަރު ވަނައިގައި އޮތް ބުރު ސްޕޯޓްސް ކުލަބު އަދި ޕްލޭ އޮފްގެ ދެ ވަނަ މެޗުން މޮޅުވާ ޓީމު ހިމެނޭނީ ގުރޫޕު އެކެއްގަ އެވެ. އަނެއް ގުރޫޕުގައި އޮންނާނީ ދެ ވަނަ ހޯދި އޮޑި ސްޕޯޓްސް ކުލަބާއި، ތިން ވަނަ ހޯދި ނިއު ރޭޑިއަންޓް ސްޕޯޓްސް ކުލަބު އަދި ޕްލޭ އޮފްގެ ފުރަތަމަ މެޗުން މޮޅުވާ ޓީމެވެ.
ގުރޫޕް ސްޓޭޖުގެ މެޗުތައް ކުޅުމަށް ފަހު، ކޮންމެ ގުރޫޕެއްގެ ވެސް އެއް ވަނަ ޓީމާއި، ދެ ވަނަ ޓީމަށް ސެމީ ފައިނަލްގެ ޖާގަ ލިބޭއިރު، ކްރޮސްކޮށް ސެމީ ފައިނަލް ކުޅުމަށް ފަހު މޮޅުވާ ދެ ޓީމު ފައިނަލަށް ދާނެ އެވެ. އެފްއޭއެމް އިން މިހާރު އެކުލަވާލާފައިވާ ތާވަލްގައިވާ ގޮތުން ޕްރެޒިޑެންޓްސް ކަޕްގެ ފައިނަލް އޮންނާނީ ފެބްރުވަރީ މަހުގެ 24 ވަނަ ދުވަހު އެވެ.
އެންމެ ފަހުން ޕްރެޒިޑެންޓްސް ކަޕް ބާއްވާފައި ވަނީ 2023 ވަނަ އަހަރު އެވެ. އެފަހަރުގެ މުބާރާތުގެ ފައިނަލްގައި ކުލަބު އީގަލްސް ބަލިކޮށް ޕްރެޒިޑެންޓްސް ކަޕް ކާމިޔާބު ކުރީ މާޒިޔާ ސްޕޯޓްސް އެންޑް ރެކްރިއޭޝަން އިންނެވެ.
