12 އަހަރުގެ ކުޑަ ފިރިހެން ކުއްޖަކަށް، ދޮން ބައްޕަ ޖިސްމާނީ އަނިޔާ ކުރާ މައްސަލަ އެއް ފެންމަތިވެއްޖެ!
ދެކުނުގެ ރަށެއްގައި 12 އަހަރުގެ ފިރިހެން ކުއްޖަކަށް ދޮންބައްޕަ އަނިޔާކުރި މައްސަލައަކާ ގުޅިގެން 33 އަހަރުގެ ފިރިހެނަކު ކޯޓު އަމުރެއްގެ ދަށުން ފުލުހުން ވަނީ ހައްޔަރުކޮށްފަ. މި މައްސަލައިގައި ކުއްޖާގެ ރައްކާތެރިކަން ކަށަވަރުކުރުމަށް އާންމުން ދަނީ ގޮވާލަމުން.
އަނިޔާ ލިބިފައިވާ ކުއްޖާގެ ހަށިގަނޑުން ފެންނަން ހުރި ޒަހަމްތައް | ސޯޝަލް މީޑިއާ
ދެކުނުގެ ރަށެއްގައި ކުޑަ ފިރިހެން ކުއްޖަކަށް ދޮން ބައްޕަ އަނިޔާ ކުރަމުންދާ މައްސަލަ އެއް ފެންމަތިވެއްޖެ އެވެ.
އިތުބާރު ހުރި މަސްދަރަކުން މި ނޫހަށް މައުލޫމާތު ދީފައިވާ ގޮތުގައި އަނިޔާ ލިބުނު ކުއްޖާ އަކީ 12 އަހަރުގެ ކުއްޖެކެވެ. މި ނޫހާއި ވާހަކަދެއްކި އިތުރު މީހަކު ބުނީ ކުއްޖާ ގެ ދޮން ބައްޕަ ކުއްޖާ އަށް އަނިޔާ ކުރަމުންދާތީ ކުއްޖާގެ ބައްޕަ އެ ކުއްޖާގެ ރައްކާތެރިކަމަށާއި، މައްސަލަ ބަލާދިނުމަށް އެދި އިދާރާތަކުގައި އެދެމުންދާ ކަމަށެވެ. ތަކުރާރުކޮށް ކުއްޖާ އަށް އަނިޔާ ލިބެމުން ދިޔަ ނަމަވެސް އިދާރާތަކުން އެންމެ އެކަށީގެންވާ އެއްބާރުލުން، މި މައްސަލައިގައި ކުއްޖާގެ ބައްޕަ އަށް ލިބިފައި ނުވާ ކަމަށް މި ނޫހަށް މައުލޫމާތު ދިން ފަރާތުން ބުނެފައި ވެ އެވެ.
އަދި އެ ކުއްޖާ އަށް ލިބުނު އަނިޔާތަކުގެ ނިޝާން ކުއްޖާގެ ހަށިގަނޑުން ފެންނަ ފޮޓޯތަކެއް މީސް މީޑިއާގައި ވެސް ވަނީ ދައުރުވެފަ އެވެ. އެއާއި އެކު އާއްމުން ދަނީ ކުއްޖާގެ ރައްކާތެރިކަން ކަށަވަރުކުރުމަށް ޖެންޑަރ މިނިސްޓްރީ އަށް ގޮވާލަމުންނެވެ. އަދި މި މައްސަލަ ބަލާ ފިޔަވަޅު އެޅުމަށް ވެސް އާއްމުން ދަނީ ކަމާއި ގުޅުން ހުރި އިދާރާތަކަށް ގޮވާލަމުންނެވެ.
އެ ފޮޓޯތަކުން ފެންނަ ގޮތުގައި ކުއްޖާގެ އަރިކަށްޓާއި، ބުރަކަށީގައި ބާރަށް އެއްޗަކުން ޖެހުމުން އުފެދޭ ފަދަ ނިޝާންތަކެއް ފެންނަން ހުއްޓެވެ. އަދި ކުއްޖާގެ އަތަށް ވެސް އެކި ވަރުގެ އަނިޔާތައް ލިބިފައި ހުރި މަންޒަރު އެ ފޮޓޯ އިން ފެނެ އެވެ.
ރާއްޖެ ޓީވީ އަށް މައުލޫމާތު ދެމުން ފުލުހުން ބުނީ، މި މައްސަލަ އާއި ގުޅިގެން މީހަކު ހައްޔަރުކޮށްފައިވާ ކަމަށާއި، އޭނާ ހައްޔަރުކޮށްފައި ވަނީ 33 އަހަރުގެ ފިރިހެނެއް ކަމަށެވެ. މީގެ އިތުރުން މި މައްސަލައިގައި ހައްޔަރު ކުރި މީހާ ހައްޔަރު ކުރީ ފެބްރުއަރީ 15 ވަނަ ދުވަހު ކޯޓު އަމުރެއްގެ ދަށުން ކަަމަށް ވެސް ފުލުހުން ވަނީ މައުލޫމާތު ދީފަ އެވެ. ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
ޖެންޑަރ މިނިސްޓްރީ އިން ބުނީ މި މައްސަލަ އަކީ ޖިނާއީ މައްސަލަ އަކަށް ވުމާއި އެކު މައްސަލަ ބަލާނީ ފުލުހުން ކަމަށެވެ. އަދި މި މައްސަލަ އާއި ގުޅިގެން ކުއްޖާ އަށް ފޯރުކޮށް ސައިކޯ ސޯޝަލް ސަޕޯޓް ފޯރުކޮށްދިނުމުގެ މަސައްކަތް ޖެންޑަރ މިނިސްޓްރީ އިން ކުރަމުންދާނެ ކަމަށް ޖެންޑަރ މިނިސްޓްރީ އިން ވަނީ ބުނެފަ އެވެ.
މި މައްސަލަ ބެލުމުގައި ކަމާއި ގުޅުން ހުރި އިދާރާތަކުން އިހުމާލު ވެފައިވާކަމަށް ތުހުމަތުކޮށް އާއްމުން ދަނީ އެ އިދާރާތަކަށް ފާޑުކިޔަމުންނެވެ. އަދި މިފަދަ މައްސަލަތައް ނުބެލި ލަސްވުމާއި، ފިޔަވަޅު އެޅުމުގައި ލަސް ވުމަކީ މިފަދަ މައްސަލަތައް ރިޕޯޓް ކުރި ނަމަވެސް މައްސަލަތަކުގައި އަނިޔާ ލިބުނު މީހާ އަށް އިންސާފު ލިބުން ލަސްވާ ސަބަބު ކަމަށް ފާޑުކިޔާ ފަރާތްތަކުން ވަނީ ބުނެފަ އެވެ.
