ކޭންގެ މޮޅު ކުޅުމާ އެކު މޮޅުވެ، ބަޔާން އިން ދެ ވަނަ އަށް ޖެހިލައިފި

ޔުއެފާ ޗެމްޕިއަންސް ލީގުގައި ޔޫނިއަން ސެއިންޓް ގިލޮއިސްއާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކް އިން ލީގު ތާވަލްގެ ދެ ވަނަ މަގާމަށް ޖެހިލައިފި އެވެ. 

ބަޔާންގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގައި ބަޔާން އިން އެ ޓީމުގެ ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ވެސް ބަޔާން އިން ރަނގަޅަށް ކުޅެފައިވާއިރު، އެ ޓީމުން ވަނީ ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ. އެގޮތުން މެޗުގެ ފުރަތަމަ ހާފުގައި ބަޔާން އަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން އަށް ލަނޑު ޖަހަން ފުރުސަތު ލިބުނު ނަމަވެސް، ފުރުސަތުގެ ބޭނުމެއް ނުކުރެެވުނެވެ.

ނަމަވެސް، މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި ކޭން ވަނީ ލަނޑު ޖަހައި ބަޔާން އަށް ލީޑު ނަގައިދީފަ އެވެ. އެ ލަނޑު ކޭން ޖެހީ މައިކަލް އޮލައިސޭ ތަނަވަސްކޮށްދިން ފުރުސަތެއްގަ އެވެ. އޭގެ ތިން މިނެޓު ފަހުން ބަޔާންގެ ދެ ވަނަ ލަނޑު ޖަހައި ކޭން ލީޑު ފުޅާ ކުރީ، އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. 

މޮޅާއެކު ބަޔާން އިން ވަނީ ދެ ވަނައިގައި އޮތް ރެއާލް މެޑްރިޑު ފަހަތަށް ޖައްސާލައި، ދެ ވަނަ މަގާމަށް ޖެހިލައިފަ އެވެ. މިހާތަނަށް ކުޅެފައިވާ ހަތް މެޗުން ބަޔާން އަށް ލިބެނީ 18 ޕޮއިންޓެވެ. މި ސީޒަންގެ ޗެމްޕިއަންސް ލީގުގައި ހަ މެޗުން ބަޔާން މޮޅުވެފައިވާއިރު، އެއް މެޗުން ވަނީ ބަލިވެފަ އެވެ. ބަޔާންގެ ފަހަތުން ތިން ވަަނައިގައި ރެއާލް އޮތީ 15 ވަނައިގަ އެވެ.