ކުރީގެ ރައީސް ސޯލިހު އަނިޔާވެރި ގޮތަކަށް އަވަހާރަކޮށްލަން ޖެހޭ ކަމަށް ކުރީގެ މެމްބަރު މުސްތަފާ ވިދާޅުވެއްޖެ, ފުލުހުންގެ ކޮމެންޓެއް ނެތް!

އަނިޔާވެރި ގޮތަކަށް، ކުރީގެ ރައީސް އިބްރާހީމް މުހައްމަދު ސޯލިހު އަވަހާރަކޮށްލަން ޖެހޭ ކަމަށް ރައްޔިތުންގެ މަޖިލީހުގެ ތިމަރަފުށި ދާއިރާގެ ކުރީގެ މެންބަރު މުހައްމަދު މުސްތަފާ ވިދާޅުވެއްޖެ އެވެ.

އެކްސްގައި އޭނާ ވަނީ ރައީސް ސޯލިހު ޓެގް ކުރައްވާ އެ މަނިކުފާނަށް ނިސްބަތްކޮށް ހަޑި ހުތުރުބަހުން ވާހަކަދައްކަވާފަ އެވެ. މުސްތަފާ ވަނީ ރައީސް ސޯލިހު ދަންޖައްސާ މަރަން ޖެހޭ ކަމަށް ވިދާޅުވެފަ އެވެ. އަދި މުސްތަފާ ފަދަ މީހަކު ވެރިކަމުގައި ނެތުމަކީ ސޯލިހުގެ ނަސީބު ކަމަށް ވެސް ވިދާޅުވެފައި ވެ އެވެ.

 މުސްތަފާ ކުރެއްވި އެ ޕޯސްޓާ ގުޅިގެން ނޫސްވެރިން ތަކުރާރުކޮށް ސުވާލު ކުރި ނަމަވެސް އެކަމަށް ފުލުހުން ޖަވާބެއް ދީފަ އެއް ނުވެ އެވެ. އެހެންކަމުން މި މައްސަލަ ބަލާނެކަން ނުވަތަ ނޫންކަން ސާފެއް ނޫނެވެ. 

މުސްތަފާ ކުރެއްވި އިތުރު ޕޯސްޓެއްގައި ވިދާޅުވީ ރައީސް ސޯލިހުގެ އިތުރުން ހައުސިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ފަދަ ބޭފުޅުން ވެސް އިސްލާމީ ޤާނޫނު ހިނގާ ނަމަ ދުނިޔޭގައި ނުތިބޭނެ ކަމަށެވެ. ޗައިނާ ފަދަ ޤައުމެއްގައި އެ ބޭފުޅުން ގައުމެއް ނަމަ ދަންޖައްސައި އަވަރާހަކޮށްލާނެ ކަމަށް މުސްތަފާގެ ޕޯސްޓްގައި ވެ އެވެ.

މުސްތަފާ މި ޕޯސްޓްތައް ކުރެއްވި ސީދާ ސަބަބެއް ހާމަ އެއް ނުކުރައްވަ އެވެ. ނަމަވެސް މީގެ ކުރިން ވެސް މުސްތަފާ ވަނީ ރައީސް ސޯލިހު 1.7 މިލިއަން ޑޮލަރު މުސްތަފާ އަށް ދޭން ޖެހޭ ކަމަށް ވިދާޅުވަމުންނެވެ. ނަމަވެސް އެ ފައިސާ އާއި ގުޅުން ހުރި ހެއްކާއި ގުޅޭގޮތުން މުސްތަފާ އެއްވެސް ވާހަކަ އެއް ޕޯސްޓް ކުރައްވާފަ އެއް ނުވެ އެވެ.