މިއަހަރުގެ ރަމަޟާން މަހުގެ ފިތުރު ޒަކާތް ބަލައިގަންނަން ފަށައިފި
މި އަހަރުގެ ފިތުރު ޒަކާތް އޮންލައިންކޮށް ދެއްކުމުގެ ފުރުސަތު ރަމަޟާން މަހުގެ 27 އާ ހަމައަށް ހުޅުވާލާފައިވާއިރު، ބަނޑޭރިޕޭ އަދި ފަހިޕޭ މެދުވެރިކޮށް މަސް ނިމެންދެން ޒަކާތް ދެއްކޭނެ. އޮންލައިންކޮށް ޒަކާތް ދައްކަން ދަތި ފަރާތްތަކަށް އިސްލާމީ މަރުކަޒުގައި ޚާއްސަ އިންތިޒާމުތަކެއް ހަމަޖައްސާފައިވާއިރު، ރަށްރަށުގައި ޒަކާތް ބަލައިގަންނާނީ އެ ރަށެއްގެ ކައުންސިލުން.
އިސްލާމީ މަރުކަޒުގެ ޖަލްސާކުރާ މާލަމުގައި ފިތުރު ޒަކާތް ބަލައިގަންނަނީ. | ރާއްޖެއެމްވީ
މިއަހަރުގެ ރަމަޟާން މަހުގެ ފިތުރު ޒަކާތް ބަލައިގަންނަން ފަށައިފި އެވެ.
ބުދަ ދުވަހުން ފެށިގެން ފިތުރު ޒަކާތް ބަލައިގަންނަން ފަށާފައިވާއިރު، އޮންލައިންކޮށް ވެސް ޒަކާތް ދެއްކޭނެ އެވެ.
ޒަކާތު ހައުސްއިން ބުނީ 1447 ވަނަ އަހަރުގެ ފިތުރު ޒަކާތް އޮންލައިންކޮށް ބަލައިގަތުމަށް ހަމަޖެހިފައިވަނީ 1447 ރަމަޟާން 01 ވަނަ ދުވަހުން ފެށިގެން 1447 ރަމަޟާން 27 ވަނަ ދުވަހުގެ ހެނދުނު 06:00އާ ހަމައަށް ކަމަށެވެ. އަދި ދިރާގު ޕޭ، އެމް ފައިސާ، ފައިސާ މޮބައިލް، ބީއެމްއެލް، ފަހިޕޭ، އަވަސް އެޕް، ބަނޑޭރި ޕޯޓަލް މެދުވެރިކޮށް ފިތުރު ޒަކާތް ދެއްކޭނެ ކަމަށެވެ.
މީގެ އިތުރުން ޒަކާތު ހައުސްއިން ބުނީ، ބަނޑޭރިޕޭ އަދި ފަހިޕޭ މެދުވެރިކޮށް ރަމަޟާން މަހުގެ އެންމެ ފަހު ދުވަހާ ހަމައަށް ފިތުރު ޒަކާތް ދެއްކޭނެ ކަމަށެވެ. އުމުރުން ދުވަސްވެފައިވާ ފަރާތްތަކާއި، އޮންލައިންކޮށް ޒަކާތް ދެއްކުމަށް އަހުލުވެރިނޫން ފަރާތްތަކަށް ޚާއްސަކޮށް އިސްލާމީ މަރުކަޒުގެ ޖަލްސާކުރާ މާލަމުގައި ޒަކާތް ބަލައިގަތުމުގެ އިންތިޒާމް ހަމަޖެހިފައިވާ ކަމަށް އެއިދާރާއިން ބުންޏެވެ.
އެގޮތުން 22 ފެބްރުވަރީ 2026ން 9 މާރިޗް 2026ށް ރަސްމީ ބަންދު ނޫން ކޮންމެ ދުވަހެއްގެ ހެނދުނު 10:00ން މެންދުރު ފަހު 1:00ށް އަދި 10 މާރިޗް 2026ން 19 މާރިޗް 2026ށް ހުކުރު އަދި ހޮނިހިރު ދުވަސް ފިޔަވައި، ކޮންމެ ދުވަހެއްގެ ހެނދުނު 11:00ން މެންދުރު ފަހު 2:00ށް ފިތުރު ޒަކާތް އިސްލާމީ މަރުކަޒުން ބަލައިގަންނާނެ ކަމަށް ޒަކާތު ހައުސްއިން ބުންޏެވެ.
ޒަކާތު ހައުސްއިން ބުނީ، މާލެ ސިޓީ ފިޔަވައި ރަށްރަށުގައި ނަގުދު ފައިސާއިން ފިތުރު ޒަކާތް ބަލައިގަތުމުގެ އިންތިޒާމު ހަމަޖައްސާނީ އެރަށެއްގެ ރަށު/ސިޓީ ކައުންސިލަކުން ކަމަށެވެ.
ފިތުރު ޒަކާތުގެ ގޮތުގައި ދައްކަންޖެހޭ ފައިސާގެ އަދަދު
- އާދައިގެ ހަނޑޫ 12 ރުފިޔާ
- ތައިލެންޑް ހަދު ހަނޑޫ 53 ރުފިޔާ
- ރަތް ހަނޑޫ 96 ރުފިޔާ
- ބާސްމަތީ ހަނޑޫ (އާދައިގެ) 77 ރުފިޔާ
- ބާސްމަތީ ހަނޑޫ (މޮޅު) 109 ރުފިޔާ
- ބާސްމަތީ ހަނޑޫ (އެންމެ މޮޅު) 136 ރުފިޔާ
- އާދައިގެ ފުށް 10 ރުފިޔާ އަދި،
- އާޓާ ފުށް 75 ރުފިޔާ
ފިތުރު ޒަކާތަކީ ކޮންމެ މުސްލިމެއްގެ މައްޗަށް ދެއްކުން ވާޖިބުވެގެންވާ އެއްޗެކެވެ. ފިތުރު ޒަކާތް ދައްކަން ޖެހެނީ އެ ބަޔަކު އާންމުކޮށް ކައިއުޅޭ ގޮވާމުގެ ބާވަތަކުންނެވެ. އޭގެ މިންވަރަކީ ޞާޢެއް ނުވަތަ ދެއަތް ގޮށިން ނެގޭ މިންވަރެވެ.
