ރަމަޟާން މަހު އެމްއޭސީއެލްގެ މުވައްޒަފުންނަށް އިތުރުގަޑީގެ ފައިސާ ލިބޭނީ 48 ގަޑިއިރަށްވުރެ އިތުރަށް މަސައްކަތް ކުރާނަމަ
މި ރަމަޟާން މަހު އެމްއޭސީއެލްގެ އިދާރީ މުވައްޒަފުންގެ މަސައްކަތު ގަޑި ކުރުކުރި ނަމަވެސް، އިތުރުގަޑީގެ ފައިސާ ލިބޭނީ ހަފްތާއަކު 48 ގަޑިއިރަށްވުރެ އިތުރަށް މަސައްކަތް ކުރުމުން ކަމަށް އެ ކުންފުނިން ވަނީ ނިންމާފަ އެވެ. މި ނިންމުމާ ގުޅިގެން މުވައްޒަފުންގެ ނުރުހުން އަމާޒުވެފައިވާއިރު، މިއީ ރަމަޟާން މަހު މުވައްޒަފުންނަށް ކުރިމަތިވާނެ ބޮޑު ދައްޗެއްގެ ގޮތުގައި ގިނަ ބަޔަކު ދަނީ ސިފަކުރަމުން.
އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު. ކުންފުނީގެ މެންޑިޑޭޓުން ބޭރުން ދަނީ ގިނަ މަޝްރޫއުތަކާ ހަވާލުވަމުން | އެމްއޭސީއެލް
ރަމަޟާން މަހު މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ މުވައްޒަފުންނަށް އިތުރު ގަޑީގެ ފައިސާ ލިބޭނީ 48 ގަޑިއިރަށްވުރެ އިތުރުވާ ވަގުތަށް ކަމަށް އެކުންފުނިން ބުނެފި އެވެ.
މިދިޔަ ހޯމަ ދުވަހު އެމްއޭސީއެލުން ނެރުނު ސަރކިއުލަރގައި ބުނީ، 1447 ވަނަ އަހަރު ރަމަޟާން މަހުގެ ރަސްމީ ގަޑި އަދި ޝައްވާލު މަހުގެ ފުރަތަމަ 7 ދުވަހު، އެކުންފުނީގެ އިދާރީ މުވައްޒަފުންގެ މަސައްކަތު ވަގުތަކީ 4 ގަޑިއިރާއި 30 މިނެޓް ކަމަށް ކަނޑައަޅާފައިވާ ކަމަށެވެ. މަސައްކަތު ގަޑިއަކީ ހެނދުނު 9:00ން 1:30ށް ކަމަށާއި، ގްރޭސް ޕީރިއަޑެއްގެ ގޮތުގައި 9:00ން 9:30 އާއި ދެމެދުގެ ވަގުތެއް ކަނޑައަޅާފައިވާ ކަމަށެވެ.
އެމްއޭސީއެލުން ބުނީ، ޑިއުޓީ އުސޫލުން މަސައްކަތް ކުރާ މުވައްޒަފުން މަސައްކަތް ކުރުމަށް ހަމަޖެހިފައިވާ ގަޑިއަކީ އެހެން މަސްތަކެކޭ ވެސް އެއްފަދައިން އެ މުވައްޒަފެއް މަސައްކަތް ކުރާ ޑިޕާޓްމަންޓް ނުވަތަ ސެކްޝަނުން ޑިއުޓީ ރޯސްޓަރގައި ކަނޑައަޅާފައިވާ ޑިއުޓީ ގަޑިތަކުގައި ކަމަށެވެ.
މީގެ އިތުރުން ރަމަޟާން މަހު އިތުރުގަޑީގެ ފައިސާ ލިބޭނީ އެހެން މަސްތަކެކޭ ވެސް އެއްފަދައިން ހަފްތާއަކު 48 ގަޑިއިރަށްވުރެ އިތުރަށް މަސައްކަތް ކޮށްފައިވާ ވަގުތަށް ކަމަށް އެމްއޭސީއެލުން ބުންޏެވެ.
އެހެންކަމުން ރަސްމީ ވަގުތުގެ ބޭރުން ކުރާ މަސައްކަތްތަކަށް 48 ގަޑިއިރު ނުވާ ނަމަ، އިތުރުގަޑީގެ ފައިސާ މުވައްޒަފުންނަށް ނުލިބޭނެ އެވެ.
އެމްއޭސީއެލްގެ މި ނިންމުމާ ގުޅިގެން ގިނަ މުވައްޒަފުން ދަނީ ސޯޝަލް މީޑިއާގައި މިކަމުގެ ނުރުހުން ފާޅު ކުރަމުންނެވެ. މިއީ ރަމަޟާން މަހު މުވައްޒަފުންނަށް ކުރާ ދައްޗެއް ކަމަށާއި، ޑިއުޓީގައި ކޮންމެ ދުވަހަކު ވެސް ޑިއުޓީ ބޭރުން މަސައްކަތް ކުރަން ޖެހޭ ކަމަށް މުވައްޒަފުން ބުނެފައިވެ އެވެ. އަދި 48 ގަޑިއިރު ހަމަނުވި ނަމަވެސް އިތުރު ވަގުތު ކުރާ މަސައްކަތަށް ފައިސާ ދޭން ޖެހޭ ކަމަށް މުވައްޒަފުން ބުނެފައިވެ އެވެ.
ރައީސް ޑރ.މުހައްމަދު މުއިއްޒުގެ ސަރުކާރުގައި ރާއްޖޭގެ އެއާޕޯޓުތަކާ ބެހޭ ކުންފުނި އެމްއޭސީއެލުން ދަނީ މެންޑިޑޭޓުން ބޭރުން ގިނަ މަޝްރޫއުތަކާއި ހަވާލުވަމުންނެވެ. އެގޮތުން ބިން ހިއްކުމާއި، އެމްބިއުލާންސް ގެނައުމާއި، 5 ތަރީގެ ރިސޯޓަކާއި ހޮޓެލް ސްކޫލެއް ތަރައްގީކުރުމުގެ މަޝްރޫއުތަކެއްގައި ސޮއިކޮށްފައިވެ އެވެ.
މިކަމާއި ގުޅިގެން ވެސް ގިނަ ބައެއްގެ ފާޑު ކިޔުން އެކުންފުންޏަށް ވަނީ އަމާޒުވެފަ އެވެ. ރާއްޖޭގެ އެއަރޕޯޓުތައް ތަރައްގީ ނުކުރާ ކަމަށާއި، ކުންފުނީގެ މުވައްޒަފުންނަށް ވަރަށް ބޮޑަށް އިހުމާލުވަމުންދާ ކަމަށް ގިނަ ބަޔަކު ދަނީ ބުނަމުންނެވެ.
