ރަމަޟާން މަހު އަލްއަޤްޞާ އަށް ހުކުރަށް ވަދެވޭނީ 10،000 ފަލަސްޠީނު މީހުންނަށް ކަމަށް އިޒްރޭލުން ބުނެފި
ރަމަޟާން މަހުގެ ހުކުރު ނަމާދުތަކަށް އަލްއަޤްޞާ މިސްކިތަށް ވަދެވޭނީ އުމުރުން 55 އަހަރުން މަތީގެ ފިރިހެނުންނާއި 50 އަހަރުން މަތީގެ އަންހެނުންނަށް އެކަނި ކަމަށް ކަނޑައަޅައި، އިޒްރޭލުން ހަރުކަށި ފިޔަވަޅުތަކެއް އަޅައިފި. މިސްކިތުގެ އިންތިޒާމުތަކަށް އިޒްރޭލުން ހުރަސްއަޅަމުންދާއިރު، މިސްކިތުގެ އިސް އިމާމަކު މިސްކިތައް ވަނުންވެސް ވަނީ މަނާކޮށްފައި.
2026 ވަނަ އަހަރުގެ ފެބްރުއަރީ މަހުގެ 17 ވަނަ ދުވަހު، ގުދުސްގެ އޯލްޑް ސިޓީގައި ހުންނަ އަލް-އަގްސާ މިސްކިތުގެ ގޯތިތެރޭގައި، ފަލަސްތީނުގެ ކުޑަކުދިންތަކެއް ޑޯމް އޮފް ދަ ރޮކް (ގުއްބަތުއްޞަޚްރާ) އަށް އަރަން ހުންނަ ސިޑިތަކުން މައްޗަށް އަރަނީ. | ރޮއިޓާސް
ބުދަ ދުވަހު ފެށުނު މި އަހަރުގެ ބަރަކާތްތެރި ރަމަޟާން މަހު ހުކުރު ނަމާދަށް، އިރުމަތީ ގުދުސްގައި ހުންނަ އަލްއަޤްޞާ މިސްކިތަށް ވަދެވޭނީ ފަލަސްޠީނުގެ 10،000 މީހުންނަށް ކަމަށް އިޒްރޭލުން އިޢުލާންކޮށްފި އެވެ.
އިޒްރޭލުގެ ކަމާބެހޭ އިދާރާތަކުން ވަނީ މިސްކިތުގެ ގޯތިތެރެއަށް ވަނުމުގައި ހަރުކަށި ހުރަސްތަކެއް ކުރިމަތިކޮށްފަ އެވެ. އެގޮތުން މިސްކިތަށް ވަނުމުގެ ހުއްދަ ދިނުމަށް ނިންމާފައިވަނީ އުމުރުން 55 އަހަރުން މަތީގެ ފިރިހެނުންނަށާއި، 50 އަހަރުން މަތީގެ އަންހެނުންގެ އިތުރުން 12 އަހަރުން ދަށުގެ ކުޑަކުދިންނަށް އެކަންޏެވެ.
އިޒްރޭލުން ހިފާފައިވާ ފަލަސްޠީނުގެ ބިންތަކުގެ މަދަނީ ކަންކަމާ ބެހޭ އިޒްރޭލުގެ ޑިފެންސް މިނިސްޓްރީގެ އިދާރާ، ކޯގަޓް އިން ނެރުނު ބަޔާނެއްގައި ބުނެފައިވަނީ، ރަމަޟާން މަހުގެ ކޮންމެ ހުކުރު ދުވަހަކު 10،000 ފަލަސްޠީނު މީހުންނަށް އަލްއަޤްޞާ މިސްކިތަށް (ޓެމްޕަލް މައުންޓަށް) ވަނުމުގެ ހުއްދަ ދެވޭނެ ކަމަށެވެ. ނަމަވެސް މިސްކިތައް ވަދެވޭނީ ކުރިއާލާ ހޯދަންޖެހޭ ޚާއްޞަ ހުއްދަ އޮންނަ ފަރާތްތަކަށް އެކަނި ކަމަށްވެސް އެ ބަޔާނުގައިވެ އެވެ.
އެ ބަޔާނުގައި އިތުރަށް ބުނެފައިވަނީ، ފިރިހެނެއް ނަމަ މިސްކިތަށް ވަނުމުގެ ހުއްދަ ދެވޭނީ އުމުރުން 55 އަހަރުން މަތީގެ މީހުންނަށް ކަމަށާއި، އަންހެނެއް ނަމަ 50 އަހަރުން މަތީގެ މީހުންނަށް ކަމުގަ އެވެ. އަދި 12 އަހަރުން ދަށުގެ ކުޑަކުދިންނަށް ވަދެވޭނީ ގާތް ތިމާގެ މީހަކާ އެކީ އައުމުން ކަމަށް ވެސް އެ އިދާރާ އިން ބުނެފައިވެ އެވެ.
އިސްލާމްދީނުގެ ތިންވަނަ އަށް އެންމެ މުޤައްދަސް ބިނާ ކަމަށްވާ އަލްއަޤްޞާ މިސްކިތަކީ، 1967 ވަނަ އަހަރު އިޒްރޭލުން ހިފާ، އަދި ފަހުން ބައިނަލްއަޤްވާމީ މުޖުތަމަޢުން ބަލައިނުގަތް ނަމަވެސް އެ ގައުމުގެ ބައެއްގެ ގޮތުގައި ކަނޑައަޅާފައިވާ އިރުމަތީ ގުދުސްގައި ހުންނަ މިސްކިތެކެވެ. އާންމު ގޮތެއްގައި ރަމަޟާން މަހު އެތައް ލައްކަ ފަލަސްޠީނު ރައްޔިތުންނެއް އެ މިސްކިތުގައި ނަމާދު ކުރުމަށް ޖަމާވެ އެވެ.
ފަލަސްޠީނުގެ ގުދުސް ގަވަރނަރޭޓުން މި ހަފުތާގައި ބުނެފައިވަނީ، ރަމަޟާން މަހަށް ތައްޔާރުވުމުގެ ގޮތުން އެ މިސްކިތް ބަލަހައްޓާ އުރުދުންގެ އިސްލާމިކް ވަޤުފް އިދާރާއިން ކުރަމުންދިޔަ މަސައްކަތްތަކަށް އިޒްރޭލުން ހުރަސްއަޅާފައިވާ ކަމަށެވެ. މީގެ ތެރޭގައި އަވިން ސަލާމަތްވުމަށް ހިޔާވާނެ ފަދަ އޮނިގަނޑުތައް ހެދުމާއި، ވަގުތީ މެޑިކަލް ކްލިނިކްތައް ގާއިމުކުރުން ހިމެނެއެވެ.
އަލްއަޤްޞާ މިސްކިތުގެ އިސް އިމާމެއް ކަމަށްވާ ޝައިޚް މުޙައްމަދު އަލްޢައްބާސީ އޭއެފްޕީ ނިއުސް އެޖެންސީއަށް ދެއްވި ބަސްދީގަތުމެއްގައި ވިދާޅުވީ، އޭނާވެސް މިސްކިތަށް ވަނުން މަނާކޮށްފައިވާ ކަމަށެވެ.
ޝައިޚް ޢައްބާސީ ވިދާޅުވީ، އެއް ހަފުތާގެ މުއްދަތަށް އޭނާ މިސްކިތަށް ވަނުން މަނާކޮށްފައިވާ ކަމަށާއި، އެ އަމުރުގެ މުއްދަތު އިތުރުކުރުމުގެ ފުރުސަތު އޮތް ކަމަށެވެ.
މިދިޔަ ހޯމަ ދުވަހުން ފެށިގެން އޭނާ މިސްކިތަށް ވަނުން މަނާކުރި ސަބަބެއް އިޒްރޭލުގެ ކަމާބެހޭ ފަރާތްތަކުން އަންގާފައިނުވާ ކަމަށްވެސް ޢައްބާސީ ވިދާޅުވިއެވެ.
ޒަމާނުއްސުރެ އަމަލުކުރަމުން އަންނަ އުސޫލުތަކުގެ ދަށުން، ޔަހޫދީންނަށް އަލްއަޤްޞާ މިސްކިތުގެ ގޯތިތެރެއަށް ޒިޔާރަތް ކުރެވުނު ނަމަވެސް، އެތަނުގައި އަޅުކަން ކުރުމަކީ މަނާ ކަމެކެވެ.
ފާއިތުވި އަހަރުތަކުގައި، ޔަހޫދީ ހަރުކަށި ފިކުރުގެ ގިނަ ބަޔަކު ވަނީ މިސްކިތުގައި ޔަހޫދީން އަޅުކަން ކުރުން މަނާކޮށްފައި އޮންނަ އޮތުމާ ދެކޮޅަށް މަސައްކަތް ކޮށްފައެވެ. މީގެ ތެރޭގައި ހަރުކަށި ފިކުރުގެ ސިޔާސީ ލީޑަރު އިތަމާރު ބެން ގްވީރް ހިމެނެއެވެ. އޭނާ ވަނީ 2024 އަދި 2025 ވަނަ އަހަރު ނޭޝަނަލް ސެކިއުރިޓީ މިނިސްޓަރުގެ މަގާމުގައި ހުރެ، އެ ބިމުގައި އަޅުކަން ކޮށްފަ އެވެ.
